(پی این این)
دربھنگہ: دربھنگہ پولیس نے شوبھن-ایکمی بائی پاس پر ایمس کے قریب مغربی بنگال کے ایک صرافہ تاجر سے ہوئی بڑی لوٹ کی واردات کا انکشاف کرتے ہوئے 5 جرائم پیشہ افراد کو گرفتار کیا ہے۔ گرفتار جرائم پیشہ افراد کی نشاندہی پر پولیس نے 62 کلو 40 گرام چاندی، 5 لاکھ 94 ہزار 100 روپے نقد، 5 اینڈرائڈ موبائل فون اور لوٹ میں استعمال کی گئی 2 کاریں برآمد کی ہیں۔ پولیس کے مطابق واردات کی منصوبہ بندی پہلے ہی کرلی گئی تھی، جس کے تحت تاجر کی گاڑی کو سنسان مقام پر روک کر اسلحہ کے زور پر لوٹ لیا گیا تھا۔
دربھنگہ پولیس کی جانب سے 10 نومبر 2026 کو جاری پریس ریلیز کے مطابق 7 نومبر کی رات تقریباً 22:00 سے 23:00 بجے کے درمیان مغربی بنگال کا ایک صرافہ تاجر شوبھن سے ایکمی جانے والی سڑک پر ایمس مین گیٹ سے کچھ دور 2 شیشم کے درختوں کے قریب لوٹ کا شکار ہوا تھا۔ اس سلسلے میں سمری تھانہ میں مقدمہ درج کرکے سینئر سپرنٹنڈنٹ آف پولیس کو اطلاع دی گئی۔ واقعے کی سنگینی کو دیکھتے ہوئے ایس ایس پی جگن ناتھ ریڈی جلا ریڈی کی ہدایت پر صدر ایس ڈی پی او-2 سبھیندر کمار سمن کی قیادت میں خصوصی ٹیم تشکیل دی گئی، جسے خفیہ اطلاع کی تصدیق اور تکنیکی تحقیقات کے بعد کارروائی کی ذمہ داری سونپی گئی۔
پولیس تحقیقات میں انکشاف ہوا کہ واردات کی منصوبہ بندی چند روز قبل رام باغ واقع نکّی ساہ کے کشل ریسٹورنٹ میں تیار کی گئی تھی۔ منصوبے کے تحت مغربی بنگال کے صرافہ تاجر کی گاڑی کی ریکی کی گئی اور اسے سنسان مقام پر روک کر اسلحہ کے زور پر لوٹنے کا فیصلہ ہوا۔ لوٹے گئے چاندی کے زیورات اور نقد رقم کو مختلف گاڑیوں میں چھپانے کی بھی منصوبہ بندی کی گئی تھی۔تحقیقات کے دوران پولیس نے سب سے پہلے یونیورسٹی تھانہ علاقے کے کیدرآباد باشندہ چھوٹو کمار یادو (29) کو اس کے گھر سے گرفتار کیا۔ اس کے قبضے سے 5 لاکھ 94 ہزار 100 روپے نقد اور 1 موبائل فون برآمد ہوا۔ اس کی نشاندہی پر رام باغ واقع نکّی ساہ کے ریسٹورنٹ کے قریب چھاپہ ماری کی گئی، جہاں سے ایک بیگ میں رکھے چاندی جیسے دھات کے 34 بڑے ٹکڑے اور سرخ و سفید رنگ کی بوری میں رکھے مزید 22 ٹکڑے برآمد ہوئے۔ برآمد شدہ دھات کا مجموعی وزن 62 کلو 40 گرام بتایا گیا ہے۔
اسی کارروائی کے تحت وشال مہاسیت عرف وکی (35) اور دھیرج سونی کو سمری تھانہ علاقے میں این ایچ 27 فورلین پر پٹنہ سے دربھنگہ آنے کے دوران ایک کار سے گرفتار کیا گیا، جبکہ کیدرآباد واقع کشل ریسٹورنٹ کے مالک سنتوش کمار ساہ (63) کو ان کے ہوٹل سے اور تیجس ابھیشیک چندر (23) کو ہوٹل کے قریب سے گرفتار کیا گیا۔پولیس کے مطابق گرفتار جرائم پیشہ افراد کی نشاندہی پر مزید برآمدگی کے لیے چھاپہ ماری کی گئی۔ اس دوران ٹاٹا ٹگور کار (BR07AY-9243) کی ڈگی سے آسمانی رنگ کے بیگ میں رکھے چاندی جیسے دھات کے 34 چھوٹے بڑے ٹکڑے برآمد ہوئے، جبکہ دوسری کار ماروتی سوئفٹ (BR07AP-2202) سے سرخ رنگ کے بیگ اور سفید پلاسٹک کی بوری میں رکھے چاندی جیسے دھات کے 22 ٹکڑے برآمد کیے گئے۔ پولیس نے دونوں گاڑیوں سمیت 5 موبائل فون بھی ضبط کیے ہیں۔
گرفتار جرائم پیشہ افراد کی شناخت چھوٹو کمار یادو، والد رام سیوک یادو، ساکن کیدرآباد، تھانہ یونیورسٹی؛ وشال مہاسیت عرف وکی، والد دھرو نارائن مہاسیت، ساکن کیدرآباد، تھانہ یونیورسٹی؛ دھیرج سونی، والد سیتارام سونی، ساکن جیتو گاچھی، تھانہ نگر؛ سنتوش کمار ساہ، والد مرحوم بیجناتھ ساہ، ساکن روہیل گنج، کیدرآباد، تھانہ یونیورسٹی؛ اور تیجس ابھیشیک چندر (23)، والد رام چندر پرساد سنگھ، ساکن شبھنکرپور وارڈ نمبر 08، تھانہ نگر کے طور پر ہوئی ہے۔پولیس نے گرفتار جرائم پیشہ افراد کی نشاندہی پر جائے واردات کا معائنہ بھی کیا، جہاں تلاشی کے دوران 7.65 ایم ایم اور KF درج 1 خول برآمد ہوا۔ برآمد شدہ اشیاء کو ضبطی فہرست تیار کرکے قانونی کارروائی کے تحت تحویل میں لے لیا گیا ہے۔
اس معاملے میں بھارتیہ نیائے سنہتا کی دفعات 310(2)، 311، 317(3)، 336(3)، 338، 61(2)، 109(1) اور آرمس ایکٹ کی دفعہ 27 کے تحت کارروائی کی جا رہی ہے۔ پولیس کا کہنا ہے کہ واردات میں شامل دیگر جرائم پیشہ افراد کی گرفتاری، استعمال شدہ اسلحہ اور لوٹے گئے باقی سامان کی برآمدگی کے لیے مسلسل چھاپہ ماری کی جا رہی ہے۔کارروائی کرنے والی خصوصی ٹیم میں صدر ایس ڈی پی او-2 سبھیندر کمار سمن، ڈی آئی یو انچارج امرت لال ساہ، یونیورسٹی تھانہ انچارج سدھیر کمار، صدر تھانہ انچارج منوج کمار، نگر تھانہ انچارج اروند کمار، سمری تھانہ انچارج اروند کمار، پولیس سب انسپکٹر ششی شنکر کمار، وپن کمار یادو، رویندر بھارتی، دھیریندر کمار اور ڈی آئی یو کے اے ایس آئی رام بابو کمار سمیت دیگر پولیس اہلکار شامل تھے۔
دربھنگہ میں بڑی لوٹ کا انکشاف، 5 جرائم پیشہ گرفتار، 62 کلو 40 گرام چاندی، 5.94 لاکھ روپے نقد، 2 کاریں اور 5 موبائل فون برآمد
متعلقہ خبریں
