بی جے پی نے صرف پرائیویٹ اسکولوں میں پڑھنے والے بچوں کے والدین کو خون کے آنسو رلا دئے :منیش سسودیا

(پی این این)
نئی دہلی:دہلی میں پرائیویٹ اسکولوں کی من مانی پر خاموش بیٹھی بی جے پی حکومت پر عام آدمی پارٹی کے سینئر لیڈر اور سابق نائب وزیر اعلیٰ منیش سسودیا اور قائدِ حزبِ اختلاف آتشی نے زبردست حملہ کیا ہے۔ منیش سسودیا نے کہا کہ محض تین مہینے میں ہی بی جے پی نے پرائیویٹ اسکولوں میں پڑھنے والے بچوں کے والدین کو خون کے آنسو رلا دیے ہیں۔ اروند کیجریوال کی قیادت میں “آپ” حکومت نے جس پرائیویٹ تعلیم مافیا پر قابو پایا تھا، آج وہی بی جے پی حکومت کے دوران بھوکے بھیڑیے کی طرح والدین پر حملہ آور ہیں۔ بی جے پی حکومت بچوں کی تعلیم اور فیس جیسے سنگین معاملات پر والدین کو اندھیرے میں رکھ کر قانون لا رہی ہے۔ بی جے پی کے راج میں دہلی کے پرائیویٹ اسکول تعلیم کے مندر نہیں بلکہ مافیا کے اڈے بنتے جا رہے ہیں۔
منیش سسودیا نے ایکس ٹوئٹرپر لکھا کہ بی جے پی کی دہلی حکومت تعلیم اور فیس جیسے حساس مسئلے پر والدین کو اندھیرے میں رکھ کر قانون لا رہی ہے۔ صرف تین مہینے میں بی جے پی نے پرائیویٹ اسکولوں میں پڑھنے والے لاکھوں بچوں کے والدین کو خون کے آنسو رلوا دیے ہیں۔ ہم نے جس پرائیویٹ تعلیم مافیا پر دس سال تک لگام لگائے رکھی، بی جے پی نے آتے ہی اسے کھلی چھوٹ دے دی۔ آج وہی مافیا والدین پر بھوکے بھیڑیے کی طرح ٹوٹ پڑے ہیں۔ جب عوام میں ہنگامہ مچا، تو بی جے پی حکومت نے دکھاوے کے لیے ایک قانون لے آئی۔ مگر اس بل میں بھی اصل طاقت تعلیم مافیا کے ہی ہاتھوں میں ہے اور حکومت اپنی ذمہ داری سے پیچھے ہٹ رہی ہے۔منیش سسودیا نے مزید کہا کہ دہلی میں معصوم بچوں کو اسکول کی چھٹی کے بعد بھی اندر روک کر رکھا جا رہا ہے۔ صرف اس لیے کہ ان کے والدین اسکول وین کی لوٹ مار کے خلاف کھڑے ہیں اور خود انہیں اسکول چھوڑنے آتے ہیں۔ بی جے پی حکومت میں دہلی کے پرائیویٹ اسکول تعلیم کے مندر نہیں بلکہ مافیا کے اڈے بن چکے ہیں۔ بچوں کو ڈرا کر، والدین کو دھمکا کر بی جے پی کس قسم کی تبدیلی لانا چاہتی ہے؟ کیا اس بی جے پی حکومت میں شرم، لحاظ یا انسانیت نام کی کوئی چیز باقی ہے؟
منیش سسودیا نے ایک اور پوسٹ میں کہا کہ بی جے پی نے دہلی کے اسپتالوں کا تین مہینے میں ہی بیڑا غرق کر دیا ہے۔ دہلی کی وزیر اعلیٰ اور وزیر صبح سے شام تک اروند کیجریوال کو گالیاں دینے میں مصروف ہیں۔ دہلی کے افسران کو لگا رکھا ہے کہ کیجریوال حکومت کے وقت کی فائلوں میں کہیں کوئی کاما یا فل اسٹاپ کی بھی غلطی مل جائے تو ای ڈی اور سی بی آئی کو پیچھے لگا دیں۔ بی جے پی لیڈروں نے صرف تین مہینے میں دہلی والوں کو رلا دیا ہے۔ اسپتال تباہ، سرکاری اسکول تباہ، پرائیویٹ اسکول دہشت پھیلا رہے ہیں، بجلی مہنگی کر دی گئی ہے اور پاور کٹ الگ سے ہو رہے ہیں۔ بی جے پی والوں، اپنے لیڈروں کو سمجھاؤ، عوام نے انہیں کام کرنے کے لیے چنا ہے، نہ کہ صبح سے شام تک کیجریوال کو گالیاں دینے کے لیے۔
ادھر عام آدمی پارٹی کی سینئر لیڈر اور اسمبلی میں قائد حزبِ اختلاف آتشی نے ایکس پر کہا کہ پرائیویٹ اسکولوں کے والدین نے بی جے پی کے فیس آرڈیننس کی مخالفت کی ہے۔ سب جاننا چاہتے ہیں کہ اس قانون میں ایسا کیا ہے جو بی جے پی اسے چھپا رہی ہے؟ وزیر اعلیٰ ریکھا گپتا جی، کیا یہ قانون پرائیویٹ اسکولوں کو بچانے کے لیے بنایا جا رہا ہے؟ والدین بار بار آواز اٹھا رہے ہیں، مگر بی جے پی حکومت کسی بھی پرائیویٹ اسکول کے خلاف کوئی کارروائی نہیں کر رہی ہے۔ یہ واضح ہے کہ بی جے پی کی دہلی حکومت پرائیویٹ اسکولوں کو بچانا چاہتی ہے۔ انہوں نے کہا کہ ایک پرائیویٹ اسکول پیسے کی ہوڑ میں بچوں کو کمروں میں بند کر رہا ہے۔ دہلی کی وزیر اعلیٰ ریکھا گپتا اور وزیر تعلیم آشیش سود کہاں ہیں؟ کیا آپ اس اسکول پر کوئی کارروائی کریں گے؟