نئی دہلی: دہلی کی وزیر اعلیٰ ریکھا گپتا نے بھارت منڈپم میں منعقدہ 45ویں بین الاقوامی تجارتی میلے (آئی آئی ٹی ایف۔2026) میں دہلی پویلین کا افتتاح کیا۔گپتا نے کہا کہ دہلی صرف ملک کا دارالحکومت ہی نہیں، بلکہ ہندوستان کے مالا مال تاریخی ورثے، متنوع ثقافت، کاروباری صلاحیت اور جدید ترقی کی بھی علامت ہے۔ اس سال تجارتی میلے میں فوکس اسٹیٹ کے طور پر دہلی کی شرکت، دارالحکومت کی بڑھتی ہوئی اقتصادی، ثقافتی اور صنعتی شناخت کو قومی اور بین الاقوامی سطح پر پیش کرنے کا ایک اہم موقع ہے۔
انہوں نے کہا کہ دہلی پویلین کے ذریعے ورثے اور ترقی کے سفر کو ایک ساتھ پیش کیا جا رہا ہے۔ یہ پلیٹ فارم کاروباری افراد، خواتین کاروباریوں، دستکاروں اور مقامی مصنوعات تیار کرنے والوں کو اپنی مصنوعات اور صلاحیتوں کو وسیع پیمانے پر شناخت دلانے میں مدد دے گا۔وزیر اعلیٰ نے پویلین میں لگائے گئے مختلف اسٹالوں کا معائنہ کیا اور شرکاء سے بات چیت کرکے ان کی مصنوعات، خدمات اور کاروباری سرگرمیوں کے بارے میں معلومات حاصل کیں۔ اس سال تجارتی میلے میں دہلی کو فوکس اسٹیٹ کا درجہ دیا گیا ہے۔ دہلی پویلین میں دارالحکومت کے تاریخی ورثے، ثقافتی تنوع، کاروباری صلاحیت اور جدید ترقی کی جھلک پیش کی گئی ہے۔دہلی پویلین کا کل رقبہ 996 مربع میٹر ہے، جس میں مختلف زمروں کے 62 اسٹال لگائے گئے ہیں۔ خواتین کاروباریوں کی حوصلہ افزائی کے لیے انہیں خصوصی ترجیح دیتے ہوئے 10 اسٹال الاٹ کیے گئے ہیں۔ اس کے علاوہ 14 اسٹال سرکاری محکموں اور اداروں، 25 نجی نمائش کنندگان، وزیر اعظم کی مائیکرو فوڈ پروسیسنگ انٹرپرائزز اسکیم (پی ایم ایف ایم ای) کے چھ شرکاء اور ایک ضلع ایک پروڈکٹ (او ڈی او پی) اور او ڈی او پی برآمد کنندگان کو سات اسٹال دیے گئے ہیں۔ دہلی اسٹیٹ انڈسٹریل اینڈ انفراسٹرکچر ڈیولپمنٹ کارپوریشن لمیٹڈ (ڈی ایس آئی آئی ڈی سی) کو پویلین کی نوڈل ایجنسی بنایا گیا ہے۔
پویلین میں دہلی کے فن، ثقافت اور تاریخی شناخت کے ساتھ نمو ون، صاف یمنا اور الیکٹرک گاڑیوں کو فروغ دینے جیسی ماحولیاتی اور ترقیاتی پہلوں کو بھی پیش کیا گیا ہے۔ یہاں تعلیم، ٹرانسپورٹ، سماجی بہبود، سیاحت اور دہلی جل بورڈ سمیت مختلف سرکاری محکموں اور اداروں نے شرکت کی ہے۔ اس کے علاوہ دہلی جیل محکمہ، اسٹیٹ اربن لائیولی ہڈ مشن، دہلی کھادی اور گرام ادیوگ بورڈ اورایس او ٹی ٹی او دہلی بھی اپنے کاموں اور اقدامات کو پیش کر رہے ہیں۔
