دیوبند:جامعہ طبیہ دیوبند اور جامعہ کالج آف فارمیسی میں مرکزی اور صوبائی حکومت کی جانب سے جاری پروگرام ایک پیڑ ماں کے نام کے تحت جامعہ طبیہ دیوبند کے سکریٹری اور فارمیسی کالج کے انچارج ڈاکٹر انور سعید اور ڈاکٹر اختر سعید نے ادارہ کے احاطہ میں طلبہ وطالبات کے ساتھ بڑے پیمانہ پر شجرکاری کی ۔اس موقع پر ڈاکٹر انور سعید نے اپیل کی کہ صاف ستھرے اور خوبصورت ماحول کو بنائے رکھنے کے لئے ہر ایک فرد کو کم ازکم ایک پیڑ اپنے گھروں ،فیکٹریوں اور کھیتوں پر لازمی طور سے لگانا چاہئے ،انہوں نے کہا کہ اگر ہمارے چاروں طرف ہریالی ہوگی تواسی وقت ہم صاف ستھری ہوا میں سانس لے پائیں گے ۔انہوں نے کہا کہ جو افراد اور ادارہ شجرکاری کے اس پروگرام میں شرکت کررہے ہیں انہیں چاہئے کہ شجرکاری کرنے کے ساتھ ساتھ اس کی دیکھ بھال کی ذمہ داری بھی نبھائیں تاکہ آنے والے وقت میں آلودگی سے بچا جاسکے ۔شجر کاری کے اس پروگرام میں محکمہ جنگلات اترپردیش علاقائی آیورویدک اور یونانی اداروں کے افسران کی جانب سے ہدایات کو خاص طور سے ذہن میں رکھاگیا ۔شجرکاری کے اس پروگرام میں ڈاکٹر ناصر حسین ،ڈاکٹر انیس ،ڈاکٹر محمد فرقان ،ڈاکٹر نوید اختر ،محمد صارم ،عائشہ پروین ،روپالانبا ،نداصدیقی ،سیف عالم ،ایاض رانا ،پرویندر پال ،محمد حارث ،آرین بھاردواج ،اکرام ،مانگے رام اور طلبہ وطالبات سمیت اسٹاف موجود رہا ۔وہیں دوسری جانب شحرکاری کے اس پروگرام کے تحت دیوبند اور اس کے آس پاس کے علاقوں میں شجرکاری کرکے ماحولیات کے تحفظ کا پیغام دیا گیا ۔دیوبند کے قدیم عصری تعلیم کے ادارہ ایچ اے بی انٹر کالج کے احاطہ میں مختلف اقسام کے سایہ دار ،پھل دینے والے اور ادویات میں استعمال کی جانے والی جڑی بوٹیوں کے پودے لگائے گئے ۔ادارہ کے پرنسپل ہیم سنگھ اور اجے پرساد نے طلبہ وطالبات سے اپیل کی کہ وہ اپنے یوم پیدائش پر کم ازکم ایک پودا ضرور لگائیں ۔اس کے علاوہ دیوبند کالج آف ہائر ایجوکیشن کے طلبہ وطالبات نے امرود ،یوکلپٹس اور جامن سمیت مختلف طرح کے 300؍ پودے لگائے ۔ادارہ کے پرنسپل محمد عابد نے طلبہ وطالبات سے خطاب کرتے ہوئے انسانی زندگی میں پیڑپودوں کی اہمیت پر تفصیل سے روشنی ڈالی ۔اس کے علاوہ گورنمنٹ ماڈل ڈگری کالج کپوری گووندپور اور دیوبند کے گورنمنٹ پوسٹ گریجویٹ ڈگری کالج کے احاطہ میں بھی طلبہ وطالبات نے بڑے پیمانہ پر شجرکاری کی جبکہ نورپور گائوں میں ہوم گارڈ کے جوانوں نے بلاک آرگنائزر چھترپال کی نگرانی میں مختلف اقسام کے پودے لگائے ۔

دیوبند: دیوبند پولیس نے چار دن قبل علاقہ کے گاؤں کرڑی گاؤں میںزیر تعمیر مکان میں ہونے والی چوری کا پردہ فاش کیا ،اس معاملہ میں پولیس نے تین چوروں کو قیمتی موبائل فون سمیت گرفتار کر لیا گیا۔ پولیس کے مطابق علی پورہ کے رہنے والے ساون نے تھانہ میں درج کرائی گئی شکایت میں کہا ہے کہ 10 جولائی کو وہ کرڑی گاؤں میں گورو کے زیر تعمیر مکان پر گیا تھا۔ اس دوران نامعلوم چور اس کا موبائل فون چوری کر کے لے گئے۔ پیر کے روز پولیس نے ایک خفیہ اطلاع پر کارروائی کرتے ہوئے دیوبند کے شیو وہار کے رہنے والے تشار، گنیش پورم کے رہنے والے آیوش اور تلہیڑی چنگی کے رہنے والے سفیان کو ریاستی شاہراہ پر ایک پٹرول پمپ کے قریب سے گرفتار کر کے موبائل فون برآمد کر لیا۔ تھانہ انچارج نے بتایا کہ تینوں ملزمان کے خلاف قانونی کارروائی کی گئی اور انہیں عدالت میں پیش کیا گیا، جہاں سے انہیں جوڈیشل ریمانڈ پر جیل بھیج دیا گیا۔

(پی این این)
گورکھپور:اتر پردیش کے وزیر اعلیٰ یوگی آدتیہ ناتھ نے اتوار کی صبح گورکھپور سے ایک ہی دن میں 35 کروڑ پودے لگانے کے ریکارڈ ہدف والی ریاست گیر شجرکاری مہم’مہایگیہ 2026‘کا باقاعدہ آغاز کر دیا۔
وزیر اعلیٰ نے’ایک پیڑ ماں کے نام‘ مہم کے تحت گورکھپور لنک ایکسپریس وے پر بھگوان پور ٹول پلازہ کے قریب’تریوینی‘ (نیم، پیپل اور برگد) کا پودا لگایا اور اس موقع پر ایک سیلفی بھی لی۔ اس کے بعد گورکھناتھ مندر واپس لوٹتے ہوئے انہوں نے تال رنگ روڈ کے کنارے’مولشری‘ کا پودا بھی لگایا۔
شجرکاری مہم کے سلسلے میں گیڈا سیکٹر 28 میں منعقدہ ایک عوامی جلسے سے خطاب کرتے ہوئے وزیر اعلیٰ یوگی آدتیہ ناتھ نے کہا”گزشتہ نو سالوں میں جہاں اتر پردیش میں مادی اور بنیادی ڈھانچے (انفراسٹرکچر) کی ترقی کی رفتار تیز ہوئی ہے، وہی جنگلات کے رقبے (گرین کور) میں بھی نمایاں اضافہ ہوا ہے۔”انہوں نے مزید کہا کہ 2017 کے بعد سے ریاست میں ایکسپریس وے، ہائی وے اور سڑکوں کا جال بچھا ہے، نئی صنعتیں لگی ہیں اور شہرکاری کا دائرہ بڑھا ہے۔ لیکن اس مادی ترقی کے ساتھ ساتھ یوپی حکومت نے ماحولیاتی تحفظ کے عزم کو برقرار رکھتے ہوئے شجرکاری میں بڑی کامیابی حاصل کی ہے۔
درختوں کی اہمیت پر روشنی ڈالتے ہوئے وزیر اعلیٰ نے بتایا کہ جب زمین پر ایک درخت اگتا ہے تو وہ سینکڑوں ٹن کاربن ڈائی آکسائیڈ جذب کرتا ہے۔
انہوں نے اعداد و شمار پیش کرتے ہوئے کہا کہ گزشتہ نو سالوں میں یوپی میں جنگلات کا رقبہ بڑھنے کی وجہ سے 6 کروڑ 37 لاکھ 74 ہزار 130 ٹن کاربن ڈائی آکسائیڈ جذب ہوئی ہے اور 4 کروڑ 63 لاکھ 90 ہزار 130 ٹن آکسیجن کا اخراج ہوا ہے۔اتر پردیش کے وزیر اعلیٰ یوگی آدتیہ ناتھ نے شجرکاری مہم کی تھیم ’ایک پیڑ ماں کے نام‘ کی ستائش کرتے ہوئے کہا کہ ماں ہر انسان اور جاندار کے لیے کائنات کا سب سے خوبصورت تحفہ ہے۔
انہوں نے افسوس کا اظہار کرتے ہوئے کہا کہ ہم اپنی صحت کی تو فکر کرتے ہیں، لیکن سب کچھ دینے والی دھرتی ماتا کی صحت کو نظر انداز کر دیتے ہیں۔ اگر ہمیں خود تندرست رہنا ہے، تو زمین کو بھی تندرست رکھنا ہوگا۔
وزیر اعلیٰ نے خبردار کیا کہ زمین پر زندگی کو برقرار رکھنے کے لیے شجرکاری ناگزیر ہے۔ ماحولیاتی بحران کا اثر اب موسم کے سائیکل پر بھی صاف دیکھا جا سکتا ہے۔ انہوں نے مثال دیتے ہوئے کہا’’اس سال جو بارش 15 جون سے شروع ہونی چاہیے تھیں، وہ لگ بھگ ایک مہینہ تاخیر سے شروع ہوئی ہیں۔ جو بیج 15 جون تک بویا جانا تھا، اسے اگر 15 جولائی کو بویا جائے گا، تو اس سے فصل کی پیداوار میں 25 سے 30 فیصد تک کی کمی واقع ہو سکتی ہے۔‘‘انہوں نے مزید کہا کہ گلوبل وارمنگ کی وجہ سے دنیا بھر میں موسم شدید ہو رہے ہیں؛ کبھی گرمی انتہا کو پہنچ جاتی ہے تو کبھی سردی۔ خدشہ ہے کہ مستقبل میں کئی ساحلی شہر سمندر میں ڈوب جائیں گے اور کہیں پینے کے پانی کا شدید بحران پیدا ہو جائے گا۔ سردیوں میں کئی شہر ’گیس چیمبر‘ بن جاتے ہیں، جہاں بچوں اور بزرگوں کے لیے الرٹ جاری کرنا پڑتا ہے۔
یوگی آدتیہ ناتھ نے سوال اٹھایا کہ یہ خوفناک صورتحال کیوں پیدا ہوئی؟ انہوں نے خود ہی جواب دیتے ہوئے کہا کہ انسانوں نے اپنے مفاد کے لیے فطرت کے ساتھ کھلواڑ کیا، اندھا دھند درخت کاٹے، پانی کا بے تحاشا استعمال کیا لیکن واٹر ہارویسٹنگ پر توجہ نہیں دی، اور تالابوں پر ناجائز قبضے کیے۔ آج پوری انسانیت اس کی قیمت چکا رہی ہے۔وزیر اعلیٰ نے بتایا کہ وزیر اعظم نریندر مودی کی اپیل پر اس سال 5 جون کو عالمی یومِ ماحولیات کے موقع پر 5 کروڑ پودے لگائے گئے۔