(پی این این)
گیا جی : پولیس لائن واقع امبیڈکر ہاسٹل کے معائنے کے دوران لوک جن شکتی پارٹی (رام ولاس) کے ایک کارکن نے وزیر سنجے پاسوان کے سامنے ہی پارٹی تنظیم اور ٹکٹ کی تقسیم کو لے کر سوالات اٹھا دیے۔ کارکن نے پرانے اور زمینی سطح پر کام کرنے والے کارکنوں کو نظر انداز کئے جانے کا الزام عائد کرتے ہوئے کہا کہ پارٹی میں کارکنوں کو متوقع عزت نہیں مل رہی ہے۔ ٹکٹ کی تقسیم میں پیسے لئے جانے کا بھی اس نے سنگین الزام لگایا۔ کارکن کے مسلسل اپنی بات رکھنے کے دوران مائیک لینے کو لے کر وزیر اور اس کے درمیان ہوئی کھینچا تانی کی ویڈیو سوشل میڈیا پر وائرل ہو رہی ہے۔
کارکن نے الزام لگایا کہ پارٹی دلتوں اور محروم طبقات کی آواز اٹھانے کا دعویٰ کرتی ہے، لیکن انتخابات میں ٹکٹ دینے کے وقت زمینی سطح پر کام کرنے والے کارکنوں کو نظر انداز کر دیا جاتا ہے۔ اس نے پارٹی میں کارکنوں کی شمولیت اور انہیں تنظیم میں آگے بڑھانے کے نظام پر بھی سوال اٹھائے۔ پروگرام کے دوران کھلے طور پر تنظیم کے خلاف ناراضگی سامنے آنے کے بعد موقع پر موجود لوگوں میں بھی یہ معاملہ بحث کا موضوع بن گیا۔
وائرل ویڈیو میں کارکن مائیک لے کر اپنی بات رکھتے ہوئے نظر آ رہا ہے۔ اسی دوران وزیر سنجے پاسوان مائیک لینے کی کوشش کرتے ہیں، جس کے بعد دونوں کے درمیان کچھ دیر تک کھینچا تانی ہوتی دکھائی دیتی ہے۔
کارکن وزیر کی طرف انگلی اٹھا کر اپنی بات رکھتا ہوا بھی نظر آتا ہے۔ تاہم، وائرل ویڈیو کے مکمل پس منظر اور پورے واقعہ کی آزادانہ طور پر تصدیق نہیں ہو سکی ہے۔ ہاسٹل کے معائنے کے دوران طلبہ کے مسائل کے ساتھ ہی پارٹی کارکن کی تنظیمی ناراضگی سامنے آنے سے پروگرام کا سیاسی پہلو بھی موضوعِ بحث بن گیا۔

(پی این این)
گیا جی: گیا جنکشن پر آر پی ایف کی تلاشی مہم کے دوران رشی کیش-ہاوڑہ دون ایکسپریس سے 45 زندہ کچھوے برآمد کئے گئے۔ کچھووں کو دو جھولوں اور ایک پیٹھو بیگ میں بھر کر سلیپر کوچ ایس-08 کے باتھ روم کے قریب لاوارث حالت میں رکھا گیا تھا۔ آر پی ایف کی ٹیم کے پہنچنے سے قبل ہی اسمگلنگ میں ملوث شخص موقع سے فرار ہونے میں کامیاب ہوگیا۔
آر پی ایف انسپکٹر انچارج بنارسی یادو کی ہدایت پر ٹیم نے پلیٹ فارم نمبر تین پر کھڑی ٹرین نمبر 13010 ڈاؤن دون ایکسپریس کی تلاشی شروع کی۔ اسی دوران ایس-08 کوچ کے باتھ روم کے باہر مشتبہ حالت میں رکھے تین بیگ نظر آئے۔ بیگوں کی تلاشی لینے پر ان کے اندر بڑی تعداد میں زندہ کچھوے برآمد ہوئے۔ آر پی ایف نے تمام 45 کچھووں کو بحفاظت اپنے قبضے میں لے کر پوسٹ پہنچایا۔
انسپکٹر انچارج نے بتایا کہ کچھوا وائلڈ لائف پروٹیکشن ایکٹ 1972 کی شیڈول-1 کے تحت اعلیٰ ترین تحفظ حاصل جنگلی جانوروں میں شامل ہے۔ برآمد کئے گئے تمام کچھووں کو ضروری کارروائی کے لئے گیا وائلڈ لائف محکمہ کے حوالے کردیا گیا ہے۔ اسمگلنگ میں ملوث افراد کی شناخت ابھی نہیں ہوسکی ہے اور آر پی ایف معاملے کی چھان بین میں مصروف ہے۔

چھپرہ :بہار پردیش کانگریس کمیٹی کے صدر راجیش رام اور اے آئی سی سی کے سکریٹری انچارج سشیل پاسی کا سارن ضلع کانگریس کمیٹی نے میتھولیا چوک کے قریب شاندار استقبال کیا۔وہ چھپرہ کے راستے پٹنہ سے سیوان جا رہے تھے۔ضلع صدر ڈاکٹر شنکر چودھری کی قیادت میں درجنوں لیڈروں اور کارکنوں نے دونوں رہنماؤں کا پھولوں کے ہار پہنا کر استقبال کیا۔
استقبال کے دوران کانگریس کارکنوں نے کانگریس پارٹی زندہ باد، راہل گاندھی زندہ باد، اور قومی صدر ملیکارجن کھرگے زندہ باد جیسے نعرے لگائے۔استقبالیہ سے خطاب کرتے ہوئے ڈاکٹر شنکر نے کہا کہ ریاستی کانگریس کی نئی قیادت نے تنظیم میں نئی توانائی اور ولولہ پیدا کیا ہے۔انہوں نے پارٹی کو بوتھ سطح پر مضبوط کرنے اور عوامی مسائل کو مضبوطی سے حل کرنے پر زور دیا۔انہوں نے زور دے کر کہا کہ کانگریس نے غریبوں،کسانوں، مزدوروں، طلباء، نوجوانوں،خواتین اور کمزور طبقات کے حقوق اور وقار کے لیے مسلسل جدوجہد کی ہے۔کارکنوں کو جمہوری اور آئینی اقدار کے تحفظ کے لیے متحد ہو کر کام کرنا چاہیے ۔
اس موقع پر رام سوروپ رائے،سنیل سنگھ،عبدالقادر خان، کملیش کمار پاٹھک ،کنہیا کمار مشرا،ملک پرساد یادو،فیروز اقبال،ہریش یادو ، یاسین آزاد،تارکیشور رام،کمار وشال سنگھ ،اتل کمار،دھرمیندر کمار دھرم،گوتم پرساد،اجمل عالم،دلشیر،گولڈن خان اور نتیش کمار وغیرہ موجود تھے۔