(پی این این)
پٹنہ:بہار کے وزیرِ صحت کا عہدہ سنبھالنے کے بعد نشانت کمار پوری طرح متحرک نظر آ رہے ہیں۔ وہ مسلسل سرکاری اسپتالوں کا دورہ کر رہے ہیں، لاپروائی برتنے والوں کے خلاف سخت کارروائی کر رہے ہیں اور صحت کے شعبے میں ایک کے بعد ایک اہم فیصلے بھی لے رہے ہیں۔اسی سلسلے میں نشانت کمار نے اعلان کیا ہے کہ بہار کے تمام سرکاری اسپتالوں میں سی سی ٹی وی کیمرے نصب کیے جائیں گے۔
حکومت کا مقصد یہ ہے کہ اسپتالوں میں ڈاکٹروں اور دیگر طبی عملے کی کارکردگی پر مؤثر نگرانی رکھی جا سکے اور یہ یقینی بنایا جا سکے کہ وہ اپنی ذمہ داریاں پوری دیانت داری اور نظم و ضبط کے ساتھ انجام دے رہے ہیں۔وزیرِ صحت نے مزید بتایا کہ ریاست کے تمام ضلعی اسپتالوں کو مرحلہ وار سپر اسپیشلٹی اسپتالوں میں تبدیل کیا جائے گا، جبکہ تمام کمیونٹی ہیلتھ سینٹرز (سی ایچ سی) کو اسپیشلٹی اسپتالوں کی شکل میں ترقی دی جائے گی، تاکہ عوام کو اپنے اضلاع اور مقامی سطح پر ہی بہتر اور معیاری طبی سہولتیں میسر آ سکیں۔
میڈیا سے گفتگو کرتے ہوئے وزیرِ صحت نشانت کمار نے کہا’’ہماری کوشش ہے کہ حکومت کی فراہم کردہ دوائیں واقعی عوام تک پہنچیں۔ ہم اس بات کو یقینی بنانے کیلئے مسلسل کام کر رہے ہیں کہ دوائیں صحیح مقدار میں اور مناسب طریقے سے مستحق مریضوں تک پہنچیں۔انہوں نے کہا کہ ہماری سب سے بڑی مشکل ڈاکٹروں اور دیگر طبی عملے کی غیر حاضری ہے، جس پر قابو پانے کے لیے ہم سنجیدگی سے کام کر رہے ہیں۔ بہار میں تقریباً 15 ہزار سرکاری صحت کے ادارے ہیں اور ہم ان سبھی میں سی سی ٹی وی کیمرے نصب کروا رہے ہیں‘‘۔انہوں نے مزید کہا کہ ہم ایک ایسا سافٹ ویئر تیار کر رہے ہیں جس کے ذریعے کسی بھی ڈاکٹر کی اسپتال میں آمد و رفت کے ساتھ ساتھ اس کی پوری کارکردگی کا ریکارڈ محفوظ رکھا جا سکے گا۔ مثال کے طور پر اگر کوئی ڈاکٹر صبح 9 بجے اسپتال آتا ہے اور دوپہر ایک بجے واپس جاتا ہے تو اس دوران اس نے او پی ڈی میں مریضوں کا معائنہ کیا، آئی پی ڈی کی خدمات انجام دیں، سرجری کی یا کوئی اور طبی ذمہ داری نبھائی، ان تمام سرگرمیوں کا مکمل ریکارڈ ہمارے پاس موجود ہوگا۔
انہوں نے کہا کہ تمام سرکاری صحت مراکز میں کیمرے نصب کیے جا رہے ہیں تاکہ انہی کی مدد سے مؤثر نگرانی کی جا سکے۔ میں خود بھی اس پورے نظام کی نگرانی کروں گا۔‘‘وزیرِ صحت نشانت کمار نے بتایا کہ بہار کے پانچ زونز میں 11 لیول-3 اور 5 لیول-2 ٹراما سینٹر قائم کیے جا رہے ہیں۔ اس کے علاوہ ایل این جے پی اسپتال میں 400 بستروں پر مشتمل ایک نئے اسپتال کی بھی تعمیر کی جائے گی‘‘۔
واضح رہے کہ اس سے قبل بھی وزیرِ صحت نشانت کمار نے پی ایم سی ایچ، پٹنہ کے دورے کے دوران لاپروائی برتنے کے الزام میں قائم مقام پرنسپل کے خلاف کارروائی کی تھی۔بہار حکومت نے ڈیوٹی سے غیر حاضر رہنے اور انتظامی غفلت کے الزامات کے باعث نریندر پرتاپ سنگھ کو پٹنہ میڈیکل کالج اینڈ اسپتال (پی ایم سی ایچ) کے قائم مقام پرنسپل کے اضافی چارج سے ہٹا دیا تھا۔یہ کارروائی وزیرِ صحت نشانت کمار کے پی ایم سی ایچ کے پہلے سے طے شدہ معائنے کے بعد عمل میں آئی۔ معائنے کے دوران وزیرِ صحت نے پایا کہ قائم مقام پرنسپل نریندر پرتاپ سنگھ اپنے دفتر میں موجود نہیں تھے۔ انہوں نے نہ تو اپنی غیر حاضری کی پیشگی اطلاع دی تھی اور نہ ہی اپنی جگہ کسی دوسرے افسر کو ذمہ داری سونپی تھی۔

(پی این این)
سارن:ضلع کے مشہور ادارہ جامعہ ہاجرہ بیلا میں بعد نماز مغرب ایک مشاورتی میٹنگ منعقد ہوئی۔جسمیں ضلع کے مختلف علاقوں سے کثیر تعداد میں ممبران حضرات کی تشریف آوری ہوئی۔ پروگرام کا آغاز جامعہ کے استاذ قاری انصار کے تلاوت سے ہوا اور عزیزم انس سلمہ نے نعت نبی پیش کی جبکہ نظامت کے فرائض حافظ اعجاز الحق نے انجام دیئے۔کلیدی خطاب جمعیت علماء ہند کے ضلع صدر و جامعہ کے مہتمم مولانا ظفر عالم قاسمی نے پیش کیا۔
انہوں نے تمام مہمانوں کا شکریہ ادا کرتے ہوئے کہا کہ جس جذبہ ایمانی کے ساتھ ہم سب یہاں جمع ہوئے ہیں اسی جذبہ کے ساتھ اب ہم لوگوں کو زمینی سطح پر کام کرنے کی ضرورت ہے۔ یہ وقت بات کرنے کا نہیں بلکہ کام کرنے کا ہے۔ابھی اسی وقت کوئی لائحہ عمل طے کیجیے اور کام شروع کر دیجیے۔انہوں نے کہا کہ اپنے ساتھ تمام تنظیموں اور تمام جماعتوں کو شامل کیجیے۔ہمیں ایک دوسرے کا رفیق بن کر کام کرنا ہے فریق بن کر نہیں۔جب ہم رفیق بن کر کام کریں گے تو ہمیں ایک دوسرے کا ساتھ ملےگا اور کام کرنا آسان ہوگا۔انہوں نے مزیدکہا کہ اگر فریق بن کر کام کریں گے تو فراق ہوگا اور اس سے کام کرنے میں دشواریاں پیدا ہوں گی۔لہذا وقت کی نزاکت کو سمجھتے ہوئے کام کیجیے۔امت کو ہر ممکن انتشار سے بچانے کی کوشش کیجیئے۔
اس موقع پر موصوف نے چند تجاویز بھی پیش کیں۔جن میں ضلع کے ہر اس گاؤں میں جہاں پسماندہ طبقہ کے مسلمان رہتے ہیں وہاں دینی مکتب قائم کیا جائے تاکہ وہاں کے بچے اور بچیوں کو قرآنی تعلیمات سے آراستہ کیا جا سکے۔نوجوان نسلوں میں بڑھتے ارتداد کو روکنے کے لئے مضبوط لائحہ عمل طے کیا جائے اور اسلام کی صحیح تصویر پیش کی جائے تاکہ انکے شکوک و شبہات دور ہو سکیں۔غریب بیواؤں اور یتیم بچیوں کی امداد رسی کی جائے۔باتفاق رائے تجویز منظور کر لی گئی اور 10 افراد پر مشتمل ایک کمیٹی بھی تشکیل دی گئی۔جو ایسے گاؤں کا جائزہ لے گی جہاں مکتب کی ضرورت ہوگی۔وہاں فوری طور پر مکتب کا قیام عمل میں لایا جائے گا۔
اس موقع پر مہمان خصوصی جمعیت علماء کے ضلع ناظم حاجی توقیر عثمان،محمد مطلوب،ارشاد صاحب،حاجی انوار احمد،ماسٹر شبیب احمد،ماسٹر شمشاد،لطیف‌الرحمن،ڈاکٹر مختار،ڈاکٹر علی شیر، حفیظ الرحمٰن،اشرف صاحب،ماسٹر حسیب وغیرہم نے بھی اپنے قیمتی مشوروں سے نوازا۔ جامعہ کے صدر عبد الحنان،سکریٹری پروفیسر شاہد عالم اور ناظم تعلیمات مولانا طارق عظیم اور تمام اساتذۂ اکرام نے مہمانوں کا شکریہ ادا کیا۔مولانا ظفر عالم قاسمی کی رقت آمیز دعاؤں پر مجلس کا اختتام ہوا۔

(پی این این)
بہار شریف:پٹنہ میں واقع 7، سرکلر روڈ پر منا صدیقی نے معز سابق وزیر اعلیٰ و راجیہ سبھا رکن جناب نتیش کمار جی سے خلوص پر مبنی شائستگی ملاقات کر کے ان سے برکت اور رہنمائی حاصل کی۔
اس موقع پر بہار شریف کی مجموعی ترقی، علاقے کے بنیادی ڈھانچے کی مضبوطی، تعلیم، صحت اور عوامی فلاح سے جڑے مختلف اہم موضوعات پر تفصیل سے گفتگو ہوئی۔منا صدیقی نے کہا کہ جناب نتیش کمار کی قیادت میں بہار نے سُشاسن، سماجی انصاف، سڑک، پل، تعلیم، صحت، خواتین کی بااختیاری اور بنیادی ترقی کے شعبے میں تاریخی کامیابیاں حاصل کی ہیں۔
ان کی قیادت میں بدلا ہوا بہار آج پورے ملک میں ترقی اور سُشاسن کی ایک مثال کے طور پر جانا جاتا ہے۔ انہوں نے بہار شریف کے ترقیاتی کاموں کو مزید رفتار دینے کی درخواست کی، جس پر جناب نتیش کمار نے مثبت خیالات کا اظہار کرتے ہوئے علاقے کی جامع ترقی کے لیے اپنے عزم کا اعادہ کیا۔
ملاقات کے دوران منا صدیقی نے جناب نتیش کمار کی بہترین صحت اور طویل عمر کی دعا کرتے ہوئے ان کی رہنمائی میں بہار کی مسلسل ترقی کی امید ظاہر کی۔اس موقع پر محمد جمیل شاہ، ریاض الحق، سید ذاکر حسین، مصباح الحسن، اقبال خان عرف مالا اور سید ابو زیا بھی موجود تھے۔