چھوٹی صنعتوںکو فروغ دینے کیلئے حکومت کی نئی پالیسی،بہار کے اگلے بجٹ میں سرمایہ کاری پر ہوگی دولت کی بارش، نتیش کمار کی تشکیل کردہ کمیٹی نے سمراٹ حکومت کوسونپی رپورٹ

(پی این این)
پٹنہ:بہار میں روزگار کے مواقع بڑھانے کے لیے اب حکومت چھوٹی صنعتوں پر توجہ مرکوز کرے گی۔ اس مقصد کے لیے آئندہ سال کے بجٹ میں خصوصی فنڈ مختص کیا جا سکتا ہے۔ ’دگنا روزگار، دگنی آمدنی‘ کا ہدف حاصل کرنے کے سلسلے میں تجاویز دینے کے لیے تشکیل دی گئی تین رکنی کمیٹی نے کل اپنی رپورٹ سمراٹ حکومت کو سونپ دی۔ یہ کمیٹی سابق وزیر اعلیٰ نتیش کمار کے دورِ حکومت میں تشکیل دی گئی تھی۔
رپورٹ میں چھوٹی صنعتوں کو وسعت دے کر روزگار کے مواقع اور لوگوں کی آمدنی میں اضافہ کرنے کی سفارش کی گئی ہے۔ اس کے علاوہ آئندہ پانچ سالوں تک مجموعی ریاستی گھریلو پیداوار (جی ایس ڈی پی) کی شرح کم از کم 16 فیصد برقرار رکھنے اور علاقائی عدم مساوات کو دور کرتے ہوئے متوازن ترقی پر زور دیا گیا ہے۔
کمیٹی کے چیئرمین اور سابق چیف سکریٹری نوین کمار نے رپورٹ نائب وزیر اعلیٰ و وزیر خزانہ بِجندر پرساد یادو کے حوالے کی۔ اب محکمہ خزانہ اس رپورٹ پر عمل درآمد کرتے ہوئے آئندہ بجٹ میں اس کی سفارشات کے لیے رقم کا انتظام کرے گا۔ کمیٹی کے چیئرمین نوین کمار نے کہا کہ سال 2015 میں سات عزائم (سات نشچے) کا آغاز کیا گیا تھا۔ دو عزائم کی کامیابی کے بعد گزشتہ سال سات عزائم-3 میں حکومت نے ’دگنا روزگار، دگنی آمدنی‘ کا ہدف مقرر کیا ہے۔ اسے حاصل کرنے کے لیے ضروری ہے کہ ریاست کی جی ڈی پی کی شرح 16 فیصد پر برقرار رہے۔
کمیٹی نے کہا کہ گزشتہ دو دہائیوں میں بہار نے تیزی سے ترقی کی ہے۔ بہار کی اوسط شرحِ ترقی 13.7 فیصد رہی ہے۔ 2022-23 میں بہار کی جی ڈی پی کی شرح 17.9 فیصد تک بھی پہنچ گئی تھی۔ اس لیے ضروری ہے کہ ریاست میں بڑی صنعتوں کو فروغ دیا جائے، ساتھ ہی چھوٹی صنعتوں کو بھی ترقی دی جائے۔ وزیر خزانہ کی سکریٹری رچنا پاٹل کی موجودگی میں کمیٹی نے کہا کہ کسی ایک شعبے پر توجہ مرکوز کرنے کے بجائے مجموعی طور پر متوازن انداز میں کام کرنا ہوگا۔
گزشتہ سال اس وقت کے وزیر اعلیٰ نتیش کمار نے سات عزائم-3 کا اعلان کیا تھا۔ اس میں دیے گئے ’دگنا روزگار، دگنی آمدنی‘ کے ہدف کو حاصل کرنے کے لیے بہار کے سابق چیف سکریٹری نوین کمار کی صدارت میں تین رکنی کمیٹی تشکیل دی گئی۔ جنوری 2026 میں تشکیل دی گئی اس کمیٹی میں وزارتِ شماریات کے سابق سکریٹری ٹی سی اے اننت اور آئی آئی ایم احمد آباد کے پروفیسر سنکیت مہاپاترا بھی شامل ہیں۔
نائب وزیر اعلیٰ بِجندر پرساد یادو نے کہا کہ سابق وزیر اعلیٰ نتیش کمار کی جانب سے تشکیل دی گئی اس کمیٹی کی رپورٹ پر حکومت عمل کرے گی۔ بجٹ میں اس کے لیے رقم کا انتظام کیا جائے گا۔ اعداد و شمار کی بنیاد پر تمام اضلاع کی نگرانی کی جائے گی۔ حکومت کی توجہ زراعت، آبی انتظام، بجلی اور مواصلات کے شعبوں پر مرکوز ہے۔انہوں نے کہا کہ سرمایہ کاری کو فروغ دینے کے لیے پالیسی تیار کی گئی ہے۔ کئی بڑے منصوبے آنے والے ہیں۔ اس سے ’دگنا روزگار، دگنی آمدنی‘ کا ہدف حاصل کرنے میں کامیابی ملے گی۔