نابالغ اغوا کیس میں فرار ملزم کے گھر اشتہار چسپاں، عدالت میں حاضر ہونے کی وارننگ

جالے :سمری تھانہ کے تحت درج نابالغ لڑکی اغوا معاملے میں پولیس نے فرار ملزم کے خلاف عدالت کے حکم پر بڑی کارروائی انجام دیتے ہوئے اس کے گھر پر اشتہار چسپاں کیا۔ اس دوران پولیس ٹیم ڈھول نگاڑوں اور مائیکنگ کے ساتھ ملزم کے گھر پہنچی اور عدالت کے حکم سے مقامی لوگوں کو آگاہ کیا۔
جانکاری کے مطابق سمری تھانہ مقدمہ نمبر 37/26 میں متاثرہ لڑکی کے والد نے گاؤں کے امت یادو سمیت دیگر افراد پر اپنی 14 سالہ بیٹی کو بہلا پھسلا کر اغوا کرنے کا الزام لگایا تھا۔ ایف آئی آر میں گھر سے نقدی، سونے کے زیورات، آدھار کارڈ اور دیگر ضروری دستاویزات لے جانے کی بات بھی کہی گئی ہے۔
پولیس مسلسل ملزم کی گرفتاری کے لیے چھاپہ ماری کر رہی تھی، تاہم ملزم فرار بتایا جا رہا ہے۔ عدالت سے اشتہار جاری ہونے کے بعد ضابطے کے مطابق اس کے گھر پر اشتہار چسپاں کیا گیا۔ اس موقع پر کیس کی تفتیشی افسر جیوتی کماری، دروغہ منوج کمار شرما اور دیگر پولیس اہلکار موجود تھے۔
پولیس حکام نے واضح کیا ہے کہ مقررہ مدت کے اندر عدالت میں حاضر نہ ہونے کی صورت میں ملزم کے خلاف قرقی ضبطی سمیت مزید قانونی کارروائی کی جائے گی۔