محبوب علی کی کوششوں سے سڑکوں کی تعمیر و توسیع کے 7 بڑے منصوبوں کو منظوری

امروہہ: رکن اسمبلی امروہہ صدر، سابق کابینی وزیر اور اتر پردیش لوک لیکھا سمیتی کے چیئرمین حاجی محبوب علی کی مسلسل کاوشوں کے نتیجے میں امروہہ اسمبلی حلقہ میں عوامی سہولیات کو بہتر بنانے کے لیے محکمہ تعمیرات عامہ (پی ڈبلیو ڈی) کی جانب سے سات اہم سڑکوں اور متعلقہ ترقیاتی منصوبوں کو منظوری دی گئی ہے۔ ان منصوبوں پر جلد عمل درآمد شروع ہونے کی توقع ہے، جس سے شہری اور دیہی علاقوں کے لاکھوں باشندوں کو آمدورفت میں آسانی حاصل ہوگی۔
جاری کردہ پریس نوٹ کے مطابق منظور شدہ منصوبوں میں نہٹور،نورپور، امروہہ،جویا (ایس ایچ،77) شاہراہ کو فور لین میں تبدیل کرنے اور اسے مزید مضبوط بنانے کا کام شامل ہے۔ اس کے علاوہ امروہہ شہر کے گنجان آباد حصے میں اسی شاہراہ کے کنارے انٹرلاکنگ ٹائلز اور نالوں کی تعمیر بھی کرائی جائے گی۔ اس کے علاوہ امروہہ کانٹھ بائی پاس (شہری روڈ) کے مختلف آباد علاقوں میں سی سی روڈ، نالیاں اور سڑک کی پٹریوں پر انٹرلاکنگ کا خصوصی تعمیراتی کام کیا جائے گا، جبکہ ایس ایچ،9 جویا تا اکوڑا روڈ پر بھی سی سی روڈ، نالوں اور انٹرلاکنگ ٹائلز کی تعمیر شامل ہے۔ منصوبوں میں نہٹور، نورپور، امروہہ ،جویا (ایس ایچ،77) سے گاؤں بھنکوا ہوتے ہوئے ایس ایچ،9 تک سڑک کی اونچائی بڑھانے اور چوڑا کرنے کا منصوبہ بھی شامل ہے۔ امروہہ،اتراسی،حسن پور روڈ کے کلو میٹر 26 پر واقع اوور برج پر کرش بیریئر (Crash Barrier) نصب کیا جائے گا تاکہ سڑک حادثات کی روک تھام میں مدد مل سکے۔ مالی کھیڑا روڈ کی خصوصی مرمت بھی منظور کی گئی ہے۔ بتایا گیا ہے کہ مذکورہ تمام سڑکیں طویل عرصے سے خستہ حالی کا شکار تھیں اور شہری و دیہی عوام مسلسل ان کی تعمیر و مرمت کا مطالبہ کر رہے تھے۔
حاجی محبوب علی نے کہا کہ امروہہ اسمبلی حلقہ میں بنیادی ڈھانچے کی مضبوطی ان کی اولین ترجیح ہے۔ انہوں نے کہا کہ بہتر سڑکیں کسی بھی علاقے کی ترقی کی بنیاد ہوتی ہیں اور ان منصوبوں کی تکمیل سے نہ صرف آمدورفت میں سہولت ہوگی بلکہ تجارتی سرگرمیوں کو بھی فروغ ملے گا۔ انہوں نے یقین دلایا کہ وہ آئندہ بھی عوامی مسائل کے حل اور حلقہ کی ہمہ جہت ترقی کے لیے پوری سنجیدگی کے ساتھ کوششیں جاری رکھیں گے۔