دیوبند: جزیرہ نما عرب کے جنوب مشرقی ساحل پر واقع اور خلیج فارس کے دہانے تک پھیلے ہوئے مغربی ایشیا کے سب سے بڑے ملک سلطنت عمان سے ایک سات رکنی وفد نے عمان کرکٹ لیگ فیڈریشن کے صدر سلطان محمد شعیب اور عمان کرکٹ ڈیف فیڈ ریشن کے جنرل سکریٹری محمد سلیمان سیف الہادی کی قیادت میں ام المدارس دارالعلوم دیوبند کا دورہ کیااور ادارہ کے مہتمم مولانا مفتی ابوالقاسم نعمانی بنارسی اور ادارہ کے دیگر اساتذہ سے ملاقات کی اور اسلامی فنون کے حوالے سے موصوف سے سیر حاصل گفتگو کرتے ہوئے بتایا کہ ملک ہندوستان کے ایک ڈیف کر کٹر محمد شہاب الدین کو حکومت عمان کی جانب سے ایک کروڑ روپے کا انعام دینے اور دار العلوم دیوبند کی زیارت کرنے کے مقصد سے وہ انڈیا آئے ہیں۔
اس دوران ذمہ داران نے مہمانان عظام کو دارالعلوم دیوبند کے نادر و نایاب کتب خانہ، تاریخی درسگاہ نودررہ، پرشکوہ دارالحدیث، مسجد رشید اور شیخ الہند لائبریری کی زیارت کرائی۔ اراکین وفد نے دیو بند کے قدیم کتب خانہ میں موجود تو رات، زبور، انجیل اور بادشاہ اورنگ زیب کا تحریر کردہ قرآن کریم اور دیگر نایاب و شاہکار مخطوطات کا باریکی سے معائنہ کیا اور اس علمی ذخیرہ کو دیکھ کر خوشی کا اظہار کیا۔ اس دوران اراکین وفد نے دارالعلوم کے ذمہ داران سے گفتگو کرتے ہوئے بتایا کہ عمان مسلکی تشدد کا قائل نہیں ہے ہم عالمی اخوت کے خواہاں ہیں۔
اس دوران ذمہ داران دار العلوم نے وفد کے سامنے دارالعلوم دیو بند کی تاریخ اور موجودہ احوال و کوائف تفصیل کے ساتھ بیان کئے۔ انہوں نے بتایا کہ دارالعلوم دیو بندان اسکالرس و محققین کو اپنے یہاں حتی المقدور سہولیات فراہم کرتا ہے، جو اسلامی علوم کے حصول کا جذبہ رکھتے ہیں۔ اس دوران دہلی میں واقع عمان کھرل ہاؤس کے کونسلر نے مترجم کے فرائض انجام دیئے۔ اراکین دفد میں آل انڈیا گرامین کرکٹ لیگ کی انچارج مہیما کپور اتر پردیش اسپورٹ ڈیولپمنٹ کونسل آف انڈیا کے چیئر مین سشیل چودھری، راجیو کمار ،سندیپ سنگھ ،گووند اگر وال ،سریندرسنگھ، راجیو چڈھاشامل تھے۔
اس موقع پر تر پور ماں بالا سندری دیوی کے صدر پنڈت ستندرشر ما ،صحافی حضرات سید و جاہت شاہ اور مولا نا مقیم الدین قاسمی سمیت ادارہ کے دیگر اساتذہ بھی موجود تھے۔ قبل ازیں اراکین وفد نے پنڈت ستندر شرما کی رہائش گاہ پر پہنچ کر ان سے ملاقات کی اور ہندو مسلم اتحاد کے موضوع پر گفتگو کی اس دوران معروف ادیب و قلم کار سید شاہ اور صحافی ڈاکٹر فیروز خان نے سلطان محمد شعیب اور محمد سلیمان سیف الہادی کو حضرت علامہ انور شاہ کشمیری کی عربی کی کتاب خاتم النبیین بطور تحفہ پیش کی جس پر مہمانان کرام نے ان کا شکر یہ ادا کیا۔ اس دوران سلطان محمد شعیب اور محمد سلیمان سیف الہادی نے دارالعلوم دیو بند کی مسجد رشید میں نماز جمعہ بھی ادا کی۔

دیوبند:میونسپل بورڈ دیوبند کی ملازمت سے سبکدوش ہونے والے 18؍ ملازمین کو جمعہ کے روز ایک کروڑ 4؍ لاکھ روپے کی بقایا رقومات کی ادائیگی کی گئی ۔یہ رقومات بذریعہ چیک ادا کی گئیں ۔سبکدوش ہونے والے ملازمین کے چہرے چیک ملنے کے بعد خوشی سے کھل اٹھے ۔دیوبند کے سرکاری گیسٹ ہائوس پر منعقد ہونے والے اس پروگرام میں پی ڈبلیو ڈی کے وزیر مملکت برجیش سنگھ نے ملازمین کے درمیان چیک تقسیم کئے ۔چیک وصول کرنے کے بعد ملازمین نے وزیر مملکت اور چیئرمین وپن گرگ کا شکریہ ادا کیا ۔
چیئرمین وپن گرگ نے بتایا کہ سبکدوش ہونے والے ملازمین کا فی عرصہ سے اپنے بقایاجات کی ادائیگی کا مطالبہ کرتے آرہے تھے ۔انہوں نے کہا کہ ملازمین ملنے والی اس رقم کو اپنے بچوں کے بہتر مستقبل کے لئے خرچ کر سکیں گے ،انہوں نے بتایا کہ میونسپل بورڈ دیوبند کی جانب سے اب تک سبکدوش ہونے والے ملازمین کو 4؍ کروڑ 4؍ لاکھ روپے کی رقومات دی جاچکی ہیں ۔انہوں نے کہا کہ مستقبل میں جو ملازمین سبکدوش ہوں گے ان سب کو بھی وقت پر رقومات کی ادائیگی کی جائے گی ۔
وپن گرگ نے بتایا کہ صفائی ملازمین کو پہلے 50؍ ہزار روپے کا چیک دیا جاتا تھا لیکن اب اس رقم میں اضافہ کرکے 3؍ لاکھ روپے کردیا گیا ۔اس موقعہ پر بی جے پی کے شہر صدر ارون گپتا ،راکیش گانگولی ،راہل والمیکی ،وپن بھارتیہ اور میونسپل رکن سید حارث وغیرہ موجود رہے ۔

(پی این این)
لکھنؤ: اتر پردیش کانگریس کی سیاسی امور کمیٹی کا اہم اجلاس جمعرات کو ریاستی کانگریس ہیڈکوارٹر، لکھنؤ میں ہوا۔ اجلاس میں 2027 کے اسمبلی انتخابات کی تیاری اور پارٹی تنظیم کو مضبوط بنانے پر تفصیل سے بات چیت کی گئی۔ اجلاس میں ریاستی انچارج راجیندر پال گوتم، ریاستی کانگریس صدر اجے رائے، قومی سیکریٹری دھیرج گجر، راجیش تیواری اور توقیر عالم سمیت کئی اہم رہنما موجود تھے۔
پارٹی ذرائع کے مطابق ضلع اور بوتھ سطح تک تنظیم کو مضبوط کرنے، عوامی مسائل پر احتجاجی مہم تیز کرنے اور انڈیا اتحاد میں سیٹوں کی تقسیم کے بارے میں ابتدائی بات چیت بھی ہوئی۔ ریاستی انچارج نے تمام رہنماؤں کو ہدایت دی کہ وہ عوام کے درمیان زیادہ سے زیادہ جائیں اور زمینی سطح پر اپنی سرگرمیاں بڑھائیں۔ 2027 کے اسمبلی انتخابات کو مدنظر رکھتے ہوئے کانگریس مسلسل اپنی کور کمیٹی کے اجلاس کر رہی ہے۔
اتر پردیش کانگریس کے صدر اجے رائے نے جمعرات کو کہا کہ ان کی پارٹی اب عوام سے جڑے مسائل کو لے کر سڑک سے لے کر ایوان (سدن) تک جدوجہد کرے گی اور پارٹی کا ہر کارکن لوگوں کے حقوق کی لڑائی لڑنے کے لیے میدان میں اترے گا۔
اتر پردیش کانگریس کمیٹی کی پولیٹیکل افیئرز کمیٹی (پی اے سی) کا ایک اہم اجلاس صوبائی ہیڈ کوارٹر میں منعقد ہوا۔ اجلاس کی صدارت صوبائی صدر اجے رائے نے کی، جبکہ اتر پردیش کے انچارج اور درج فہرست ذات (ایس سی) شعبہ کے قومی صدر راجیندر پال گوتم نے خصوصی طور پر شرکت کی۔ اس اجلاس میں ریاست کی موجودہ سیاسی صورتحال، تنظیم کو مضبوط بنانے اور 2027 کے اسمبلی انتخابات کی تیاریوں پر تفصیلی تبادلہ خیال کیا گیا۔اجلاس کے بعد میڈیا سے گفتگو کرتے ہوئے اجے رائے نے کہا کہ یہ محض ایک رسمی میٹنگ نہیں تھی، بلکہ ریاست میں عوام مخالف پالیسیوں کے خلاف عوامی تحریک کا بگل بجا دیا گیا ہے۔ انہوں نے زور دے کر کہا کہ کانگریس اب خاموش نہیں بیٹھے گی اور پارٹی کا ایک ایک کارکن عوام کے حقوق کے لیے آواز اٹھائے گا۔اس اجلاس میں قومی اور صوبائی سطح کے سینئر عہدیداروں، اراکینِ پارلیمان (ایم پیز)، اراکینِ اسمبلی (ایم ایل ایز) اور دیگر رہنماؤں نے حصہ لیا۔ تمام رہنماؤں نے بوتھ سطح تک پارٹی کو متحرک کرنے اور عوامی مسائل کو مؤثر طریقے سے اٹھانے کا عہد کیا۔رہنماؤں نے آنے والے دنوں میں ریاست بھر میں عوامی رابطہ مہم اور تحریکوں کو تیز کرنے پر اتفاق کیا۔ اجے رائے نے اپنے عزم کو دہراتے ہوئے کہا،’’کانگریس کا ایک ایک سپاہی اب سڑک پر اتر کر عوام کے حق کا حساب مانگے گا۔ تبدیلی اب طے ہے۔” انہوں نے اپنے خطاب کا اختتام “جے ہند، جے کانگریس” کے نعرے کے ساتھ کیا۔
پارٹی کی خاص توجہ دلت، پسماندہ طبقات اور اقلیتی ووٹروں کی حمایت حاصل کرنے پر ہے۔ اجلاس میں رکنِ پارلیمنٹ کے ایل شرما، تنوج پونیا اور اجول رمن سنگھ، سابق ریاستی صدر برج لال کھابری، رکنِ اسمبلی ویریندر چودھری، سابق رکنِ پارلیمنٹ دانش علی، سابق ایم ایل سی دیپک سنگھ اور وویک بنسل بھی شریک ہوئے۔

اس کے علاوہ سابق رکنِ اسمبلی سنجے کپور، بھگوتی چودھری، سابق وزیر نکُل دوبے، ممتا چودھری، شہلا اہراری، ڈاکٹر پرمود پانڈے، کرشمہ کپور اور کمیٹی کے دیگر رہنما بھی اجلاس میں موجود تھے۔