چھپرا:بہار حکومت کی اختراعی پہل سہیوگ شیویر کے تحت ضلع کے کل 40 پنچایتیوں میں کیمپ کا کامیابی سے انعقاد کیا گیا۔اس موقع پر نائب وزیر اعلیٰ اور سارن کے انچارج وزیر بیجندر پرساد یادو مہمان خصوصی کے طور پر ضلع کی تین مختلف پنچایتوں میں منعقدہ سہیوگ شیوروں میں شریک ہوئے۔انہوں نے بالترتیب سونپور بلاک کے نیاگاؤں پنچایت،دگھوارا کے آمی پنچایت اور رکھا کے فیروسا پنچایت میں منعقد کیمپوں میں حصہ لیا اور عوام سے بات چیت کی۔
اپنے خطاب میں نائب وزیر اعلیٰ نے کہا کہ بہار حکومت پنچایت سطح پر سہیوگ شیور کا انعقاد کر رہی ہے تاکہ عام شہریوں کو ان کے مسائل کو حل کرنے کے لیے دفاتر کے چکر لگانے کی پریشانی سے نجات مل سکے۔انہوں نے کہا کہ کیمپوں میں موصول ہونے والی شکایات اور درخواستوں پر مقررہ مدت میں کارروائی کو یقینی بنایا جائے گا۔انہوں نے واضح کیا کہ کارروائی کے لیے 30 دن کی ڈیڈ لائن مقرر کی گئی ہے۔مقررہ مدت میں ریزولوشن مکمل کیا جائے گا۔جو اہلکار یا افسر ڈیڈ لائن پر عمل نہیں کریں گے ان کے خلاف قواعد کے مطابق کارروائی کی جائے گی۔
انہوں نے کہا کہ سب کا سمان،زندگی آسان کے تحت ریاستی حکومت کے سات نشچئے-3 کا ایک اہم جزو کے تحت حکومت عام لوگوں کے مسائل کو حل کرنے کے لیے براہ راست پنچایت سطح تک پہنچ رہی ہے۔انہوں نے ضلع کے باشندوں سے اپیل کی کہ وہ سہیوگ شیویر کے ذریعے اپنے مسائل اور شکایات درج کر کے اس اہم اقدام کا فائدہ اٹھائیں۔
ڈپٹی سی ایم نے کہا کہ سہیوگ کیمپ میں درخواستیں جمع کرانے کے علاوہ شہری اپنی شکایات اور درخواستیں سہیوگ پورٹل کے ذریعے آن لائن بھی جمع کر سکتے ہیں۔ریاستی حکومت نے اس مقصد کے لیے sahyog.bihar.gov.in پورٹل تیار کیا ہے۔جہاں درخواست کی صورتحال پر بھی نظر رکھی جا سکتی ہے۔
کیمپ کے دوران پہلے موصول ہونے والی اور پراسیس شدہ درخواستوں کے مستفیدین کو رقم،برتھ سرٹیفکیٹ،راشن کارڈ،معذوری سرٹیفکیٹس اور بیت الخلا تعمیر کے مراعات تقسیم کئے۔کیمپ میں مختلف محکموں کے افسران اور عملے نے عوام سے شکایات اور درخواستیں موصول کیں اور بہت سے مسائل کو موقع پر ہی حل کیا گیا۔اس موقع پر ڈی ایم ویبھو سریواستو،ایس ایس پی ونیت کمار،متعلقہ بلاکس کے عہدیدار ، عوامی نمائندے اور بڑی تعداد میں مقامی لوگ موجود تھے۔

(پی این این)
ارریہ:ضلع میں ایل پی جی گیس کی دستیابی اور صارفین کو اس کی بآسانی فراہمی کو یقینی بنانے کے لیے پانچ گیس ایجنسیوں کا معائنہ کیا گیا۔ چھاپے کے دوران تمام گیس ایجنسیوں کے پاس گھریلو گیس سلنڈروں کا وافر ذخیرہ پایا گیا اور گیس کی کوئی قلت نہیں پائی گئی۔
ضلع میں ایل پی جی کی سپلائی معمول پر ہے، روزانہ اوسطاً 6,406 گیس سلنڈر فراہم کیے جاتے ہیں۔ تمام ایجنسیوں کے آپریٹرز کو ہدایت کی گئی ہے کہ وہ صارفین کو بروقت گیس کی فراہمی کو یقینی بنائیں اور اس بات کو یقینی بنائیں کہ تقسیم کے عمل میں کوئی بے ضابطگی نہ ہو۔ گیس سے متعلق شکایات کے فوری حل کے لیے ڈسٹرکٹ کنٹرول روم بھی مسلسل کام کر رہا ہے۔
17 مارچ 2026 سے 2 جون 2026 تک ڈسٹرکٹ کنٹرول روم (ٹیلی فون نمبر06453- 222309) پر کل 549 شکایات موصول ہوئیں جن میں سے 533 شکایات کو کامیابی کے ساتھ حل کیا گیا جبکہ باقی 16 زیر التوا شکایات کو متعلقہ گیس ایجنسیوں کے ایریا منیجرز کو بھجوا دیا گیا۔ ضلعی انتظامیہ نے صارفین سے اپیل کی ہے کہ گیس کی تقسیم سے متعلق کسی بھی مسئلے کی اطلاع ضلعی کنٹرول روم کو دیں، تاکہ فوری کارروائی کو یقینی بنایا جا سکے۔

(پی این این)
موتیہاری:بہار کے دیہی ترقی اور محکمہ اطلاعات و تعلقات عامہ کے وزیر اور مشرقی چمپارن کے انچارج وزیر شرون کمار نے پیر کے روز ایک اہم اجلاس کے دوران کہا ہے کہ ضلع میں ترقیاتی کاموں کی رفتار کو تیز کرنا حکومت کی اولین ترجیح ہے۔
انہوں نے یہ بات ضلع کی سطح پر پروگرام امپلی منٹیشن کمیٹی (20 نکاتی کمیٹی) کے اعلیٰ سطحی اجلاس کی صدارت کرتے ہوئے کہی۔ انچارج وزیر شرون کمار نے اجلاس میں موجود افسران کو گاندھی جی سے جڑی تاریخی و ثقافتی وراثت کو محفوظ کرنے کے حوالے سے ہدایات دیں ہین جن میں کہا گیا ہے کہ ضلع میں مہاتما گاندھی کی زندگی اور تحریک سے وابستہ تمام تاریخی مقامات کی نشان دہی کی جائے۔ ان مقامات کی مجموعی ترقی کے لیے ایک تفصیلی اور جامع تجویز تیار کی جائے۔
انہوں نے یاد دلایا کہ چمپارن گاندھی جی کی’کرم بھومی‘ (کام کرنے کی جگہ) رہی ہے، اس لیے ان تاریخی مقامات کا تحفظ سیاحت اور ثقافتی نقطہ نظر سے انتہائی اہمیت کا حامل ہے۔
عوامی سہولیات کو نچلی سطح تک پہنچانے کے لیے وزیر موصوف نے سخت موقف اختیار کرتے ہوئے ہدایت دی کہ”ضلع میں تعمیر شدہ تمام’پنچایت سرکار بھونوں‘ کو فوری طور پر محکمے کے سپرد کیا جائے اور ایک ہفتے کے اندر ان عمارتوں میں عوام کی سہولت سے جڑے تمام سرکاری کام کاج باقاعدہ طور پر شروع کیے جائیں۔