(پی این این )
چھپرہ:چھپرہ ضلع کے مانجھی نگر پنچایت کے بلاک روڈ پر واقع حضرت جلال شاہ کے مزار پر سالانہ عرس کا اہتمام بڑے دھوم دھام سے کیا گیا۔اس موقع پر صبح سے ہی عقیدت مندوں کا ہجوم چادر پوشی کے لیے جمع ہوگیا جو رات گئے تک جاری رہا۔عرس کے موقع پر عقیدت مندوں نے مزار پر چادر پوشی کر امن،خوشحالی اور ترقی کی دعا کی۔
اس موقع پر انعقاد کمیٹی کے ذریعے مزار کے احاطے کو پرکشش انداز میں سجایا گیا تھا۔پورا احاطہ رنگ برنگی روشنیوں سے جگمگا رہا تھا اور منظر ایک میلے کا سا تھا۔تقریب کے حوالے سے علاقے میں گہما گہمی اور جوش کا ماحول تھا۔جے ڈی یو بلاک صدر کم 20 نکاتی کمیٹی صدر اختر علی نے کہا کہ یہ عرس ہر سال یکم جون کو منعقد کیا جاتا ہے۔مسلمانوں کے ساتھ ساتھ ہندو عقیدت مندوں کی بڑی تعداد بھی یہاں پہنچ کر نیک تمنائیں پیش کرتی ہے۔عقیدت مندوں نے مزار پر حاضری پیش کر بھائی چارے کا پیغام دیا اور ملک اور معاشرے میں امن کے لیے دعا کی۔انتظامیہ نے عرس کے موقع پر سکیورٹی کے سخت انتظامات کیے تھے۔پولیس کی مناسب نفری تعینات کی گئی اور مزار پر آنے والوں کی سہولیات کا پورا خیال رکھا گیا۔
