(پی این این)
دربھنگہ: محمد رفیع ساگر /کمتول تھانہ کے رتن پور گاؤں میں نوجوان آدتیہ مادھو بھاردواج عرف سَتیم کا گولی مار کر قتل کیے جانے کے معاملے میں کمتول پولیس نے 2 نامزد ملزمان کو گرفتار کرلیا ہے۔ گرفتار ملزمان کی شناخت رتن پور سکھرام پور ٹولہ کے رام ناتھ مہتو اور مدھوبنی ضلع کے بسفی تھانہ علاقہ کے دودھیل گاؤں کے رہنے والے سَتیم جھا کے طور پر ہوئی ہے۔ دونوں کو عدالتی تحویل میں مجسٹریٹ کے سامنے پیش کرنے کے لیے بھیج دیا گیا ہے۔
صدر-2 کمتول کے ایس ڈی پی او شوبھندر کمار سمن نے جمعرات کو تھانہ احاطے میں منعقدہ پریس کانفرنس میں بتایا کہ اس معاملے میں کمتول تھانہ کیس نمبر 218/26 درج کرکے تفتیش کی جارہی ہے۔ تفتیش کے دوران حاصل شواہد کی بنیاد پر دونوں ملزمان کو گرفتار کیا گیا۔ پولیس کے مطابق، پوچھ گچھ کے دوران دونوں نے واردات میں اپنے ملوث ہونے کا اعتراف کیا ہے۔
پولیس کی ابتدائی تفتیش میں قتل کے پس پشت غیر قانونی شراب کے کاروبار اور رقم کے لین دین سے متعلق تنازع سامنے آیا ہے۔ پولیس نے واردات میں استعمال موٹر سائیکل اور خون آلود شرٹ بھی برآمد کرنے کا دعویٰ کیا ہے۔
مقتول کے والد سنجیو کمار ٹھاکر نے ایف آئی آر میں بتایا ہے کہ 18 اگست کی شام رام ناتھ مہتو ان کے گھر آیا اور سَتیم کو کدم چوک جانے کی بات کہہ کر موٹر سائیکل پر اپنے ساتھ لے گیا۔ رات میں فون کرنے پر سَتیم نے بتایا کہ وہ رام ناتھ کے ساتھ ملک پور آیا ہوا ہے۔ تقریباً 9 بج کر 45 منٹ پر گاؤں کے چوکیدار نے فون کرکے اطلاع دی کہ رتن پور-کلواڑہ سڑک پر سَتیم کو گولی مار دی گئی ہے۔ اہل خانہ موقع پر پہنچے تو سَتیم مردہ حالت میں پڑا تھا۔
مقتول کے والد نے ایف آئی آر میں یہ بھی الزام عائد کیا ہے کہ اس سے قبل بھی ان کے بیٹے کا اغوا، جان سے مارنے کی کوشش اور دھمکی دینے کے واقعات پیش آچکے تھے۔ اس معاملے میں مجموعی طور پر 9 افراد کو نامزد کیا گیا ہے۔ایس ڈی پی او نے بتایا کہ معاملے میں ملوث دیگر ملزمان کی گرفتاری کے لیے پولیس کی کارروائی مسلسل جاری ہے۔ پولیس تفتیش کے دوران سامنے آنے والے دیگر حقائق کی بنیاد پر مزید کارروائی کرے گی۔

(پی این این)
پٹنہ:بہار کے تعلیمی اداروں میں ہر ماہ کے چوتھے منگل کو تعاون کیمپ منعقد کیے جائیں گے، جہاں طلبہ براہِ راست اپنی شکایات، مسائل اور تجاویز پیش کر سکیں گے۔ اس سلسلے کا آغاز 25 اگست سے بہار کے تمام اسکولوں اور طلبہ کے ہاسٹلوں میں ہوگا۔ وزیرِ اعلیٰ سمراٹ چودھری نے کل جے ڈی ویمنز کالج کے آڈیٹوریم میں منعقدہ ایک پروگرام کے دوران اس کا اعلان کیا۔اس موقع پر وزیرِ اعلیٰ نے ’ودیارتی تعاون پورٹل‘ کا افتتاح کیا۔
وزیرِ اعلیٰ نے کہا کہ طلبہ کے مسائل کا مقررہ وقت کے اندر حل یقینی بنانے کے لیے یہ پورٹل شروع کیا گیا ہے۔ اس کا مقصد طلبہ و طالبات کے تعلیمی، ہاسٹل سے متعلق اور دیگر مسائل کے ساتھ ساتھ ان کی تجاویز کا بھی فوری ازالہ کرنا ہے۔ یہ سہولت مکمل طور پر مفت ہوگی اور اس کے ذریعے طلبہ کی شناخت کو خفیہ رکھا جائے گا۔
تعاون کیمپ سے متعلق معلومات کے لیے ہیلپ لائن نمبر 1100 دستیاب ہوگا۔ طلبہ کی شکایات پر 10 دن کے اندر کارروائی شروع نہ ہونے کی صورت میں 11ویں دن وزیرِ اعلیٰ کے دفتر کی جانب سے ازخود نوٹس جاری کیا جائے گا اور زیادہ سے زیادہ 30 دن کے اندر ہر حال میں مسئلے کا حل یقینی بنایا جائے گا۔
وزیرِ اعلیٰ نے پٹنہ کے جے ڈی ویمنز کالج میں موجود طالبات سے بات چیت کی اور تعلیمی سرگرمیوں اور ان کے مسائل کے بارے میں معلومات حاصل کیں۔ وزیرِ اعلیٰ نے کہا کہ بہار میں تعلیمی نظام کو مزید جدید، شفاف، جواب دہ اور طلبہ مرکوز بنانے کی سمت میں مسلسل کام کیا جا رہا ہے۔
سمراٹ چودھری نے 15 اگست کو گاندھی میدان میں پرچم کشائی کے بعد اپنی تقریر میں اس کا اعلان کیا تھا۔ انہوں نے کہا تھا کہ تعلیم کے معیار کو بہتر بنانے کے لیے حکومت طلبہ و طالبات سے براہِ راست بات چیت کرے گی۔ ان کی باتیں سننے اور ان کے مسائل کو سمجھنے کے لیے ہر ماہ تعاون کیمپ کا انعقاد کیا جائے گا۔اس کے علاوہ ’ودیارتی تعاون پورٹل‘ قائم کیا جائے گا، جس کے ذریعے طلبہ اپنے مسائل سے حکومت کو آگاہ کر سکیں گے۔ تعاون پورٹل پر درج کی جانے والی شکایات کا ازالہ ایک ماہ کے اندر یقینی بنایا جائے گا۔
وزیرِ اعلیٰ کی اس پہل سے طلبہ و طالبات میں خاصا جوش و خروش پایا جا رہا ہے۔ کئی مرتبہ محکمہ کی سست روی کے باعث میٹرک اور انٹر کے امتحانات میں ہونے والی غلطیوں کی اصلاح کرانے کے لیے طلبہ کو کافی مشکلات کا سامنا کرنا پڑتا ہے۔ طالبات نے حکومت کے اس فیصلے کا بھی خیرمقدم کیا ہے، جس کے تحت ان کے اسکول اور کالج کے قریب ’پولیس دیدی‘ تعینات کی جائیں گی۔
وزیرِ اعلیٰ کی ہدایت پر ایسا نظام وضع کیا جا رہا ہے، جس کے تحت خواتین پولیس اہلکار اور افسران سادہ لباس میں حساس مقامات پر نظر رکھیں گے۔ اس کی شروعات رکشا بندھن کے دن سے کی جائے گی۔ تمام اضلاع میں اس سلسلے میں ضروری تیاریاں کی جا رہی ہیں۔

(پی این این)
سیتامڑھی:مہسول اور آس پاس کے طلبہ کے لیے منگل کا دن بڑی خوشخبری لے کر آیا۔ سال 2004 سے زیر التوا 100 بستروں والے اقلیتی ہاسٹل کی تعمیر کا عمل آخرکار زمین پر اتر گیا۔ مہسول مشرقی، میونسپل کارپوریشن وارڈ نمبر 28 میں تقریباً ساڑھے 8 کروڑ روپے کی تخمینہ سے مجوزہ ہاسٹل کی تعمیر کے لیے منگل کو زمین کی پیمائش، حد بندی اور لے آؤٹ کا کام شروع کیا گیا۔ موقع پر پہنچیں اسسٹنٹ ڈائریکٹر، اقلیتی بہبود ڈاکٹر سونیتا سونو نے تعمیراتی مقام کا معائنہ کیا اور تعمیر سے متعلق تیاریوں کا جائزہ لیا۔
انہوں نے بتایا کہ ہاسٹل کی تعمیر کے سلسلے میں ضروری انتظامی کارروائی مکمل کرلی گئی ہے اور تعمیراتی عمل شروع کردیا گیا ہے۔ اقلیتی ہاسٹل کا یہ منصوبہ سال 2004 سے زیر التوا تھا۔ تقریباً 18 برسوں تک مختلف سطحوں پر جاری کارروائی کے بعد تعمیر شروع ہونے سے مقامی لوگوں اور طلبہ میں خوشی کی لہر دوڑ گئی ہے۔ 100 بستروں پر مشتمل یہ ہاسٹل دور دراز علاقوں سے آکر تعلیم حاصل کرنے والے اقلیتی طلبہ کے لیے اہم رہائشی سہولت ثابت ہوگا۔ ہاسٹل کی تعمیر سے طلبہ کو رہائش کے ساتھ تعلیم کے لیے بہتر اور سازگار ماحول بھی میسر ہوگا۔ مقامی لوگوں کا کہنا ہے کہ اس سے علاقے میں تعلیم کو فروغ ملے گا اور ضرورت مند طلبہ کو بڑی سہولت حاصل ہوگی۔ رحمانیہ یوتھ ایکتا کمیٹی، مہسول کے ضلعی صدر محمد ارمان علی نے تعمیراتی کام شروع ہونے پر خوشی کا اظہار کرتے ہوئے ضلع انتظامیہ، سیتامڑھی اور اقلیتی بہبود محکمہ کا شکریہ ادا کیا۔ انہوں نے کہا کہ برسوں سے زیر التوا اہم مطالبہ اب پورا ہونے جا رہا ہے۔
ہاسٹل کی تعمیر سے دور دراز علاقوں سے تعلیم حاصل کرنے آنے والے طلبہ کو رہائش کی سہولت ملے گی اور ان کی تعلیم کے لیے بہتر ماحول فراہم ہوگا۔ تقریباً ساڑھے 8 کروڑ روپے کی لاگت سے تعمیر ہونے والا 100 بستروں کا ہاسٹل مہسول کی ترقی اور تعلیمی ماحول کے لیے ایک اہم قدم ثابت ہوگا۔ مقامی لوگوں نے تعمیراتی کام شروع ہونے کو برسوں پرانی امید کی تکمیل کی جانب بڑی پیش رفت قرار دیا۔ لوگوں نے امید ظاہر کی کہ ہاسٹل کی تعمیر معیاری طریقے سے مقررہ مدت کے اندر مکمل کی جائے گی، تاکہ طلبہ کو جلد از جلد اس کا فائدہ مل سکے۔حد بندی اور لے آؤٹ کے دوران رحمانیہ یوتھ ایکتا کمیٹی کے ضلع صدر محمد ارمان علی، اقلیتی ایکتا منچ کے ضلع صدر محمد مرتضیٰ، شیخ محمد ضیاء الرحمٰن، محمد گلاب، محمد علیم عرف آرزو، محمد مظہر علی راجا، انجینئر توقیر انور عرف سکندر، محمد افروز عالم، محمد قمر اختر، محمد عامر مختار عرف آرزو، وارڈ کونسلر محمد عطا اللہ رحمانی سمیت دیگر افراد موجود رہے۔