(پی این این)
پھلواری شریف:پٹنہ کے مشہور گاندھی میدان میں وقف ایکٹ کے خلاف29 ؍جون کو منعقد وقف بچاؤدستوربچاؤکانفرنس کے پر امن طریقے پر کامیاب بنانے والوں میں شہر پٹنہ کے ائمہ مساجد اور صدوروسکریٹری کاشکریہ اداکرتے ہوئے امارت شرعیہ بہار،اڈیشہ وجھارکھنڈ کے امیرشریعت مولانا احمدولی فیصل رحمانی نےکہا کہ آپ حضرات نے جس اخلاص وللہیت کے جذبے سے جو محنتیں کی وہ قابل مبارکباد ہے درحقیقت آپ نے قائدانہ رول اداکیا ،مقتدیوں کے دروازوں تک دستک دے کر ایک مثال قائم کی ،دوسری طرف اپنے مہمانوں کے لئے مسجد اور گھر کے گیٹ کوکھول دیئے اور عمدہ ضیافت کرکے دل جیت لیامیں اس کیلئے بھی آپ کاشکر یہ اداکرتاہوں ۔
انہوں نے کہاکہ مجمع بڑا تھا ہم لوگوں نے ممکن حد تک کوشش کی کہ آپ کو یاکسی کوتکلیف نہ پہونچے تاہم اگر کچھ کمی رہ گئی ہوتو اسے درگزر فرمائیں ،آخر میں انہوں نے کہاکہ ہرپیر وجمعرات کوروزہ رکھنے اور اجتماعی طور پر افطار کانظم کرنے کی ترغیب دی اور جمعہ کو کالی پٹی باندھ کرمسجد آنے کی دعوت دی،اس موقع حضرت نے ووٹر آئی ڈی کارڈ بنوانے اور الیکشن کمیشن کے ذریعہ ووٹر لسٹ میں اپنے ناموں کے اندراج کویقینی بنانے پرزور دیااور اسی سلسلہ میںجمعہ کے خطابت میں اس کو موضوع سخن بنانے کی تاکید کی ۔
امارت شرعیہ بہار،اڈیشہ وجھارکھنڈ کے قائم مقام ناظم مفتی محمد سعیدالرحمن قاسمی نے ائمہ کرام اور مساجد کے ذمہ داران کا شکریہ اداکرتے ہوئے کہاکہ بسااوقات شرسے خیر کے پہلو بھی عیاںہوجاتے ہیں ،حکومت ھند نے وقف کے قانون میں چھیڑ چھاڑ کرہم سب کو ایک پلیٹ فارم پر متحدکردیاجس کے نتیجہ میں وقف بچاؤ کانفرنس نے ایوانوں تک میں زلزلہ پیداکردیاہے یہ سب آپ کے اتحاد کی قوت اور امارت شرعیہ کی قیادت پر اعتماد کانتیجہ ہے انہوں نے ائمہ کرام سے کہاکہ جس طر ح آپ ماضی میں حضرت امیرشریعت کی قیادت میں متحد ومنظم رہے اس ملی اتحاد کوقائم رکھیں۔
مفتی محمد سہراب ندوی نائب ناظم نے کہا کہ یہ کانفرنس تاریخ ساز رہی اور اس نے ایک تاریخ رقم کی ہے ،چنانچہ ائمہ کرام نے امارت شرعیہ پربھرپوراعتماد کااظہار کیاجامع مسجد پیر بہوڑکے امام وخطیب مولانامحمد ثناء اللہ ندوی نے کہاکہ امارت سے جداہوکرکوئی الگ نہیں رہ سکتاہم لوگوں کے لئے ماں کی حیثیت رکھتی ہے جس کے چھاؤں میں بچہ سکون محسوس کرتاہے اس موقع پر انہوں نے ووٹر لسٹ کے معاملہ میں امارت شرعیہ سے رہنمااصول وضع کرنے کی گزارش کی ،پھلواری شریف سنگی مسجد کے امام وخطیب مولاناگوہر امام نے کہاکہ وقف کانفرنس کے موقع پر ہم لوگوں کوخدمت کاموقع ملاان شاء اللہ امارت شرعیہ کی ہدایت پرآئندہ بھی تیاررہیں گے،مولاناعظیم الدین رحمانی کولڈ اسٹور مسجد راجابازار نے کہاکہ اس کانفرنس کے ذریعہ عوامی بیداری آئی ہے حتی کہ خواتین بھی دعاؤوں میںمصروف رہیں،حافظ محمد امتیاز احمدرحمانی مونگیر نے کہاجس طرح پٹنہ کے ائمہ کرام کے لئے تہنیتی نشست طلب کی گئی ہے اضلاع کی سطح پر بھی ایسی نشست رکھی جائے ، مجاہد حسین حبیبی نے کہاکہ وقف کانفرنس کا پیغام پوری دنیامیں پہنچا ان شاء اللہ اس کے مثبت اثرات ظاہر ہوں گے ،جامع مسجد پٹنہ جنکشن کے امام وخطیب مولانامحمد اسعدقاسمی نے کہا کہ باطل طاقتوں کے خلاف صف آرا ہونے کاموقع ملا ہم سب اس کے خلاف جدوجہدکرتے رہیں گے،قاری عبدالستار امام وخطیب جامع مسجد تبار ک علی باقرگنج نے کہاکہ اس کانفرنس سے ایک نئی توانائی پیداہوئی ہے۔
مولانا شاہد ندوی نے کہاکہ اس کانفرنس سے نواجوانوںمیں ایک اچھاپیغام گیاہے، مولانامحمدوسیم الدین نے کہاکہ کانفرنس کی اسپریٹ کو تسلسل کے ساتھ باقی رکھاجائے،مولانامحمد اشرف خان نے کہاکہ یہ کانفرنس امیدسے زیادہ کامیاب رہی،اس سلسلہ کو مولاناپرویزرحمانی ،مولاناخالد ندوی ، مولاناازہرالدین پالی گنج،مولانامحمدکلیم ،مولانامحمد اشتیاق رحمانی،مولانارضوان احمد مظاہری،اسحاق ، حاجی جمال عبد الناصر ، عبدالاحد ،محمد محیط ، محمد شوکت نے بھی اپنے خیالات کااظہارکیا،واضح ہوکہ اس موقع پر امارت شرعیہ قائم مقام ناظم اور دارالافتاء کے صدر مفتی مولانامفتی محمد سعیدالرحمن قاسمی کی مرتب کردہ کتاب فتاویٰ امارت شرعیہ جلدششم کی رونمائی حضرت امیرشریعت کے مبارک ہاتھوں ہوئی ،قاضی شریعت مولانا محمدانظار عالم قاسمی،مولانامفتی محمد ثناء الہدیٰ قاسمی ،مفتی سہیل اختر قاسمی،مولانارضوان احمدندوی سمیت امارت شرعیہ کے جملہ ذمہ داران وکارکنان اور ائمہ کرام نے اس کتاب کی اشاعت پر مفتی صاحب کو مبارکبادی مجلس کی کارروائی امارت شرعیہ کے نائب ناظم مفتی محمدسہراب ندوی نے عمدہ طریقے سے چلائی اس تہنیتی نشست کا آغازقاری مفتی محمد مجیب الرحمن قاسمی کی تلاوت کلام اللہ سے ہوااور حضرت امیرشریعت کی دعاپر مجلس اختتام پذیرہوئی۔

(پی این این)
پھلواری شریف: امارت شرعیہ بہار ،اڈیشہ ،جھارکھنڈ ومغربی بنگال کے قائم مقام ناظم مولانا مفتی محمد سعید الرحمن قاسمی نے وقف بچاؤ دستور بچاؤ کانفرنس منعقدہ گاندھی میدان کی تاریخ ساز کامیابی پر بہار کی ملی تنظیموں کے ذمہ داران ،خانقاہوں کے سجادگان ،مساجد کے ائمہ کرام ،علماء،دانشوران ،اہل مدارس نقباء امارت شرعیہ کے ذمہ داران ،امارت شرعیہ کے محبین ومخلصین اور ملت سے ہمدردی رکھنے والے تمام اصحاب فکر و نظر کو دلی مبارک باد پیش کرتے ہوئے کہا کہ آپ تمام حضرات کی جہد مسلسل نے اس کانفرنس کو ایک تاریخی اور یاد گار کانفرنس بنادیا ،بلاشبہ یہ کانفرنس حسب توقع پوری طرح کامیاب رہی ،بہار ،اڈیشہ ،جھارکھنڈ و مغربی بنگال کے علاوہ ملک بھرکے مسلمانوں نے پورے جوش اورجذبہ سے اس میں حصہ لیا اور ہندستان میں مسلمانوں کے آئینی حقوق کے حصول کی جدوجہد میں ایک روشن باب کااضافہ کیا ،اس کانفرنس سے ملت کے اندر خود اعتمادی او رایک نیا عزم و حوصلہ پیدا ہو ا ،اسلئے اللہ سے ہماری دعاء ہے کہ اللہ رب العزت ناپاک منصوبہ بنانے والوں کے عزائم کو چکنا چور کردے اور ملت کی ہر طرح حفاظت فرمائے ،باشندگان پٹنہ کابھی شکریہ کہ انہوں نے مہمانوں کی ضیافت کا حق ادا کیا اور مثال تاریخ رقم کردی۔
قائم مقام ناظم نے کہا کہ اس کانفرنس میں دور دراز کی مسافت طے کرنے والے فرزندان توحید بھی شکریہ کے مستحق ہیں جنہوں نے اپنے وطن کی پر سکون زندگی کو خیر باد کہہ کر محض اللہ کی رضا ء کے لئے شدت کی ڈھوپ میں گاندھی میدان میں جمع ہوئے اور ملی قائدین کے پر مغز خطابات سے استفادہ کیا ،اب ضرورت متقاضی ہےکہ ہم سب بیدار رہیں اور تحفظ اوقاف کے لئے کی جانے والی تحریکات میں شانہ نشانہ چلیں اور اس وقت تک متحرک رہیں جب تک حکومت اس کالے قانون کو واپس نہیں لے لیتی ۔
امارت شرعیہ کے تمام ذمہ داران ،کارکنان،تنظیم امارت شرعیہ کے ذمہ داران و نقباء وائمہ مساجدکاشکریہ اداکرتاہوں ،نیزشہر پٹنہ کے دینی حمیت رکھنے والے مسلمانوں کابھی شکریہ اداکرتاہوں کہ بہار،اڈیشہ ،جھارکھنڈ ومغربی بنگال اور ملک کے گوشہ گوشہ سے تشریف لانے والوں کی ضیافت میں اپنے دل کے دروازے کھول دئے اسی طرح تما م معاونین و رضاکار ان،دارالعلوم الاسلامیہ،المعہدالعالی جامعہ رحمانی مونگیر،رحمانی تھرٹی اور امارت ایجوکیشنل اینڈ ویلفیئر ٹرسٹ کے اساتذہ وطلبہ، مولاناسجاد ھاسپیٹل کے تمام حضرات ،خصوصاًاجلاس کے کنوینر مولانااحمد حسین قاسمی معاون ناظم امارت شرعیہ بھی ہمارے شکریے کے مستحق ہیں کہ ان حضرات کی کدوکاوش سے یہ عظیم الشان کامیاب کانفرنس منعقد ہوئی،اللہ تعالیٰ آپ سب کو بہتر سے بہتر اجر عطافرمائے ۔

(پی این این)
پٹنہ: امارت شرعیہ، بہار، اڈیشہ ، جھارکھنڈ و مغربی بنگال کے زیر اہتمام، امیر شریعت مولانا احمد ولی فیصل رحمانی کی قیادت میں ’’وقف بچاؤ، دستور بچاؤ‘‘ کے تاریخی اور پُرامن عوامی اجتماع میں 10 لاکھ سے زائد وقف و دستور کے بہادر محافظین نے شرکت کرکے یہ ثابت کر دیا کہ امتِ مسلمہ اپنے دین، اوقاف، اور آئینی حقوق کے تحفظ کے لیے بیدار اور پُرعزم ہے۔
یہ اجتماع صرف احتجاج نہیں بلکہ ایک اجتماعی بیداری کا مظہر تھا، جس میں دیہی و شہری علاقوں سے دس لاکھ سے زائد انسانوں کا سمندر امن و وقار کے ساتھ پٹنہ پہنچا۔امیر شریعت نے تمام شرکاء، منتظمین، ملی تنظیمیں، علماء ، قائدین، نوجوان رضاکاروں، ڈاکٹروں، میزبان شہریوں، اور انتظامیہ کا دل کی گہرائیوں سے شکریہ ادا کرتے ہوئے فرمایا:امارت شرعیہ کے تمام ذمہ داران قضاۃ مفتیان مبلغین و کارکنان ، امارت شرعیہ کے تمام ٹرسٹیز مجلس عاملہ مجلس شوری ،ارباب حل و عقد، نقباء ، امارت شرعیہ کی تنظیموں کے ذمہ داران و ممبران ،تحفظ اوقاف و کانفرنس کی کمیٹیوں، مساجد کے ائمہ، صدور و سیکریٹریز، متعدد تعلیمی اداروں کے ذمہ داران اور رضاکاروں کا خصوصی شکریہ جنہوں نے گاؤں گاؤں، کوچہ کوچہ عوام کو بیدار کیا،رات دن محنت کی اور مثالی نظم و ضبط کا مظاہرہ کیا۔
تمام ملی تنظیمات کی قیادت و کارکنان ، خانقاہوں اور تعلیمی اداروں کا شکریہ جنہوں نے متحد ہو کر اتحادِ ملت کا مظاہرہ کیا، جن میں خصوصاً:آل انڈیا مسلم پرسنل لا بورڈ ،جمعیت علماء( الف )، جمعیت علماء (م)،جماعتِ اسلامی ، جمعیت اہل حدیث ، مجلس علماء خطباء امامیہ اہل تشیع ، آل انڈیا مومن کانفرنس ، مسلم مجلس مشاورت ، خانقاہ رحمانی مونگیر ، خانقاہ فردوسیہ منیر شریف ، خانقاہ دیوان شاہ ارزانی پٹنہ ،خانقاہ درویشیہ اشرفیہ گیا ، خانقاہ چشتیہ نظامیہ دانا پور پٹنہ ، خانقاہ سرکاہی شریف مظفر پور ، خانقہ عالیہ سمر قندیہ دربھنگہ ، خانقاہ نقشبندیہ مصراولیاء اورائی مظفر پور ، خانقاہ کریمیہ نقشبندیہ مجددیہ گڑہول شریف سیتامڑھی ، خانقاہ عرفانیہ ، خانقاہ پیر ڈومریا شاہ بھاگلپور ، خانقاہ شمسیہ ویشالی ، خانقاہ اخلاقیہ مظفر پور ، درگاہ حضرت منہاج الدین راستی پٹنہ ، خانقاہ ریاضیہ پٹنہ ، خانقاہ مداری اشرفی سہسرام ، خانقاہ مخدوم احمد بہار شریف ، خانقاہ تیغیہ مظفر پور ، درگاہ کا کو جہاں آباد ، خانقاہ کبیریہ شہسرام ، آستانہ حضرت بجلی شہید سہسرام ، المعہد العالی امارت شرعیہ ، دارا العلوم الاسلامیہ،مولانا منت اللہ رحمانی انسٹی ٹیوٹ ، امارت ٹیکنیکل انسٹی ٹیوٹ ،مولانا سجاد میموریل اسپتال ، پارہ مڈیکل انسٹی ٹیوٹ ، جامعہ رحمانی مونگیر اور دیگر تمام تنظیمات، خانقاہیں و مدارس شامل ہیں۔
کانفرنس کے کنوینر مولانا احمد حسین اور ان کے تمام رفقاء کار کا شکریہ جنہوں نے لگاتار محنت کرکے پروگرام کا بہترین انتظام کیا ۔ ڈاکٹروں اور طبی عملے کی خدمات کا شکریہ جنہوں نے میڈیکل کیمپ لگا کر حاضرین کی خدمت کی اور انسانیت نوازی کی روشن مثال قائم کی۔ علماء و مشائخ، مفکرین، اور تعلیمی و سماجی قائدین کا شکریہ جنہوں نے اپنی علمی رہنمائی، فکری بصیرت اور عملی تعاون سے تحریک کو معنوی قوت عطا کی۔سیاسی و سماجی رہنما کا شکریہ جنہوں نے حق کی آواز پر لبیک کہا اور دستورِ ہند کے دفاع میں مظلوموں کا ساتھ دیا۔ پٹنہ کے مسلمان و غیر مسلم عوام کا شکریہ جنہوں نے مہمان نوازی، حسنِ اخلاق اور بھائی چارے کا شاندار مظاہرہ کیا اور شہر کو مثالی میزبان بنایا۔
امیر شریعت نےمزید کہا کہ یہ اجتماع کسی مہم کا اختتام نہیں بلکہ ایک عظیم تحریک کا نقطۂ آغاز ہے۔ اوقاف، ملت کی امانت اور ربِّ کائنات کی عطا کردہ نعمت ہیں۔ ان کا تحفظ ایک دینی و آئینی فریضہ ہے۔ آئیں! ہم سب عزم کریں کہ اپنے اپنے علاقوں میں اس شعور کو عام کریں اور پُرامن، منظم جدوجہد کو آگے بڑھائیں۔ یہ پرامن اور تاریخی اجتماع، ملک کی جمہوری روح اور مسلمانوں کے وقار کا مظہر تھا۔ حکومتِ ہند سے پرزور اپیل کی جاتی ہے کہ وہ وقف (ترمیمی) ایکٹ 2025 کو واپس لے اور آئینی دفعات (آرٹیکل13، 14، 25، 26 اور 300-A) کا احترام کرتے ہوئے ملتِ اسلامیہ کے جائز خدشات کو سنجیدگی سے سنے۔