(پی این این )
سیتامڑھی: مولانا مظہر الحق عربی اور فارسی یونیورسٹی، پٹنہ کے زیر اہتمام عالم (بیچلر) اور فاضل (ایم اے) کے امتحانات، جو پہلے 16 دسمبر کو شروع ہونے والے تھے، اب 20 دسمبر سے 29 دسمبر 2025 تک منعقد ہوں گے۔
جے ایس کالج، چندولی بیلسنڈ کو پہلے سیتامڑھی اور شیوہر اضلاع کے طلبا وطالبات کے لیے امتحان مرکز کے طور پر نامزد کیا گیا تھا، اب اسے تبدیل کر دیا گیا ہے۔ یونیورسٹی انتظامیہ ڈاکٹر اندل سنگھ نوین نے R.K.P.L.D. کسان کالج، بریار پور، سیتامڑھی کو نئے امتحان مرکز کے طور پر منتخب کیا ہے معلوم ہو کہ امتحانات دو نشست میں ہونگے ۔ پہلی نشست: صبح 10:00 بجے سے دوپہر 1:00 بجے تک اور دوسری نشست 2:00 PM سے 5:00 PM تک۔ پہلی نشست میں عالم سال اول اور فاضل سال اول کے امتحانات ہونگے جبکہ دوسری نشست عالم سیکنڈ ایئر، عالم فائنل ایئر اور فاضل سیکنڈ ایئر کے امتحانات ہونگے ۔ عالم اور فاضل کے امتحانات میں کل 1151 طلبا وطالبات شرکت کریں گے۔ کسان کالج کے پرنسپل راجیو کمار نے جانکاری دیتے یوے کہا کی امتحان مرکز میں موبائل فون اور دیگر الیکٹرانک گیجٹس کی سختی سے ممانعت ہوگی۔ ممنوعہ اشیاء کے ساتھ آنے والے کسی بھی طلبا وطالبات کو داخلے سے منع کر دیا جائے گا، جس سے طلبا وطالبات کو ممکنہ طور پر تکلیف ہو سکتی ہے۔
قابل ذکر ہے کہ مدرسہ رحمانیہ مہسول کے سابق صدر محمد ارمان علی، آل بہار مدرسہ ٹیچرس ایسوسی ایشن کے صدر مولانا محمد مطیع الرحمن قاسمی، مدرسہ ڈیولپمنٹ آرگنائزیشن کے ریاستی ترجمان محمد مناظر الاسلام، پریہار کے سابق ضلع کونسلر پروفیسر گوہر صدیقی نے یونیورسٹی کے وائس چانسلر کو مکتوب لکھا تھا امتحانات کے کنٹرولر ڈاکٹر عالمگیر اور ڈاکٹر پروفیسر دشرتھ پرجاپت کو ایک درخواست بھی دی گی تھی جس میں امتحان مرکز کو بلسنڈ کے بجائے سیتامڑھی شہر منتقل کیا جائے ۔ جو چندولی بیلسنڈ، سیتامڑھی شہر سے کافی دور ہے۔
محمد ارمان علی نے کہا کہ ہم سبھی کے کوششوں یونیورسٹی انتظامیہ نے مطالبہ مان لیا اور کسان کالج بریار پور سیتامڑھی کو نیا امتحان مرکز قرار دے دیا گیا۔ اس سرد موسم میں طلبا وطالبات کو دشواری کا سامنا اب نہیں کرنا پڑےگا مدرسہ رحمانیہ مہسول کے سابق صدر محمد ارمان علی نے وائس چانسلر، کنٹرولر امتحانات اور یونیورسٹی کے تمام عملہ کا شکریہ ادا کیا اور انہیں اس فیصلے پر مبارکباد دی۔ وہیں ضلع کے طلبا وطالبات میں خوشی کی لہرہے۔سبھی طلبا وطالبات اور ان کے گارجین نے محمد ارمان علی سمیت سبھی کو مبارک باد پیش کی گی ہے۔

(پی این این)
نوادہ :بہار میں اردو میڈیم اسکولوں کے لیے مذہبی اور ثقافتی تقاضوں کے مطابق علیحدہ چھٹیوں کی فہرست (Holiday List) جاری کرنے کا مطالبہ زور پکڑتا جا رہا ہے۔ اردو اساتذہ، تعلیمی تنظیموں اور سماجی کارکنوں نے حکومتِ بہار سے پرزور اپیل کی ہے کہ 2026 کے لئے اردو میڈیم اداروں کے لئے الگ سے تعطیلات کی فہرست جاری کیا جائے، تاکہ مسلم طلبہ اور اساتذہ کو اپنے تہذیبی و مذہبی مواقع پر سہولت مل سکے۔
مولانا محمد جہانگیر عالم مہجور القادری صدر بہار اسٹیٹ اُردو ٹیچرس ایسو سی ایشن نوادہ کا کہنا ہے کہ موجودہ عام تعطیلات کی فہرست میں کئی اہم اسلامی تہواروں پر چھٹیاں کم کردی گئی ہیں جیسے عید الفطر، عیدالاضحیٰ اور محرم و شب برات میں کم سے کم تین تین دنوں کی تعطیل ضروری ہے مگر محکمہء تعلیم بہار حکومت کی طرف سے 2026 کا جو تعطیلی کیلنڈر جاری کیا گیا ہے اس میں عید الفطر اور عیدالاضحی و محرم جیسے اہم تہواروں میں صرف ایک ایک دن کی چھٹی دی گئی ہے جب کہ اسکولوں میں ڈیوٹی پہ مامور اساتذہ کے گھر دور دراز مقامات میں ہیں آخر ایک دن کی چھٹی میں وہ اپنے گھر کب جائیں گے اور اپنے والدین اور بچوں کے لئے عید یا بقرعید کی تیاری کیسے کر پائیں گے اسے تو ہرذی شعور طبقہ آسانی سے سمجھ سکتا ہے موجودہ فہرست تعطیلات سے طلبہ کی حاضری متاثر ہوگی اور تعلیمی تسلسل بھی مجروح ہو گا۔
مولانا محمد جہانگیر عالم مہجور القادری نے آگے کہا ہے کہ آئین ہند تمام طبقوں کو مذہبی آزادی کی ضمانت دیتا ہے، لہٰذا اردو میڈیم اسکولوں کے لئے علیحدہ تعطیلات کی فہرست جاری کرنا ایک آئینی و عملی ضرورت ہے۔ اس سے نہ صرف طلبہ و اساتذہ کو سہولت ملے گی بلکہ تعلیمی نظم و ضبط بھی بہتر ہوگا۔
بہار اسٹیٹ اُردو ٹیچرس ایسو سی ایشن کے ساتھ دیگر اردو تنظیموں نے بھی وزیراعلیٰ بہار جناب نتیش کمار، محکمہء تعلیم کے چیف سیکریٹری جناب ڈاکٹر بی راجندر،وزیرِ تعلیم جناب سنیل کمار اور محکمۂ تعلیم کے اعلیٰ افسران سے مطالبہ کیا ہے کہ آنے والے تعلیمی سیشن کے لئے اردو میڈیم اسکولوں کے لئے باضابطہ طور پر الگ سے چھٹی لسٹ نافذ کی جائے۔عوامی حلقوں کو امید ہے کہ حکومت بہار اس جائز مطالبے پر جلد مثبت فیصلہ لے کر اردو میڈیم اسکولوں کے طلبہ و اساتذہ کو راحت فراہم کرے گی۔

(پی این این)
چھپرہ :ایم ایل اے چھوٹی کماری نے پٹنہ میں وزیر زراعت رام کرپال یادو سے ملاقات کی۔انہوں نے انہیں گزشتہ دنوں مسلسل بارش کی وجہ سے کسانوں کو ہونے والے نقصانات سے آگاہ کیا۔انہوں نے بتایا کہ بارش کی وجہ سے شدید پانی جمع ہوگیا ہے۔کھیتوں میں کئی فٹ تک پانی بھر جانے سے ربیع سیزن کی گندم کی بوائی مکمل طور پر متاثر ہو گئی ہے۔کسانوں کو کافی مالی نقصان کا سامنا ہے۔
ایم ایل اے کماری نے وزیر زراعت کو ایک عرضداشت بھی پیش کی۔جس میں متاثرہ کسانوں کے لیے فوری امداد اور پانی کی نکاسی کے لیے ضروری اقدامات کا مطالبہ کیا گیا۔انہوں نے کہا کہ پھکولی،جمنا مٹھیا،تیج پوروا،مہتو مسہری،میرا مسہری،باجیت پور،ترکواریہ،نینی،جٹوا،سدھوریا،کرینگا،مگائی ڈیہ،میتھولیا،سندہ،رتن پورہ اور چھپرا اسمبلی حلقہ کے دیگر آس پاس کے علاقے شدید متاثر ہوئے ہیں۔انہوں نے کہا کہ ان دیہاتوں میں نکاسی آب کا مناسب نظام نہ ہونے کی وجہ سے کسانوں کی حالت زار انتہائی ابتر ہے۔
انہوں نے مطالبہ کیا کہ متاثرہ دیہات کو زرعی آفات سے متاثرہ علاقہ قرار دیا جائے،کسانوں کو ڈیزاسٹر ریلیف معاوضہ فوری طور پر فراہم کیا جائے،کھیتوں سے پانی نکالنے کے لیے پمپ سیٹس کی دستیابی کو یقینی بنایا جائے،نالوں اور نکاسی آب کے چینلز کی صفائی کی جائے اور اضافی نکاسی آب کے چینلز کی تعمیر کے فوری انتظامات کیے جائیں۔ایم ایل اے نے کہا کہ اگر بروقت پانی کی نکاسی نہ کی گئی تو اس سال پورے علاقے میں گندم کی کاشت ناممکن ہو جائے گی۔جس سے کسانوں کی روزی روٹی کو شدید خطرہ لاحق ہو جائے گا۔انہوں نے کہا کہ وزیر نے تمام مسائل کو سنجیدگی سے سنا اور متعلقہ عہدیداروں کو فوری طور پر مناسب کارروائی کرنے کی ہدایت دی۔