(پی این این)
پھلواری شریف:امارت شرعیہ بہار اڈیشہ وجھارکھنڈ کے ناظم مولانا مفتی محمد سعید الرحمن قا سمی نے ماہ ربیع الا ول کی مناسبت سے عام لوگوں بالخصوص مسلمانوں کو پیغام دیتے ہوئے کہا کہ اسی بابرکت مہینہ میں محسن انسانیت امام الانبیاء نبی آخرالزماں حضرت محمد صلی اللہ علیہ وسلم کی ولادت باسعادت ہوئی، منصب نبوت پرفائز نے کے بعد حضور ﷺ نے دنیا کو حق و صداقت اورعدل ومساوات کا پیغام دیا ،اس کو جہالت کی تاریکی سے نکال کر علم و معرفت کی روشنی عطاء کی جس سے قوموں کی تقدیر بدل گئی ،آنحضرت ﷺ نے اپنے ۲۳؍سالہ دورنبوت میںا نسانوں کو ان کی حقیقی قدر ومنزلت سےآگاہ کیا، اونچ نیچ کے فاصلوں کو ختم کیا اوروحدت و اجتماعیت کا پیغام دیا، ہزاروں رحمتیں اوردرود وسلام ہو اس نبی رحمت پر جنہوں نے انسانوں اور چوپایوں پر بھی رحم و کرم کی تعلیم دی اور ہر قسم کے جورو استبداء کا خاتمہ کیا ،اللہ کے رسول ﷺ نے روئے زمین پر بسنے والے ہر طبقہ کو اس کا واجبی حق دیا ،کمزوروں ،بےسہارا انسانوں،بے کسوں اور مظلوموں کی دست گری کوعبادت قرار دیا اور فرمایا کہ تم زمین والوں پر رحم کرو آسمان والا تم پر رحم کرے گا ، الفت و محبت کے پیکر بنی رحمت نے معاشرہ میں امن وامان قائم کرنے اور انسانوں کے ساتھ حسن سلوک کامعاملہ کرنےکو انسانیت کا زیور قرادیا ،اسلئے رب کائنات نے اپنے محبو ب پیغمبر حضور ﷺ کی ذات اقدس کو پوری انسانیت کے لئے ایک مثالی بنایا ۔
انہوں نے کہاکہ اس ماہ مبارک کو سیرت طیبہ کے پیغام کو عام کرنے کا ذریعہ بنائیں اور عہد کریں کہ ہم اپنی پوری زندگی حضور ﷺ کی پیروی و اتباع میں گذاریں گے ، حضور ﷺ کی ایک ایک سنت پر عمل کریں گے ، اپنے طریق زندگی کو حضور ﷺ کی سیرت پر ڈھال کر ساری دنیا کے انسانوں کے لئے نمونہ عمل اور پیغام عمل بنیں گے ،آج کا انسان جن المناک حالات وکیفیات سے دو چار ہے ان سے نجات پانے کا واحد اور مستند ترین راستہ یہ ہے کہ انسانیت کے محسن اعظم محمد ﷺ کے طریقے زندگی کا اثاثہ بنالے تو وہ حقیقی مسرت اورفلاح و کامرانی سے ہمکنار ہو جائے گا ، سیر ت رسول کا یہی پیغام ہے کہ حضور ﷺسے ہمارا وہی تعلق پھر سے قائم ہوجائے جس کے بغیر ہماری ساری اجتماعی کو ششیں بے روح، بے جان اور بے مقصد ہیں، اسی مقصد کے لئے سیرت رسول کے موضوع پر کوئی مستند کتاب کا مطالعہ کرتے ہیں ، ہم روزانہ ایک چھوٹی حدیث کو حفظ کرنے کی کوشش کریں ، اور اپنے گھر کی مستورات کے درمیان حضور ﷺ کی سیرت طیبہ کا کوئی واقعہ بیان کریں جن سے ہماری ماں اور بہنوں کے اندر بھی حب رسول ﷺ کاجذبہ ابھر سکے ، اس کے ساتھ روزانہ درود شریف پڑھنے کا بھی اہتمام کریں ، اگر ہم لوگوں نے ان باتوں پر عمل کرنے کا پختہ ارادہ کرلیا تو اللہ تعالیٰ کی طرف سے غیبی نصرت بھی حاصل ہوگی اور قیامت کے دن شفاعت نبوی سے بھی سرفراز ہوں گے ،’’ صلی اللہ علی النبی الکریم ‘‘ اگر ہم دنیا وآخرت میں کامیابی سے ہمکنار ہوناچاہتے ہیں تو صرف اور صر ف ایک ہی راستہ ہے، ایک اللہ سے تعلق کو مستحکم رکھنا اور حضور ﷺ کے بتائے ہوئےطریقوں پر زندگی کو استوار کریں اور دوسروں کو بھی اس کی دعوت دیں ۔

ڈاکٹر سید اصدر علی

پٹنہ: 2020 کے بہار اسمبلی انتخابات میں 3 درجن سے زیادہ سیٹیں ایسی تھیں جن پر جیت اور ہار کا فیصلہ بہت کم فرق سے ہوا تھا۔ اس بار بھی ان تمام درجنوں نشستوں پر سخت مقابلے کے ساتھ ساتھ فیصلے میں بڑی تبدیلی کا امکان ہے۔
بہار میں تقریباً 35 سے 37 سیٹیں ہیں، یہ ایسی سیٹیں ہیں، جن پر جیت اور ہار کا فیصلہ تقریباً ڈھائی سے تین ہزار یا اس سے بھی کم ووٹوں کے فرق سے کیا جاتا تھا، جن میں سے 19 سیٹیں این ڈی اے نے جیتی تھیں، جب کہ 17 سیٹوں پر گرینڈ الائنس کامیاب ہوا تھا اور ایک سیٹ پر، آزاد امیدوار سمیت سنگھ چکئی سے کامیاب ہوئے تھے، جو بعد میں جموئی کی سیٹ سے این ڈی اے میں شامل ہوئے ہیں۔ یعنی کم فرق سے جیتی گئی کل 37 سیٹوں میں سے 20 سیٹیں اب این ڈی اے کے پاس ہیں۔
37 سیٹوں پر جیت یا ہار بہت اہم ہے، جو کسی بھی حکومت کی تشکیل میں بہت اہم کردار ادا کر سکتی ہے۔ اس لیے اس بار تمام سیاسی پارٹیوں کی ان سیٹوں پر خاص نظر رہے گی، کیونکہ بہار میں بننے والی اگلی حکومت کی قسمت بھی ان کے فیصلوں پر منحصر ہو سکتی ہے۔
کم فرق سے جیتی گئی 37 سیٹوں میں سب سے کم ووٹوں کا فرق نوادہ کی ہلسا اسمبلی سیٹ پر رہا، جس میں جے ڈی یو کے کرشنا مراری شرن نے آر جے ڈی کے شکتی سنگھ یادو کو صرف 12 ووٹوں سے شکست دی، جس کے بعد آر جے ڈی نے انتخابی نتائج میں دھاندلی کا الزام لگایا۔
سمری بختیار پور میں وکاسیل انسان پارٹی (وی آئی پی) کے سربراہ مکیش ساہنی کو آر جے ڈی کے یوسف صلاح الدین نے صرف 1759 ووٹوں کے فرق سے شکست دی۔ اسی طرح سگولی میں آر جے ڈی کے ششی بھوشن سنگھ نے وکاسیل انسان پارٹی کے رام چندر ساہنی کو 3447 ووٹوں کے فرق سے شکست دی۔ اب مکیش ساہنی کے وی آئی پی عظیم اتحاد کا حصہ ہیں اور این ڈی اے کے خلاف مقابلہ کرنے جا رہے ہیں۔
مہاگٹھ بندھن کی دیگر سیٹیں جو ووٹوں کے کم فرق سے جیتی ہیں وہ یہ ہیں: کشن گنج- اظہار الحق- کانگریس-138، ڈیہری آن سون- فتح بہادر کشواہا- آر جے ڈی-464، بکری- سوریہ کانت پاسوان- سی پی آئی-777، بھاگلپور- اجیت شرما- کانگریس- 1113، منڈی-1113 یادو-1197، راجاپاکر- پرتیما داس- کانگریس 1746، سیوان- اودھ بہاری چودھری- آر جے ڈی-1973، مہاراج گنج- وجے شنکر دوبے- کانگریس-1976، اورنگ آباد- آنند شنکر سنگھ- کانگریس-2243، سکتہ- وریندر پرساد، سی پی آئی 2020 مکیش یادو- آر جے ڈی- 2704، الاؤلی سے آر جے ڈی کے رام ورکش سدا نے 2773 ووٹوں سے کامیابی حاصل کی، کھگڑیا سے کانگریس کے چھترپتی سنگھ یادو نے 3000 ووٹوں سے کامیابی حاصل کی جبکہ دربھنگہ دیہی سے آر جے ڈی کے للت یادو نے 2141 ووٹوں سے کامیابی حاصل کی۔ انہوں نے اس وقت کے جے ڈی یو امیدوار فراز فاطمی کو 712 ووٹوں سے شکست دی تھی۔ اب فراز فاطمی اور ان کے والد اشرف علی فاطمی دونوں جے ڈی یو چھوڑ کر آر جے ڈی میں شامل ہو گئے ہیں۔ اس لیے اس بار فراز فاطمی کو دربھنگہ کی کسی اور سیٹ سے امیدوار بنایا جا سکتا ہے۔
آر جے ڈی کے سدھاکر سنگھ رام گڑھ اسمبلی سیٹ سے بی ایس پی کی امبیکا سنگھ کو صرف 189 ووٹوں کے فرق سے ہرانے میں کامیاب رہے۔ سدھاکر سنگھ بعد میں بکسر سے لوک سبھا کے لیے منتخب ہوئے اور رام گڑھ سیٹ ضمنی انتخاب میں بی جے پی کے پاس گئی۔ سدھاکر سنگھ آر جے ڈی کے سابق ریاستی صدر جگدانند سنگھ کے بیٹے ہیں۔ رام گڑھ کی طرح کدھنی اسمبلی سیٹ بھی ضمنی انتخاب میں آر جے ڈی کے ہاتھ سے نکل گئی۔ 2020 میں، آر جے ڈی کے انل ساہنی کدھنی سیٹ سے 712 ووٹوں سے کامیاب ہوئے تھے، لیکن قانونی عمل میں ان کی رکنیت ختم کر دی گئی اور یہ سیٹ بھی ضمنی انتخاب میں بی جے پی کے کھاتے میں گئی۔
اب ان سیٹوں پر ایک نظر ڈالتے ہیں جہاں این ڈی اے بہت کم مارجن سے جیتنے میں کامیاب ہوئی تھی۔ 5 اسمبلی سیٹیں ایسی تھیں جہاں این ڈی اے کے امیدوار 1000 سے کم ووٹوں سے جیتنے میں کامیاب رہے۔ ان میں سے، چراغ پاسوان کی ایل جے پی کے راج کمار سنگھ نے بیگوسرائے ضلع کی متھیانی اسمبلی سیٹ سے جے ڈی یو کے نریندر کمار سنگھ کو 333 ووٹوں سے شکست دی۔ بدلی ہوئی سیاسی تصویر میں راج کمار سنگھ اب جے ڈی یو میں ہیں، جب کہ نریندر کمار سنگھ جے ڈی یو چھوڑ کر آر جے ڈی میں شامل ہو گئے ہیں۔ اس کے علاوہ شیخ پورہ ضلع کی باربیگھا سیٹ سے جے ڈی یو کے سدرشن کمار صرف 113 ووٹوں سے کامیاب ہوئے، جب کہ جے ڈی یو کے سنیل کمار گوپال گنج کے بھورے سے 462 ووٹوں سے کامیاب ہوئے اور بچھواڑہ سے سریش مہتا-بی جے پی-484 اور جے ڈی یو کے سنجیو کمار 9 اسمبلی سیٹ پربا سے 5 ووٹوں سے جیتنے میں کامیاب رہے۔
این ڈی اے نے جو اسمبلی سیٹیں 1000 سے 3000 ووٹوں سے جیتی ہیں وہ اس طرح ہیں – بی جے پی کے پرنو کمار داس نے مونگیر سیٹ سے صرف 1244 ووٹوں سے الیکشن جیتا جبکہ بی جے پی کی گایتری دیوی نے سیتامڑھی کی پریہار سیٹ سے 1569 ووٹوں سے کامیابی حاصل کی۔ اسی طرح ساکرا سے اشوک چودھری جے ڈی یو- 1537 اور جھجا سے جے ڈی یو کے دامودر راوت 1679 ووٹوں سے کامیاب ہوئے۔ رانی گنج سے جے ڈی یو کے اچمیت سدا کو 2304 ووٹوں سے، بہادر پور سے جے ڈی یو کے مدن ساہنی کو 2629 ووٹوں سے اور گیا کے ٹکاری سے جیتن رام مانجھی کی پارٹی ایچ اے ایم کے انیل کمار کو 2630 ووٹوں سے کامیابی ملی۔ پرانپور سے بی جے پی کی نشا سنگھ نے 2972 ووٹوں سے، حاجی پور سے بی جے پی کے اودھیش سنگھ نے 2990 ووٹوں سے، بی جے پی کے آرا کے امریندر پرتاپ سنگھ نے 3002 ووٹوں سے اور بی جے پی کے مشری لال یادو نے دربھنگا ضلع کی علی نگر اسمبلی سیٹ سے 3101 ووٹوں سے کامیابی حاصل کی۔
دونوں اتحاد اس اسمبلی الیکشن میں کم مارجن سے جیتی گئی ان تمام سیٹوں پر گہری نظر رکھیں گے۔ این ڈی اے اور مہاگٹھ بندھن دونوں ہی زیادہ سے زیادہ سیٹیں جیتنے کی کوشش کریں گے تاکہ بہار میں اگلی حکومت بنانے کا راستہ آسان ہو۔

ضلع اردو زبان سیل ارریہ کے زیر اہتمام فروغ اردو سمینارو مشاعره کا انعقاد
(پی این این)
ارریہ : ہر سال کی طرح امسال بھی ضلع اردو زبان سیل، ارریہ کے زیرِ اہتمام ضلع سطحی فروغ اردو سمینار، مشاعرہ و عمل گاہ کا انعقاد بڑے تزک و احتشام کے ساتھ ٹاؤن ہال ارریہ میں ہوا۔ اس پروگرام کا افتتاح ضلع مجسٹریٹ ارریہ اور مہمان خصوصی انیل کمار اور دیگر معززین بشمول عہدیداروں نے شمع روشن کرکے کیا۔ اس سے قبل اردو زبان سیل ارریہ کی جانب سے ضلع اردو زبان سیل ارریہ کے انچارج محمد ذوالفقار اور پروگرام کے آرگنائزر تعظیم احمد ندوی ودیگر اردو مترجمین نے تمام عہدیداران اور مہمانوں کا پھولوں کے گلدستے پیش کرکے شاندار استقبال کیا اور ان کی شال پوشی کرکے انہیں اعزاز بخشا۔ اس موقع پر ڈسٹرکٹ لینڈ ایکوزیشن آفیسر( ضلع اراضی حصول ) ارریہ شری وسیم احمد، اسسٹنٹ ڈائرکٹر ڈسٹرکٹ سوشل سیکورٹی سیل ارریہ شری دلیپ کمار، انچارج آفیسر اردو زبان سیل ارریہ شری ذوالفقار علی وغیرہ موجود تھے۔
پروگرام کے افتتاح کے معا بعد ضلع اردو زبان سیل کی طرف سے شائع ہونے والا سالانہ سوینیئر (رسالہ ) ضلع اردو نامہ ارریہ کا رسم اجراء کیا گیا۔ اس موقع پر پروگرام سے خطاب کرتے ہوئے ڈسٹرکٹ مجسٹریٹ ارریہ نے کہا کہ اردو درحقیقت مٹھاس اور بھائی چارے کی زبان ہے۔ یہ تنوع میں اتحاد کی علامت ہے۔ اردو زبان سیل ایسے پروگرام کے انعقاد پر تعریف کا مستحق ہے۔ انہوں نے اس طرح کے پروگراموں کو ضلع سے لے کر سب ڈویژن، بلاک اور اسکول کی سطح تک منعقد کرنے پر زور دیا۔ پروگرام کا پہلا سیشن فروغ اردو سیمینار کی شکل میں منعقد کیا گیا۔ اس سیشن میں پیپر ریڈر کی حیثیت سے ڈسٹرکٹ ایجوکیشن اینڈ ٹریننگ انسٹی ٹیوٹ فاربس گنج کے پرنسپل آفتاب عالم نے عوامی سطح پر اردو زبان کی ترقی میں پیدا ہونے والے مسائل اور ان کے حل پر اپنا مقالہ پیش کیا، پیپلز کالج ارریہ کے پرنسپل عنایت اللہ ندوی نے سرکاری سطح پر اردو زبان کی ترقی پر اپنا مقالہ پیش کیا۔
اقبال ندوی نے پرائمری اور سیکنڈری سطح پر اردو زبان کی تعلیم پر اپنا مقالہ پیش کیا، صحافی پرویز عالم علیگ جنہوں نے بطور نمائندہ شرکت کی، نے ارریہ ضلع میں اردو کی ترقی، ہیڈ ٹیچر مشیر عالم نے اردو بولنے والے طلباء کے لئے روزگار کے مواقع اور استاد ظفر رحمانی نے اردو اساتذہ کی ذمہ داریوں پر اپنے خیالات کا اظہار کیا۔ پروگرام کے دوران طالبات عظمیٰ پروین، ایمن عائشہ، صدا آزاد اور صدف آزاد نے ایک کے بعد ایک غزل اور نظم پیش کرکے حاضرین کو مسحور کردیا۔ اس پروگرام کے دوسرے سیشن میں ایک مشاعرہ کا انعقاد کیا گیا۔ مشاعرہ میں علاقائی اور ریاستی سطح کے شعراء نے شرکت کیں جن میں خاص طور پر طارق بن ثاقب، ارشد انور الف، عبدالباری زخمی، خورشید قمر، خطیب حیدر، محمد جنید عالم، محمد عطاء اللہ، مشتاق انجم، فیاض راہی اور شنکر کیموری شامل تھے۔
تمام شعراء نے اپنے نئےکلام اور غزلوں س خوب خوب داد تحسین کیں، خاص طور پر شنکر کیموری، فیاض راہی اور ارشد کی غزلوں کو سامعین نے بہت پسند کیا۔ اس پروگرام کے تیسرے اور آخری سیشن میں اردو ورکشاپ کا اہتمام کیا گیا۔ جس میں ضلع کے تمام بلاکس کے اساتذہ نے شرکت کی۔ آخر میں انچارج آفیسر ڈسٹرکٹ اردو زبان سیل ارریہ نے اظہار تشکر پیش کیا۔ اس پروگرام کو کامیاب بنانے میں اردو مترجم تعظیم احمد ندوی، محمد منہاج عالم، محمد۔ مشکور عالم، انور حسین، محمد۔ اسرارالحق، مسز سلمیٰ رحمانی، خوشبو دلکش اور معاون اردو مترجمین میں اسامہ صابر، انتخاب پاشا، ریحان احمد، محمد۔ گوہر اور مسز غوثیہ ناز اور مسز فرحت نگاہ کے ساتھ راہب اختر D.V. کلرک، مسٹر امتیاز علی انصاری U.V. کلرک نےاہم کردار ادا کیا۔