(پی این این)
دیوبند:کیرانہ پارلیمانی حلقہ کی ممبر پارلیمینٹ اور سماجوادی پارٹی کی سینئر لیڈر چودھری اقراء حسن نے اپنے حمایتی اور فالوورز کی گرفتار ی کے خلاف شروع کیا گیا احتجاج اور ہڑتال گزشتہ دیر رات سرکاری افسران کے ساتھ ہونے والی گفتگو کے بعد ختم کردیا ۔
ضلع مجسٹریٹ نے اقراء حسن کو یقین دہانی کرائی کہ حراست میں لئے گئے سبھی لوگوں کو صبح 10؍ بجے رہا کردیا جائے گا۔اس یقین دہانی کے بعد پولیس اور انتظامیہ نے راحت کی سانس لی ۔اس یقین دہانی کے بعد سماجوادی پارٹی اور کانگریس لیڈران سمیت بڑی تعداد میں موجود لوگ واپس چلے گئے ۔یہ تنازعہ گزشتہ روز دوپہر کے بعد شروع ہوا تھا جو رات دیرتک چلتا رہا ۔رات کے وقت ضلع مجسٹریٹ کلدیپ سنگھ احتجاج کے مقام پر پہنچے اور انہوں نے اقراء حسن اور ان کے لوگوں سے بات کی ۔ بات چیت کے بعد رکن پارلیمینٹ اقراء حسن نے اپنے وکیلوں سے بات کی اور صلاح ومشورہ کیا بعدازاں تھانہ سے ہی جیل بھیجے گئے بے قصور لوگوں کی ضمانت کی کارروائی مکمل کرائی گئی ۔
افسران نے صبح سویرے سب لوگوں کی رہائی کی یقین دہانی کرائی ۔احتجاج کئے جانے کے مقام پر اعلیٰ افسران میں نگر مجسٹریٹ کلدیپ سنگھ ،ایس ایس بی ویوم فیدل ،معاون ایس پی منوج کمار یادو اور سی او روچی گپتا موجود رہے ۔
احتجاج ختم کرنے کا اعلان کرتے ہوئے اقراء حسن نے سبھی لیڈران اور کارکنان کا شکریہ ادا کیا۔انہوں نے کہا کہ ظلم وزیادتی کا شکار ہونے والوں کو انصاف دلانے کے لئے ان کی جدوجہد جاری رہے گی۔ اس دو ران اقراء حسن کے ساتھ سماجوادی پارٹی کے ایم ایل اے آشو ملک ،سابق ایم پی حاجی فضل الرحمن ،ایم ایل اے ناہد حسن ،سابق رکن اسمبلی ٹھاکر وریندر سنگھ ،سابق ایم ایل اے منوج چودھری ،علی خاں ،معاویہ علی ،منیش تیاگی ،مظفر علی ،ورون شرما ،پروین چودھری ،ابھیشیک ٹنکو اروڑہ ،فہد سلیم احمد ،فرہاد عالم ،سندیپ احمد ،سلیم احمد ،فیصل سلمانی ،رشبھ تیاگی ،حیدر علی ،رتن یادو ،اور برجیش شرما سمیت بڑی تعداد میں لوگ موجود رہے ۔
وہیں دوسری جانب اعلیٰ افسران کی یقین دہانی کے مطابق صبح: 10بجے تمام بے قصور لوگوں کو جیل سے رہا کردیا گیا ۔ان لوگوں کے جیل سے باہر آتے ہی پارٹی کارکنان نے ان پھولوں کے ہار پہناکر زبردست استقبال کیا ۔

(پی این این)
امروہہ:مرادآباد تائیکوانڈو اسپورٹس ایسوسی ایشن نے مرادآباد کے کا نٹھ روڈ پر واقع سمر ولا اسکول میں انٹراسکول اوپن تائیکوانڈوچیمپئن شپ کا انعقاد کیا۔
امروہہ تائیکوانڈو فاؤنڈیشن کے کھلاڑیوں نے اپنی شاندار کارکردگی سے ضلع کا نام روشن کیا۔ امروہہ تائیکوانڈو فاؤنڈیشن کے ماسٹر اکبر الدین مغل کی قیادت میں کھلاڑیوں نے اپنی شاندار صلاحیتوں کا مظاہرہ کیا۔
سب جونیئر زمرے میں سخت مقابلے کے درمیان عمر خان نے چاندی کا تمغہ جیتا۔ اس دوران وانیہ خان نے بھی شاندار کارکردگی کا مظاہرہ کرتے ہوئے کانسی کا تمغہ حاصل کیا۔ تائیکوانڈو کے ماسٹراکبر الدین مغل نےاس شاندار کامیابی پر کھلاڑیوں کی حوصلہ افزائی کی۔
انہوں نے کہا کہ اس طرح کے کھیلوں کے مقابلوں سے کھلاڑیوں میں صحت مند مقابلے کا جذبہ پیدا ہوتا ہے اور انہیں آگے بڑھنے کی ترغیب ملتی ہے۔کھلاڑیوں کی کامیابی پر کھیل سے محبت کرنے والوں اور اہل خانہ نے خوشی کا اظہار کیا۔

(پی این این)
سکندرآباد /بلند شہر:محلہ رسالداران میں واقع نیو ڈائمنڈ پبلک اسکول کے طلبہ نے تائیکوانڈو فیڈریشن آف انڈیا (FIT) کے زیر اہتمام نوئیڈا کے بی جی ایس وشواناتھن انٹرنیشنل اسکول میں گزشتہ 16 مئی کو منعقدہ اوپن ڈسٹرکٹ تائیکوانڈو چیمپئن شپ 2026* میں شاندار کارکردگی کا مظاہرہ کرتے ہوئے پورے ضلع کا نام روشن کیا ہے۔ اسکول کے ہونہار کھلاڑیوں نے بہترین کھیل کا مظاہرہ کرتے ہوئے مجموعی طور پر 7 میڈل (3 گولڈ، 3 سلور اور 1 برونز میڈل) اپنے نام کیے۔
مقابلہ میں میڈل جیتنے والے فاتح طلبہ کی تفصیلات یہ ہیں:گولڈ میڈل (طلائی تمغہ) فاتحین: معاذ (کلاس: چوتھی، عمر: 11 سال)، عبداللہ (کلاس: چوتھی، عمر: 11 سال)، حماد (کلاس: نرسری، عمر: 3.5 سال)۔سلور میڈل (نقرئی تمغہ) فاتحین: شکیب (کلاس: چھٹی، عمر: 13 سال)، ایاز (کلاس: چھٹی، عمر: 13 سال)، ارحان (کلاس: چھٹی، عمر: 13 سال)۔ برونز میڈل (کانسی کا تمغہ) فاتحین: زید (کلاس: ساتویں، عمر: 14 سال)، ارحان (کلاس: چوتھی، عمر: 11 سال) کے نام قابل ذکر ہیں۔
دی اسپورٹس اینڈ مارشل آرٹس ایسوسی ایشن، ضلع بلند شہر کے صدر اور ٹرینر *ماسٹر ذاکر حسین* نے یہ معلومات دیتے ہوئے بتایا کہ نیو ڈائمنڈ پبلک اسکول کی یہ کامیابی پورے ضلع بلند شہر کے لیے باعثِ فخر ہے۔ بچوں کی اس تاریخی کامیابی پر ان کی حوصلہ افزائی کے لیے منگل کو اسکول میں ایک تہنیتی تقریب (اعزازی تقریب) کا انعقاد کیا گیا، جہاں فاتح طلبہ کو نوازا گیا۔
شہر کی معزز اور ممتاز شخصیات نے خاص طور پر اسکول میں تشریف لا کر تمام فاتح بچوں کو مبارکباد دی، ان کے روشن مستقبل کی دعا کی اور کھیل کے میدان میں مزید آگے بڑھنے کے لیے ان کی حوصلہ افزائی کی۔
اس موقع پر امامِ عیدین مولانا محمد ارشد قاسمی، شاہی جامع مسجد کے امام مولانا محمد عارف قاسمی، قاری شفاعت خاں قاسمی، مفتی نسیم احمد قاسمی، مولانا گل صنور قاسمی، ڈاکٹر سلیم احمد، مرزا رحمان بیگ، اریب احمد وغیرہ سمیت اسکول کا تمام اسٹاف اور والدین موجود تھے۔اسکول انتظامیہ اور مقامی لوگوں نے بچوں کی اس بڑی کامیابی پر انتہائی خوشی کا اظہار کیا ہے اور اسے اسکول و پورے سکندرآباد حلقہ کے لیے ایک فخر کا لمحہ قرار دیا ہے۔