(پی این این)
چھپرہ :لوک جن شکتی پارٹی (آر) کی ایگزیکٹو میٹنگ ضلع صدر دیپک کمار سنگھ کی صدارت میں پربھوناتھ نگر ٹانڈی میں جنرل سکریٹری امن سنگھ کی رہائش گاہ پر منعقد ہوئی۔میٹنگ کی نظامت نائب صدر کم مانجھی اسمبلی انچارج دگ وجے سنگھ نے کی۔میٹنگ میں بنیادی طور پر پارٹی کو بوتھ سطح تک مضبوط کرنے،آنے والے اسمبلی انتخابات میں پارٹی کی متاثر کن موجودگی کو محسوس کرانے اور ‘بہار فرسٹ-بہاری فرسٹ’ ویژن کو زمین پر لانے پر بات چیت کی گئی۔
میٹنگ میں فیصلہ کیا گیا کہ عوامی رابطہ مہم چلا کر زیادہ سے زیادہ لوگوں کو پارٹی سے جوڑا جائے اور عوامی مسائل کے حوالے سے جدوجہد تیز کی جائے۔میٹنگ میں متفقہ طور پر ایک قرارداد پاس کرنے کا فیصلہ کیا گیا اور اعلیٰ اور ریاستی قیادت سے ضلع کی تین اسمبلی سیٹوں پر الیکشن لڑنے اور فعال کارکنوں کو امیدوار بنانے کا مطالبہ کیا گیا۔اس موقع پر ضلع صدر مسٹر سنگھ نے بوتھ صدور کی تقرری کو جلد از جلد مکمل کرنے پر زور دیا۔بوتھ کمیٹیوں کی فہرست پیش کرنے والے بلاک صدور کو ضلع تنظیمی وزیر رتیش سنگھ سگریوال نے شال سے نوازا۔مسٹر سنگھ نے واضح طور پر کہا کہ تنظیم میں نظم و ضبط سب سے اہم ہے۔غفلت یا لاپرواہی کے خلاف سخت کارروائی کی جائے گی۔انہوں نے بتایا کہ بہت جلد چھپرہ میں پارٹی کے قومی صدر اور مرکزی وزیر چراغ پاسوان کے ایک جلسہ عام کا اہتمام کیا جائے گا۔جس کی تیاریاں زوروں پر ہیں۔
موقع پر پارلیمانی بورڈ کے ریاستی جنرل سکریٹری سروج مانجھی،نائب صدر بھانو پرتاپ سنگھ،پردیپ کمار،راجیش سنگھ،امن سنگھ،گڈو پاسوان،پرمود شرما،انیمیش سنگھ گولو،مکیش گپتا،سنیل کمار منٹو،تیج نارائن سنگھ تیجا،ترجمان جگنندن سنگھ،سبودھ کمار،سنیل کمار سنگھ،سونو ساگر،ششی بھوشن جوشی،کنہیا رام،پرمود سنگھ،گولو کمار سنگھ،ترلوک مشرا،ابھیمنیو سنگھ رگھوونشی،خواتین ضلع صدر کمکم سنگھ،مکیش سنگھ،مایا شنکر سنگھ،سنیل ماجھی،کنج بہاری اپادھیائے،سنتوش گپتا،دیو سنگھ،نرمل سنگھ وغیرہ موجود تھے۔

(پی این این)
سیتامڑھی:معروف ڈینٹل سرجن ڈاکٹر شازیہ ظفر نے کہا کہ منہ کا کینسر تیزی سے بڑھ رہا ہے اور ہندوستان میں ایک سنگین صحت کا بحران بنتا جا رہا ہے، جس کی بڑی وجہ تمباکو کا استعمال، گٹکا، پان مسالہ اور شراب نوشی ہے۔
ڈاکٹر شازیہ ظفر کہتی ہیں، "کینسر یقیناً ایک مہلک بیماری ہے، لیکن اگر اس کا بروقت پتہ چل جائے اور طرز زندگی کو بہتر بنایا جائے تو اس سے بچا جا سکتا ہے۔ خاص طور پر منہ کا کینسر مکمل طور پر روکا جا سکتا ہے۔ ہمیں صرف بیدار رہنے اور باقاعدگی سے چیک اپ کروانے کی ضرورت ہے۔”
ڈاکٹر شازیہ ظفر نے کہا کہ عام طور پر لوگ منہ کے کینسر کی کچھ ابتدائی علامات کو نظر انداز کر دیتے ہیں۔ انہوں نے کہا کہ منہ میں بار بار چھالے جو ٹھیک نہیں ہوتے، زبان یا ہونٹوں پر سفید یا سرخ دھبے، نگلنے میں دشواری، جبڑے میں اکڑن یا سوجن اور سانس کی مسلسل بدبو اس کی اہم علامات ہیں۔
انہوں نے کہا کہ ہر شخص کو سال میں کم از کم ایک بار دانتوں کا چیک اپ کروانا چاہیے۔ اگر کینسر ابتدائی مراحل میں جانچ میی آ جائے تو علاج زیادہ موثر اور آسان ہے۔
ڈاکٹر شازیہ ظفر نے منہ کے کینسر سے بچنے کے لیے تمباکو اور گٹکے کو مکمل طور پر ترک کرنے کا مشورہ دیا۔ انہوں نے کہا کہ یہ منہ کے کینسر کی بڑی وجہ ہے۔ اس کے استعمال سے خلیات غیر معمولی طور پر بڑھنے لگتے ہیں۔ انہوں نے شراب سے دور رہنے کا مشورہ دیا کیونکہ شراب اور تمباکو کے امتزاج سے کینسر کا خطرہ کئی گنا بڑھ جاتا ہے۔ انہوں نے صحت مند کھانے، ہری سبزیاں، پھل، وٹامن سی سے بھرپور خوراک اور وافر مقدار میں پانی پینے کا مشورہ دیا، جس سے جسم کی قوت مدافعت میں اضافہ ہوتا ہے۔
منہ کی صفائی نہ صرف دانتوں کے لیے بلکہ کینسر سے بچاؤ میں بھی مددگار ہے۔ دانتوں کا سالانہ چیک اپ کروائیں۔ انہوں نے کہا کہ اگر دانتوں اور مسوڑھوں میں کوئی غیر معمولی تبدیلی ہو تو فوری طور پر ماہر سے رابطہ کریں۔

(پی این این)
پٹنہ :نیا وقف قانون نہ صرف اسلامی شریعت کی صریح خلاف ورزی ہے بلکہ دستور ہند کی روح اور سپریم کورٹ کے کئی فیصلوں کے بھی خلاف ہے ، اس قانون کے نتیجے میں مساجد و مدارس ،مقابر و خانقاہیں اور مذہبی مقامات پر خطرے کے بادل منڈلا رہے ہیں ؛اس لیے ہم اس کالے قانون کے خلاف آخری دم تک جدوجہد کرتے رہیں گے، ان خیالات کا اظہار امارت شرعیہ کے قائم مقام ناظم مولانا مفتی محمد سعید الرحمن قاسمی نے کیا۔
انہوں نے کہا کہ نیا وقف قانون ملک کے جمہوری اقدار کے خلاف ہے، اسی لیے امارت شرعیہ کی قیادت میں ۲۹؍جون ۲۰۲۵ءکو پٹنہ کے گاندھی میدان میں “وقف بچاؤ دستور بچاؤ کانفرنس” منعقد ہو رہی ہے ،جس کی صدارت امیر شریعت مولانا سیداحمدولی فیصل رحمانی فرمائیں گے، اس کانفرنس میں ریاست اور بیرون ریاست کے ممتاز علماء ،قائدین اور ملی تنظیموں کے ذمہ دار حضرات شرکت فرمائیں گے اور قوم وملت کو آئندہ کے لئےلائحہ عمل بتلائیں گے، آل انڈیا مسلم پرسنل لا بورڈ اور بہار کی جملہ ملی تنظیموں، خانقاہوں کے سجادگان اور دینی اداروں کے مشترکہ تعاون سے ۲۹؍ جون کو ایک کانفرنس ہونے جا رہی ہے جس کی تمام تیاریاں مکمل ہو گئی ہیں، رضا کار مقرر کر دیے گئے ہیں، عوامی رابطوں کے ساتھ انہیں سہولت بہم پہنچانے کی جدوجہد کی جا رہی ہے، اجلاس کے انتظام وانصرام کے لئے جو۱۹؍کمیٹیاں بنائی گئی ہیں ان کےکنوینرحضرات شب و روز بیدار مغزی ،تندہی اور اخلاص کے جذبے سے سارےا مور انجام دے رہے ہیں ،شرکا ءکے قیام و طعام ،اجلاس گاہ تک پہنچانے کے لیے رضاکار ہمہ جہت کوشش کر رہے ہیں ا ن شاءاللہ یہ کانفرنس تاریخ ساز ہوگی اور حکومت کے کانوں تک لاکھوں لوگوں کی پرزور آواز پہنچائی جائے گی۔
پٹنہ کے مسلمان اور براداران وطن سے اپیل ہے کہ اس عظیم الشان کانفرنس میں شرکت کے لئے چاروں صوبوں کے علاوہ ملک کے دیگرصوبوں سے لاکھوں کی تعداد میں جو لوگ آرہے ہیں ان کے قیام وطعام ،پانی اور دیگر سہولیات کا خاص نظم کریں،اہل پٹنہ نےماضی میں ضیافت کی جومثال قائم کی ہے ہمیں قوی امید ہے کہ اس موقع پر بھی مہمانوازی وضیافت میں اس سے زیادہ بڑھ چڑھ کر حصہ لیں گے، اللہ تعالیٰ تمام حضرات کے تعاون کوقبول فرمائے اور ہرطرح کی کامیابی سےہمکنارفرمائے۔