(پی این این)
پٹنہ:شہر پٹنہ کے علاقہ پیر بہور تھانہ کے تحت لال باغ محلے میں ایک نہایت افسوسناک اور لرزہ خیز واقعہ پیش آیا، جس میں نواز عالم نامی شخص کو ایک نامعلوم حملہ آور نے اس کی رہائش گاہ پر نہایت بے دردی کے ساتھ گلا ریت کر قتل کر دیا۔ اس اندوہناک واقعہ میں مقتول کی اہلیہ بھی شدید زخمی ہو گئی ہیں، جو اس وقت پی ایم سی ایچ میں زیر علاج ہیں اور زندگی و موت کی جنگ لڑ رہی ہیں۔واقعہ کے بعد علاقے میں شدید غم و غصہ پایا جا رہا ہے۔
ذرائع کے مطابق علاقے کے عوام اور مقتول کے لواحقین قاتل کی فوری گرفتاری کا مطالبہ کرتے ہوئے پرامن طریقے سے گزشتہ 12 گھنٹوں سے لاش کے ساتھ سڑک پر احتجاج کر رہے ہیں۔ مظاہرین کا کہنا ہے کہ سرکاری انتظامیہ نے اب تک کوئی مؤثر اقدام نہیں کیا، جس کے باعث عوام میں بے چینی اور ناراضگی بڑھتی جا رہی ہے۔
اس واقعہ پر گہرے رنج و غم کا اظہار کرتے ہوئے مولانا احمد ولی فیصل رحمانی امیر شریعت بہار اڈیشہ ،جھارکھنڈ نے کہا کہ ریاست میں قانون کی بالادستی کو یقینی بنانا نہایت ضروری ہے،اس واقعے میں سب سے افسوسناک پہلو یہ ہے کہ دارالحکومت پٹنہ میں اس طرح کا افسوسناک واقعہ پیش آیا،انہوں نے کہا کہ ریاست میں اسی طرح سے آئے دن انسانی خون کے دردناک واقعات پیش آتے رہے توعوام کا امن و اطمینان خطرے میں پڑ سکتا ہےاوریہ سانحہ ریاست میں لا اینڈ آرڈر پر ایک سوالیہ نشان ہے۔
امیر شریعت کی ہدایت پر مولانا مفتی محمد سعید الرحمن قاسمی ناظم امارتِ شرعیہ بہار، اڑیسہ و جھارکھنڈ پھلواری شریف، پٹنہ نے اس افسوسناک واقعہ پر اپنا رد عمل ظاہر کرتے ہوئے ایک اعلیٰ سطحی وفد جائے وقوع پر بھیجاچناںچہ مولانا احمد حسین قاسمی مدنی کی قیادت میں امارت شرعیہ کے وفد نے مقتول کے اہل خانہ سے ملاقات کی، اور انہیں تعزیت پیش کی نیز موجود لوگوں سے حالات کا جائزہ لیا۔ وفد میں مولانا رضوان احمد ندوی،مولانا ابوالکلام شمسی اور مولانا ممتاز شامل تھے۔وفد نے موقع پر موجود عوام کو جو کئی گھنٹوں سے اشوک راج پتھ روڈ پرانصاف کی گہار لگا رہے ہیں،انہیں صبر و تحمل کی تلقین کی اور یقین دلایا کہ وہ انتظامیہ تک عوام کے مطالبات مؤثر انداز میں پہنچائیں گے۔
اس موقع پرناظم امارتِ شرعیہ نے ریاستی حکومت سے مطالبہ کیا ہے کہ قاتل کو فوری گرفتار کر کے قرار واقعی سزاکو یقینی بنایاجائے اورمقتول کے وارثین کو معقول معاوضہ دیاجائے تاکہ متاثرہ خاندان کو انصاف مل سکے اور آئندہ ایسے واقعات کی روک تھام ہو۔واضح رہے کہ پٹنہ جیسے بڑے شہر میں اس نوعیت کا سنگین واقعہ قانون و انتظامیہ کے لیے ایک بڑا چیلنج ہے، جس پر فوری اور سخت کارروائی وقت کی اہم ضرورت ہے۔

(پی این این)
ارریہ: بہار کے ریاستی اقلیتی رہائشی اسکولوں میں تعلیمی سیشن 2026-27 کے لیے کلاس 9 اور 11 میں داخلے کے لیے آن لائن درخواستیں طلب کی جا رہی ہیں، نیز مسلم، سکھ، عیسائی، بدھ، جین، اور پارسی برادریوں کے طلباء کے ساتھ ساتھ اقلیتی رہائشی اسکول، جمہار پور، کاہار لینڈ، مائیناریٹی ریذیڈنٹ اسکول میں اور کیمور اضلاع، اور کیمپ ایٹ اضلاع سیوان، پورنیہ، سہرسہ، مونگیر اور سپول میں۔ آخری تاریخ، 01.05.2026 کو بڑھا دیا گیا ہے اور اہل طلباء 20.05.2026 تک درخواست دے سکتے ہیں۔ درخواست کا عمل محکمہ کی ویب سائٹ https://state.bihar.gov.in/minoritywelfare/CitizenHome.html پر آن لائن دستیاب ہے۔
آن لائن فارم کے ساتھ منسلک ہونے والی دستاویزات (خود تصدیق شدہ) ضمیمہ: سرکل آفیسر کے ذریعہ جاری کردہ رہائشی آمدنی کا سرٹیفکیٹ (امیدواروں کی زیادہ سے زیادہ سالانہ خاندانی آمدنی چھ لاکھ روپے ہونی چاہئے)، تعلیمی قابلیت کے سرٹیفکیٹ/نمبر سرٹیفکیٹ کی خود تصدیق شدہ کاپیاں، تین تصاویر، اور عمر کی حد کا ثبوت۔

(پی این این)
چھپرہ :شہر کے آڈیٹوریم میں اتوار کو سائیں-شاہ سماج کی جانب سے ایک روزہ کانفرنس کا انعقاد کیا گیا۔جس میں برادری کے معاشی،سماجی اور سیاسی فروغ کے موضوع پر تفصیلی تبادلۂ خیال کیا گیا۔کانفرنس میں مقررین نے کہا کہ برسوں سے مختلف سیاسی جماعتوں نے اس سماج سے صرف ووٹ لینے کا کام کیا ہے۔مگر اس کی ترقی اور حقوق کے لیے کوئی ٹھوس قدم نہیں اٹھایا۔
کانفرنس سے خطاب کرتے ہوئے سماج کے ضلع صدر انجینئر دانش ہشام نے کہا کہ یہ برادری آج بھی نظر انداز اور پسماندہ حالت میں زندگی گزار رہی ہے۔انہوں نے کہا کہ اس کانفرنس کا مقصد موجودہ مسائل کا حل تلاش کرنا اور آنے والی نسلوں کے روشن مستقبل کے لیے مؤثر منصوبہ بندی کرنا ہے۔انہوں نے لوگوں سے اپیل کی کہ وہ متحد ہو کر آگے بڑھیں اور تعلیم،روزگار اور سماجی بیداری پر خاص توجہ دیں۔
بھاگلپور سے آئے سماجی کارکن و سابق مکھیا محمد کلام الدین نے کہا کہ اس کانفرنس کا بنیادی مقصد حکومت کی توجہ اس برادری کی ہمہ جہت ترقی کی طرف مبذول کرانا ہے۔انہوں نے کہا کہ سائیں-شاہ سماج آج بھی سماجی اور معاشی طور پر کافی پسماندہ ہے اور زیادہ تر لوگ محنت مزدوری اور چھوٹے کاروبار پر انحصار کرتے ہیں۔انہوں نے مرکز اور ریاستی حکومت سے مطالبہ کیا کہ اس سماج کی ترقی کے لیے خصوصی اسکیمیں بنائی جائیں اور سرکاری فوائد آخری فرد تک پہنچائے جائیں۔
اس موقع پر کلام میموریل ٹرسٹ کے قومی سکریٹری محمد مِٹّھو شاہ نے کہا کہ آزادی کے 77 برس بعد بھی اس برادری کے حقوق کے لیے سنجیدگی سے آواز نہیں اٹھائی گئی۔انہوں نے کہا کہ اب وقت آ گیا ہے کہ اس کمیونٹی کو بھی سیاسی نمائندگی میں مناسب مقام دیا جائے۔انہوں نے حکومت سے مطالبہ کیا کہ اس سماج کے نمائندوں کو اسمبلی، قانون ساز کونسل اور راجیہ سبھا جیسے اہم ایوانوں میں شامل کیا جائے تاکہ ان کی آواز بلند ہو سکے۔
کانفرنس کے نائب صدر شمیم احمد نے کہا کہ اگر حکومت سنجیدہ قدم اٹھائے تو نوجوانوں کو تعلیم، روزگار اور باعزت زندگی کے مواقع حاصل ہو سکتے ہیں۔کانفرنس میں جنرل سیکرٹری محمد شہاب الدین،ضلع صدر محمد شمیم،چھپرہ صدر محمد اصغر علی،انجینئر شمشیر عالم،مظہر حسین،صفدر حسین،حاجی ہشام الدین،نظام شاہ سمیت بڑی تعداد میں برادری کے افراد موجود تھے۔