(پی این این)
ریول گنج:بہار کے سارن ضلع کے ریول گنج بلاک کی انئی پنچایت کی گرام کچہری میں محکمہ ریونیو اور لینڈ ریفارمس کے زیراہتمام ریونیو مہا ابھیان کے تحت 2 روزہ کیمپ کا آغاز ہوا۔حکومت کی طرف سے فراہم کردہ رعیت کے کاغذات کیمپ میں جمع کرائے گئے۔
بنیادی طور پر ملازم سلونی کماری کے ساتھ سروے کے اہلکار روی رنجن کمار،اپیندر کمار سہنی،رویند کمار پرجاپتی کے ساتھ سرپنچ کے نمائندے چندر کشور سنگھ،پنچ مکیش چوہان،راجو مانجھی پنچ نمائندہ اجے کمار وغیرہ نے کیمپ کی کارروائی میں تعاون کیا۔ اس موقع پر پرچیاں تقسیم کرنے والے ملازمین بھی موجود تھے۔ملازم سلونی کماری نے کہا کہ حکومت کا مقصد رعیت کو سہولت فراہم کرنا ہے۔20 نکاتی چیئرمین دھرمیندر سنگھ چوہان نے کہا کہ حکومت کا یہ پروگرام رعیت کے لیے آسان ہے۔جمع بندی کے کام میں بہتری آنے گی۔عوام سرکل آفس کے چکر لگاتے تھے۔انہیں پریشانی سے نجات مل جائے گی۔
زون کی طرف سے تقسیم کی گئی پرچیوں میں تضاد کی شکایت کرتے ہوئے انہوں نے کہا کہ میں نے 20 نکاتی اجلاس میں اس کو اٹھایا ہے۔بہت سے کسانوں کو ابھی تک جمع بندی کی پرچی نہیں ملی ہے۔گاؤں کی سطح پر جاننے والے لوگوں نے کسانوں نے بھی کیمپ میں مدد کی ان میں اکھلیشور سنگھ، راج کشور سنگھ،رمیش سنگھ،مکھیا کے سابق نمائندہ رام پرتاپ سنگھ،ویریشور سنگھ وغیرہ شامل ہیں۔

(پی این این)
چھپرہ:ڈسٹرکٹ الیکشن آفیسر کم ڈی ایم امن سمیر کی صدارت میں کلکٹریٹ آڈیٹوریم میں تمام اسمبلی حلقوں کے ریٹرننگ آفیسرس،اسسٹنٹ ریٹرننگ آفیسرس اور سیل کے نوڈل آفیسرس کی جائزہ میٹنگ کا انعقاد کیا گیا۔میٹنگ میں ڈی ایم نے تمام ریٹرننگ افسران کے ذریعے اب تک کی گئی تیاریوں کا جائزہ لیا۔انہوں نے کہا کہ سب سے پہلے اپنی سطح پر سیل بنائیں۔جس میں آر او سیل،نامزدگی سیل،بیلٹ پیپر سیل،ڈیٹا اپ لوڈنگ سیل،وہیکل سیل وغیرہ اہم ہیں۔انہوں نے کہا کہ سیل میں ایسے افسران اور اہلکاروں کی الگ الگ نشاندہی کی جانی چاہیے جو کاغزی کاروائی میں ماہر ہوں اور فیلڈ ورک میں ماہر ہوں۔
ڈی ایم نے ڈسپیچ سنٹر،ای وی ایم گودام،کمیشننگ سائٹ اور اسٹرانگ روم کے ساتھ کلیکشن سنٹر کا دورہ کر ضروریات کا جائزہ لے ریکوزیشن تیار کرنے کی ہدایت کی۔انہوں نے بتایا کہ ممکنہ طور پر چھپرہ،گرکھا،ایکما اور بنیا پور اسمبلی کا ڈسپیچ جے پی یونیورسٹی سے،مڑھوڑہ،تریاں اور امنور کو آئی ٹی آئی مڑھوڑہ سے،مانجھی کو راجندر کالج سے اور پرسا و سونپور کو گوگل سنگھ ہائی اسکول نیاگاؤں سے روانہ کرنے کی تجویز ہے۔نیز تمام اسمبلیوں کی ریسیونگ اور کاؤنٹنگ بازار سمیتی میں کرنے کی تجویز ہے۔انہوں نے کہا کہ آپ کی مدد کے لیے ضلع کی سطح پر کل 22 سیل بنائے گئے ہیں۔ریٹرننگ آفیسر اور اسسٹنٹ ریٹرننگ آفیسر کو آزادانہ طور پر تمام کام کرنا اور کروانا ہے۔وہ ڈسٹرکٹ سیل کے نوڈل آفیسر سے مسلسل رابطے میں رہ کر ضروری مدد حاصل کریں۔
ڈی ایم نے کہا کہ اگلے مہینے کے پہلے ہفتہ میں نوٹیفکیشن کا تصور لگا کر کام کیا جائے۔تاکہ آپ کو تمام تیاریوں کو مکمل کرنے میں کسی قسم کی دشواری کا سامنا نہ کرنا پڑے اور خاطر خواہ وقت ملے۔میٹنگ میں پی پی ٹی کے ذریعے اسٹیبلیشمنٹ،تربیت،ای وی ایم،اسٹرانگ روم،میٹریل،امن و امان،ماڈل ضابطہ اخلاق،بیلٹ پیپر،پوسٹل بیلٹ پیپر،نامزدگی،آبزرور،میڈیا،کمپیوٹرائزیشن،سائبر سیکیورٹی،شکایات ازالہ،کمیونیکیشن،سنگل ونڈو،سویپ،الیکشن سیل وغیرہ کے ایکشن پلان کا جائزہ لیا گیا اور ضروری ہدایات دی گئیں۔
اس موقع پر ایڈیشنل کلکٹر مکیش کمار،آر او کم اے ڈی ایم پی جی آر او شیو کمار پنڈت،ایس ڈی ایم صدر نتیش کمار،ایس ڈی ایم سونپور اسنیگدھا نیہا،ایس ڈی ایم مڑھوڑہ ندھی راج،ڈسٹرکٹ لینڈ ایکوزیشن آفیسر اوم پرکاش،پنچایت راج افسر ششی کمار،ڈی سی ایل آر صدر مسٹر آلوک کمار،ڈائرکٹر ڈی آر ڈی اے رادھے شیام کمار مشرا،ڈی سی ایل آر مڑھوڑہ،ڈپٹی الیکشن آفیسر جاوید اقبال،ڈی پی آر او روندر کمار اور دیگر موجود تھے۔

جالے: مسلم اکثریتی علاقوں میں قائم اردو مڈل اسکولوں کے کیمپس میں چل رہے ترقی یافتہ ہائر سیکنڈری اسکولوں میں اتوار کی تعطیل نافذ کرنے اور جمعہ کی ہفتہ واری تعطیل ختم کرنے کے حالیہ فیصلے نے شدید تنازع کھڑا کردیا ہے۔ والدین اور مقامی عوام کے ساتھ طلبہ نے بھی اس فیصلے پر سخت برہمی ظاہر کرتے ہوئے اسکول جانے سے انکار کردیا ہے۔ صورتحال یہ ہے کہ کئی علاقوں میں بچے جمعہ کے اہتمام اور مذہبی ضرورت کے پیش نظر اسکول نہ پہنچ کر احتجاج درج کرا رہے ہیں، جس سے ماحول غصے اور بےچینی میں ڈوبا ہوا ہے۔
اس تنازع کی بڑی وجہ ضلع تعلیمی افسران کے وہ خط ہیں جن میں ایک ہی کیمپس میں چلنے والے اردو اور ہائر سیکنڈری اسکولوں کے لیے مختلف تعطیل کے احکامات دیے گئے ہیں۔ سیتامڑھی کے ڈی ای او نے اپنے مکتوب نمبر 2376 مورخہ 27 اگست 2025 کے ذریعے یہ ہدایت جاری کی ہے کہ اردو اسکول جمعہ کو بند رہیں گے لیکن اسی عمارت میں چلنے والے ہائر سیکنڈری اسکول کھلے رہیں گے۔ اسی طرح شیوہر کے ڈی ای او نے بھی مکتوب نمبر 786 مورخہ 4 ستمبر 2025 کے تحت یہی ہدایت دی ہے۔
اردو ٹیچرس ایسوسی ایشن کے ریاستی صدر قمر مصباحی نے وزیر اعلیٰ نتیش کمار اور وزیر تعلیم سنیل کمار کو ایک میل بھیج کرکے اس معاملے میں فوری مداخلت کی اپیل کرتے ہوئے کہا ہے کہ جب ہائر سیکنڈری اسکول اردو مڈل اسکول کی ہی عمارت یا کیمپس میں چل رہا ہے تو ہفتہ واری تعطیل بھی یکساں ہونی چاہیے۔ انہوں نے کہا کہ اب تک اردو اسکولوں میں جمعہ کو چھٹی کی روایت برقرار رہی ہے، مگر حالیہ دنوں سیتامڑھی اور شیوہر کے ضلع تعلیمی افسران کے حکم ناموں نے عوامی سطح پر اضطراب پیدا کردیا ہے۔
قمر مصباحی نے اس فیصلے کو اردو آبادی کے ساتھ ناانصافی قرار دیتے ہوئے مطالبہ کیا ہے کہ ریاست بھر کے تمام ضلع تعلیمی افسران کو ہدایت نامہ جاری کیا جائے تاکہ اردو مڈل اسکولوں کے ساتھ چلنے والے ہائر سیکنڈری اسکول بھی جمعہ کو بند اور اتوار کو کھلے رہیں۔ ان کے مطابق جمعہ کا اہتمام صرف چھٹی نہیں بلکہ مذہبی اور سماجی طور پر ایک اہمیت رکھتا ہے، اور اس روایت کو توڑنا مسلم عوام کے جذبات سے کھیلنے کے مترادف ہے۔
غور طلب ہو کہ عوامی سطح پر اس مسئلے نے احتجاجی صورت اختیار کر لی ہے اور اگر حکومت نے بروقت قدم نہ اٹھایا تو یہ معاملہ بڑے عوامی غصے میں بدل سکتا ہے۔