(ایجنسیاں)
مکہ مکرمہ:ارض مقدس میں 1لاکھ 75 ہزارہندوستانی عازمین حج سمیت 21لاکھ عازمین نے حج کا رکن اعظم ادا کیا۔ ذی الحجہ کی نویں تاریخ کو ہزاروں افراد نےظہر اور عصر کی نماز مسجد نمرہ میں ادا کرنے کی سعادت حاصل کی۔ عازمین حج مسجد نمرہ میں عبادات کے ساتھ عرفات کے میدان میں خطبہ حج سے بھی فیضیاب ہوئے۔
خطبہ اورعرفہ کے دن ظہر اور عصر کی نمازیں براہ راست سیٹ لائٹ کے ذریعہ نشر کی گئیں۔خطبہ حج کا ترجمہ 35زبانوں میں نشر کیا گیا۔ خطبہ حج کے بعد حجاج نے نماز ظہر اور عصر کی قصر ادا کی، اور غروب آفتاب ہوتے ہی وہ مزدلفہ کی طرف روانہ ہوئے۔ جہاں انھوں نے نماز مغرب اور عشا کی قصر ادا کی۔ حجاج نے سورج غروب ہونے تک خشوع وخضوع کے ساتھ عبادت کی۔ اور حج کا رکن اعظم وقوف عرفہ بحسن خوبی ادا کیا۔ اس دوران حجاج کرام میدان عرفات میں موجود رہے، جبل رحمت پر قیام کیا۔جہاں حضوراکرمؐ نے اپنا آخری خطبہ دیا تھا۔
دعا مانگنے اور عبادات کے بعد حجاج غروب آفتاب سے قبل میدان عرفات سے مزدلفہ پہنچے وہاں شب گزاری کی، اور واپس منیٰ پہنچے۔ غورطلب ہے کہ مغرب سے پہلے میدان عرفات چھوڑنے کا حکم ہے۔ جمعہ کو منیٰ میں شیطان کو کنکریاں مارنے کے بعد رکن حج کی ادائیگی کریں گے، اور قربانی کریں گے۔ قربانی کے بعد حجاج احرام اتاریں گے، اور بال منڈوا کر مسجد الحرام جائیں گے ، طواف کے بعد واپس منیٰ جاکر ایام تشریق گزاریں گے۔
سعودی وزارت صحت نے طبی خدمات فراہم کرنے کے لیے ہنگامی مراکز فعال کر رکھے ہیں جہاں ہیٹ اسٹروک یا تھکن سے متاثرہ حجاج کو فوری امداد دی جا رہی ہے۔ جبلِ رحمت کے قریب قائم اسپتال اور درجنوں ایمبولینس پوائنٹس ہمہ وقت الرٹ پر ہیں۔ان تمام انتظامات کے باوجود گرمی کی شدت کی وجہ سے انتظامیہ نے حجاج کرام کو ہدایت دی ہے کہ وہ غیر ضروری طور پر دھوپ میں نہ نکلیں، سایہ دار علاقوں میں رہیں، پانی کا استعمال جاری رکھیں اور اپنے ساتھ موجود سمارٹ ایپلیکیشنز سے رہنمائی لیتے رہیں۔واضح ہوکہ درجہ حرارت 47ڈگری سے تجاوز کرچکاہے ۔

(ایجنسیاں)
منیٰ :مناسک حج کا آج سے آغاز ہو چکا ہے۔ لبیک الہم لبیک کی صداؤں کے ساتھ پوری دنیا سے آئےعازمین حج کے مناسک اداکررہے ہیں۔وہ آج میدان عرفات میں حج کے رکن اعظم کی ادائیگی کریں گے ۔عازمین کی سہولت کیلئے سعودی حکومت کی جانب سے غیر معمولی انتظامات کیے گئے ہیں۔ اطلاع کے مطابق 180 ممالک کے تقریبا ً21لاکھ عازمین حج کی ادائیگی کے لئے ارض مقدس پہنچے ہیں جس میں ایک لاکھ 75ہزار ہندوستانی عازمین بھی شامل ہیں۔جبکہ4 لاکھ مقامی عازمین بھی اس سال فریضہ حج اداکررہے ہیں۔
حج انتظامات کو بہتر بنانے اور مسلسل لوگوں کو سہولیات فراہم کرنے کیلئے 40 مختلف حکومتی ادارے اور 3لاکھ افسران و اہلکار فرائض کے انجام دہی میں مصروف ہیں۔ وزیر حج توفیق ال رابعیہ نےبتایا کہ حجاج کے لیے 50 ہزار اسکوائر میٹر کے علاقے کو شیڈز لگا کر گرمی سے بچانے کی کوشش کی گئی ہے ، میڈیکل اسٹاف کی بڑی تعداد میں موجودگی کے ساتھ ساتھ دوائیوں کی بروقت دستیابی کو بھی یقینی بنانے کیلئے اقدامات کیے گئے ہیں جبکہ 500کولنگ یونٹس بھی قائم کر دیئے گئے ہیں۔زائرین کی بڑی تعداد یہاں موجود ہے تو اتنی بڑی تعداد میں لوگوں کو نقل و حرکت کو دیکھنے کے لیے ڈرونز اور جدید ٹیکنالوجی کا سہارا لیا گیا ہے ۔
منیٰ میں خیموں کا اپ گریڈ شدہ انفراسٹرکچر 25 لاکھ مربع میٹر پر محیط ہے، جسے سخت ترین حفاظتی معیارات کے مطابق ڈیزائن کیا گیا ہے اور یہاں 26 لاکھ سے زائد حجاج کی گنجائش موجود ہے۔ہر سال منیٰ صرف ایک میزبانی کی جگہ ہی نہیں رہتا ۔
غورطلب ہے کہ حج کا رکن اعظم وقوف عرفات آج ہوگا۔ عازمین میدان عرفات میں مسجد نمرہ میں امام صاحب سے خطبہ حج سنیں گے اور نمازِ ظہر اور عصر بیک وقت ایک اذان اورالگ الگ اقامت سے ادا کریں گے۔ وہ غروب آفتاب تک میدان عرفات میں وقوف کریں گے۔ اس کے بعد وہ مزدلفہ روانہ ہوجائیں گے اور وہاں پہنچ کر مغرب اور عشاء کی نمازیں ایک وقت میں ایک اذان اور دو اقامتوں کے ساتھ باجماعت یا الگ الگ ادا کریں گے۔
حجاج مزدلفہ میں رات کھلے آسمان تلے گذارتے ہیں ۔حجاج کرام اتوار 10ذی الحجہ کو نمازِ فجر کی ادا کرنے کے بعد سورج طلوع ہونے تک مناجات کریں گےاوردعائیں مانگیں گے ۔ اس عمل کے بعد حجاج کرام عقبہ جمرہ کو کنکریاں مارنے کیلئے منیٰ واپس آجائیں گے اور منیٰ میں حرم کی جانب واقع جمرات کمپلیکس میں صرف بڑے جمرہ یعنی بڑے شیطان کو7 عدد کنکریاں ماریں گے۔
واضح ہوکہ رمی جمرات کے بعد قربانی کا عمل ہوتا ہے اور قربانی مکمل ہونے کے بعد حجاج کرام حلق یا قصر کروا کر حالت احرام سے باہر آ جاتے ہیں۔ حج کا آخری فرض طوافِ زیارت ہے ۔ حرم پہنچ کر کعبۃ اللہ کا طواف زیارت کرتے ہیں۔پھر سعی کے بعد حجاج کرام واپس منیٰ آ جاتے ہیں اوررات منیٰ میں قیام کرتے ہیں ۔ اگلے دو دن یعنی 11 اور 12 ذی الحجہ کو زوال کے بعد تینوں جمرات کو 7، 7 کنکریاں ماری جاتی ہیں ۔ پھر 12یا 13 ذی الحجہ کی رمی کے بعد اپنی رہائش گاہوں کی طرف روانہ ہوتے ہیں۔

(پی این این)
مکہ:سہولت کے نام پر دس ہزار روپے اضافی رقم وصولنے کے بعد بھی ہندوستانی عازمین حج کی پریشانیوں میں کوئی خاص کمی نہیں آئی ہے۔ ان کی رہائش کولیکر طرح طرح کے سوال اٹھ رہے ہیں۔ ایک ہی کمرے میں 15-15 افراد کی رہائش، ٹوائلٹ کی گندگی وغیرہ وغیرہ کی شکایت ابھی ختم بھی نہیں ہوئی ہے کہ عازمین حج کو اب نئے مسائل کا سامنا کرنا پڑ رہا ہے۔حج کمیٹی آف انڈیا کی طرف سے 7 ہزار میں فراہم کی گئی ڈیجیٹل گھڑی اب ناکام ثابت ہورہی ہے۔ مکہ میں کئی عازمین حج ڈیجیٹل گھڑی کی خرابی کے شکار ہورہے ہیں۔ عازمین کے گم ہوجانے کی خبریں بھی عام ہیں۔ اس سلسلے میں کئی وڈیوز بھی وائرل ہورہے ہیں، جو ڈیجیٹل گھڑی کیخامیوں کا قصہ بیان کررہے ہیں۔
غورطلب ہے کہ عازمین کی سہولت اور تحفظ کے لئے انھیں ڈیجیٹل گھڑیاں فراہم کی گئی تھیں۔ حج کمیٹی آف انڈیا کا کہنا تھا کہ ان گھڑیوں سے عازمین کئی طرح کی پریشانیاں دور ہوں گی اور اگر کوئی عازم گم ہوجاتا ہے ، بھٹک جاتا ہے تو حج کمیٹی اسے ڈھونڈ نکالے گی۔ لیکن یہ گھڑیاں پورے طورپر ناکام ثابت ہورہی ہیں۔ عام شکایت یہ ہے کہ یہ گھڑی محض ایک گھنٹے تک چارج میں رہتی ہے اور پھر ڈسچارج ہوجاتی ہے۔ اس کے علاوہ بھی کئی تکنیکی خامیاں اس گھڑی میں ہیں۔ عازمین کو اس سے کوئی فائدہ نہیں پہنچ رہا ہے۔ سب سے بڑی بات تو یہ ہے کہ یہ ڈیجیٹل گھڑی بزرگوں اور خواتین کو بڑی تعداد میں دی گئی ہے۔ لیکن انھیں اس کی تربیت نہیں دی گئی ہے کہ کیسے اسے چلانا ہے۔ وہ اسے چلا بھی نہیں سکتے۔ غلط بٹن دب جانے سے یہ ڈیجیٹل گھڑی ہینگ کرجاتی ہے۔ ان کی پریشانی مزید بڑھ جاتی ہے۔نتیجہ یہ ہے کہ حج کمیٹی آف انڈیا کی طرف سے فراہم کی گئی گھڑی اب ایک بڑے گھوٹالے کا موضوع بن گئی ہے۔ممبئی سماج وادی پارٹی کے صدر ابوعاصم اعظمی کا کہنا ہے کہ یہ گھڑیاں جو محض ہزار ،1500 میں مل جائیں گی اسے 7ہزار میں عازمین کو فراہم کی گئیں۔ جو ایک بڑے گھوٹالے کا اشارہ کرتی ہیں۔ اس کی جانچ ہونی چاہئے۔ کانگریس کے لیڈر نانا پٹولے کا کہنا ہے کہ ڈیجیٹل گھڑی گھوٹالہ حج کمیٹی کا سب سے بڑا گھوٹالہ ہے اس کی گہرائی سے جانچ ہونی چاہئے۔ ورنہ یہ معاملہ پارلیمنٹ میں لے جایا جائے گا۔