دیوبند:انٹر میں اسکول ٹاپ کرنے والاطالب علم اعزاز سے سرفراز

(پی این این)
دیوبند:سماجی تنظیم نظر فاؤنڈیشن کی جانب سے 12ویں جماعت سی بی ایس ای کامرس میں اپنا اسکول ٹاپ کرنے والے محمد انس ولد محمد انوار احمد کو اعزاز سے نوازا گیا۔
اس موقع پر تنظیم کے صدر نجم عثمانی نے انس کو روشن مستقبل کی مبارکباد پیش کرتے ہوئے کہا کہ محنت، لگن اور صحیح رہنمائی انسان کو کامیابی کی بلندیوں تک پہنچاتی ہے۔ انہوں نے کہا کہ انس کی یہ کامیابی نہ صرف ان کے خاندان بلکہ پورے دیوبند کے لیے باعثِ فخر ہے۔نجم عثمانی نے محمد انوار احمد اور ان کی اہلیہ کو بیٹے کی شاندار کامیابی پر مبارکباد پیش کرتے ہوئے کہا کہ بچوں کی کامیابی میں والدین کی محنت، دعاؤں اور بہترین تربیت کا اہم کردار ہوتا ہے۔
ساتھ ہی انہوں نے اسپرنگ ڈیل پبلک اسکول کے منیجمنٹ اور تمام اسٹاف کو بھی مبارکباد دی اور کہا کہ اسکول کی بہترین تعلیم اور اساتذہ کی محنت کا ہی نتیجہ ہے کہ طلبہ مسلسل کامیابیاں حاصل کر رہے ہیں۔کانگریس کے سینئر لیڈر راحت خلیل نے محمد انس کو آگے بڑھتے رہنے کی ترغیب دیتے ہوئے کہا کہ تعلیم ہی وہ طاقت ہے جو انسان کو معاشرے میں عزت اور پہچان دلاتی ہے۔ انہوں نے کہا کہ انس جیسے باصلاحیت طلبہ آنے والی نسلوں کے لیے مشعلِ راہ ہیں اور انہیں اپنی محنت اسی طرح جاری رکھنی چاہیے۔سینئر صحافی نوشاد عثمانی نے محمد انس کو مبارکباد دیتے ہوئے کہا کہ آج کے دور میں تعلیم ہی کامیابی کی سب سے بڑی کنجی ہے۔
انس نے اپنی محنت، لگن اور نظم و ضبط سے یہ ثابت کر دیا ہے کہ اگر ارادے مضبوط ہوں تو کوئی بھی منزل دور نہیں ہوتی۔ انہوں نے کہا کہ انس کی یہ کامیابی دوسرے طلبہ کے لیے بھی ایک مثال ہے۔ نوشاد عثمانی نے انس کے روشن مستقبل کے لیے نیک خواہشات کا اظہار کرتے ہوئے کہا کہ وہ آگے چل کر اپنے خاندان، اسکول اور شہر کا نام روشن کریں۔اس دوران محمد جمشید علی، نواب احمد، محمد انوار، سہیل احمد، شاعر عبداللہ راز وغیرہ موجود رہے۔