(پی این این )
نئی دہلی: ملک بھر میں اس وقت شدید گرمی نے عوام کی زندگی اجیرن بنا دی ہے۔ دہلی-این سی آر اور اس کے آس پاس کے علاقوں میں پارہ 44 ڈگری سیلسیس سے تجاوز کر چکا ہے۔دہلی-این سی آر میں ایئر کوالٹی انڈیکس بھی 226 سے اوپر جا چکا ہے، جو صحت کے لیے نقصان دہ سطح ہے۔ کچھ علاقوں میں یہ 300 کے قریب پہنچ گیا ہے، جس سے لوگوں کو گرمی کے ساتھ سانس لینے میں بھی دشواری کا سامنا ہے۔قابل ذکر بات یہ ہےکہ اس شدید گرمی کے درمیان ایک اچھی خبر بھی سامنے آئی ہے۔ ماہرین کے مطابق 26 اپریل کے بعد ایک نیا مغربی سلسلہ (ویسٹرن ڈسٹربینس) فعال ہوگا، جس کے باعث درجہ حرارت میں کمی اور ہلکی بارش کا امکان ہے۔ خاص طور پر دہلی-این سی آر میں اتوار کے بعد موسم میں تبدیلی محسوس کی جا سکتی ہے۔
غورطلب ہےکہ ہفتہ کے روز کم سے کم درجۂ حرارت میں معمولی اضافہ دیکھا گیا، اسی دوران محکمۂ موسمیات نے یلو الرٹ جاری کرتے ہوئے شہر کے کچھ علاقوں میں ہیٹ ویو کے امکانات کی وارننگ دی ہے۔صفدرجنگ، جو شہر کے موسم کی نمائندگی کرتا ہے، وہاں کم سے کم درجۂ حرارت 25.2 ڈگری سیلسیس ریکارڈ کیا گیا، جو معمول سے 2.5 ڈگری زیادہ اور گزشتہ دن کے مقابلے میں 0.7 ڈگری زیادہ ہے۔
دیگر موسمی مراکز پر بھی کم سے کم درجۂ حرارت میں ہلکا اضافہ درج کیا گیا۔ یہ اس وقت سامنے آیا ہے جب ایک دن پہلے شہر کے کچھ حصوں میں سیزن کی پہلی ہیٹ ویو جیسی صورتحال دیکھی گئی تھی۔پالم میں کم سے کم درجۂ حرارت 26.8 ڈگری سیلسیس ریکارڈ ہوا، جو جمعہ کے مقابلے میں 1.2 ڈگری زیادہ ہے؛ لودھی روڈ میں 24 ڈگری سیلسیس درج کیا گیا، جو ایک دن پہلے سے 1.4 ڈگری زیادہ ہے جبکہ آیانگر میں کم سے کم درجۂ حرارت 25.1 ڈگری سیلسیس رہا، جو 1.7 ڈگری کا اضافہ ظاہر کرتا ہے۔محکمۂ موسمیات کے ایک افسر نے کہا کہ شہر کے کچھ حصوں میں ہیٹ ویو جیسی صورتحال بن سکتی ہے۔ دن کے وقت 15 سے 25 کلومیٹر فی گھنٹہ کی رفتار سے سطحی ہوائیں چل سکتی ہیں۔

(پی این این)
نئی دہلی :شاہی امام مسجد فتح پوری دہلی مولانا ڈاکٹر مفتی محمد مکرم احمد جمعہ کی نماز سے قبل خطاب میں مسلمانوں کو تاکید کی کہ خواتین کے حقوق ضرور ادا کریں حضور صلی اللہ علیہ وسلم نے خطبہ حجۃ الوداع میں خواتین کے حقوق ادا کرنے کی سخت تاکید فرمائی ہے۔
انہوں نے کہا کہ بھارت ایک سیکولر جمہوری ملک ہے جو آئین کی روشنی میں ترقی کی طرف گامزن ہے اگر یہ سیکولر جمہوری آئین نہ ہوتا تو شاید بھارت میں جو ترقی آج نظر آرہی ہے وہ نہ آتی ائین نے تعلیم کا حق سب کو دیا ہے اور ہر فرقہ کو یہ بھی حق دیا ہے کہ وہ اپنے مذہب کے مطابق عمل کرے اور اپنے بچوں کے لیے مذہبی تعلیم کا بندوبست کرے اسی لیے ہر ریاست میں مدرسوں کا قیام عمل میں آیا ہے ۔ کچھ ریاستوں میں مدرسوں کو تعصب کی نظر سے دیکھا جا رہا ہے یہ باعث افسوس ہے۔ حال ہی میں اتراکھنڈ کے وزیراعلی نے اعلان کیا ہے کہ مدرسہ بورڈ ختم کر دیا جائے گا اور تمام مدارس کو یکساں تعلیمی نظام سے متعارف کرانے کے تحت جولائی 2026 سے اتراکھنڈ تعلیمی بورڈ کے نصاب کو اپنانے کی ہدایت دی گئی ہے ہری دوار میں ایک تقریب سے خطاب کرتے ہوئے دھامی نے اس فیصلے کو تعلیم کی جدید کاری کی جانب ایک تاریخی قدم قرار دیا اور کہا جو ادارے اس پر عمل نہیں کریں گے انہیں بند کر دیا جائے گا۔
مفتی مکرم نے کہا کہ اتراکھنڈ حکومت کا یہ فیصلہ سراسر غیر آئینی ہے اتراکھنڈ تعلیمی بورڈ کا نصاب الگ ہے اور مدارس کا نصاب بالکل مختلف ہے یہ اقلیتی فرقہ کے بنیادی حقوق میں سراسر مداخلت ہے جو ناقابل برداشت ہے۔ مفتی مکرم نے مسلمانوں سے اپیل کی کہ انتظامی شفافیت کے ساتھ مدرسہ کی تعلیم کو جاری رکھا جائے یہ ہمارا بنیادی حق ہے اگر مدرسہ بورڈ ختم کیا جاتا ہے تو بھی حالات کے مطابق حسن تدبیر اور صلاح و مشورہ سے علمی خدمات کو انجام دیا جائے۔
مفتی مکرم نے مشرق وسطی میں جنگ بندی میں توسیع کا خیر مقدم کیا انہوں نے اس بات پر شدید تشویش کا اظہار کیا کہ امریکہ کی طرف سے سمندری ناکہ بندی کے نام سے کچھ ایسے اقدامات کیے جا رہے ہیں جو سراسر غیر قانونی ہیں ۔ امریکہ اور اسرائیل کو بین الاقوامی قوانین کا پابند بنانا بہت ضروری ہے ورنہ عالمی بدامنی کا خطرہ ہر وقت بنا رہے گا اس میں سب کا نقصان ہے۔

(پی این این)
نئی دہلی: دہلی کی وزیر اعلیٰ ریکھا گپتا نے محکمہ تجارت و ٹیکس میں بڑے پیمانے پر انتظامی تبدیلیاں کی ہیں۔ یہ قدم بدعنوانی اور مبینہ بے ضابطگیوں کے خلاف ان کی سخت قطعی برداشت نہ کرنےکی پالیسی کے تحت اٹھایا گیا ہے، جس کا مقصد گورننس میں شفافیت اور جوابدہی کا مضبوط پیغام دینا ہے۔
سرکاری ذرائع کے مطابق، وزیر اعلیٰ نے اس ماہ کے اوائل میں محکمے کے اپنے حالیہ دورے کے دوران سامنے آنے والی سنگین بے اضابطگیوں کا نوٹس لیتے ہوئے محکمے کے اندر بڑے پیمانے پر تبادلوں کی ہدایت دی تھی۔اس فیصلہ کن کارروائی کے تحت تین اسسٹنٹ کمشنروں سمیت تقریباً 162 افسران اور ملازمین کا تبادلہ کر دیا گیا ہے۔ایک بڑی کارروائی میں دہلی کی وزیر اعلیٰ ریکھا گپتا نے محکمہ تجارت اور ٹیکس کے 162 دیرینہ افسروں کا تبادلہ کیا۔
دہلی حکومت نے جمعہ کو کہا کہ وزیر اعلیٰ گپتا نے 8 اپریل کو محکمہ کا اچانک معائنہ کیا، جس کے دوران سنگین بے ضابطگیاں پائی گئیں، جس سے یہ کارروائی کی گئی۔ تبادلے کیے گئے افسران میں تین اسسٹنٹ کمشنرز بھی شامل ہیں۔حکومت نے بتایا کہ محکمہ سروسز نے جمعرات کو مختلف رینک کے افسران کے الگ الگ تبادلے کے احکامات جاری کیے ہیں۔ سرکاری بیان میں کہا گیا ہے، وزیر اعلیٰ کی اس سخت کارروائی کے ایک حصے کے طور پر، کل 162 افسران کے تبادلے کیے گئے ہیں۔ ان میں تین اسسٹنٹ کمشنر، 58 سیکشن آفیسر گریڈ-I، 22 اسسٹنٹ سیکشن آفیسرز گریڈ-II، 74 سینئر اسسٹنٹ گریڈ-III، اور پانچ جونیئر اسسٹنٹ گریڈ-IV شامل ہیں۔”
بیان میں مزید کہا گیا ہے کہ یہ افسران کافی عرصے سے ایک ہی جگہ پر تعینات تھے۔ سروسز ڈپارٹمنٹ کے حکم کے مطابق، ٹرانسفر کیے گئے ایڈہاک DANICS کیڈر کے اسسٹنٹ کمشنرز میں سنیتا، منوج کمار، اور سریندر سنگھ شامل ہیں۔بیان میں یہ بھی کہا گیا کہ یہ حکم نامہ جاری کرتے ہوئے وزیر اعلیٰ نے واضح کیا کہ شفافیت اور احتساب کو یقینی بنانا ان کی حکومت کی اولین ترجیح ہے اور اس میں بدعنوانی یا بے ضابطگیوں کی کوئی گنجائش نہیں ہے۔ ان میں سے بہت سے حکام طویل عرصے سے ایک ہی جگہ پر تعینات تھے۔
ان تبدیلیوں میں متعدد سیکشن آفیسرز، اسسٹنٹ سیکشن آفیسرز، سینئر اسسٹنٹس اور جونیئر اسسٹنٹس کے تبادلے بھی شامل ہیں، جس کا مقصد طویل مدتی تعیناتیوں کے سلسلے کو توڑنا اور بہتر انتظامی کارکردگی اور دیانتداری کو یقینی بنانا ہے۔وزیر اعلیٰ گپتا نے واضح کر دیا ہے کہ گورننس میں شفافیت اور جوابدہی کو یقینی بنانا حکومت کی اولین ترجیحات میں شامل ہے اور کسی بھی قسم کی بدعنوانی یا طریقہ کار کی بے ضابطگیوں کو برداشت نہیں کیا جائے گا۔ دریں اثنا، وزیر اعلیٰ مختلف محکموں اور سرکاری دفاتر کا اچانک معائنہ اور غیر اعلانیہ دورے بھی کر رہی ہیں۔ ان کوششوں کا مقصد یہ یقینی بنانا ہے کہ عوامی خدمات کو معیار، کارکردگی اور کام کی بروقت تکمیل پر توجہ دیتے ہوئے مؤثر طریقے سے فراہم کیا جائے۔