ایک دن ایسا ضرور آئے گا جب ظالموں کے گلے میں زنجیریں ہوں گی اور ملک ایک بار پھر پیار، محبت اور انصاف کے سائے میں ترقی کرے گا:مولانا ارشد مدنی
(پی این این)
نئی دہلی :آج پہلے مرحلے میں ادھم پور جموں و کشمیر میں15 نئے تعمیر شدہ مکانات کی تقسیم کے دوران سیلاب متاثرین جن میں 7 عدد بیوہ خواتین بھی شامل ہیں کو چابیاں تقسیم کرتے ہوئے صدر جمعیۃ علماء ہند مولانا ارشد مدنی نے پنجاب ہماچل اور جموں و کشمیر میں سیلاب کی وجہ سے آئی تباہی پر کہا کہ ہم مالک کائنات کے بندے ہیں ،چنانچہ اس کے ہر فیصلے پہ سر تسلیم خم کرتے ہیں۔کیوں کہ ہماری بندگی کا تقاضا بھی یہی ہے اور وہی ہے جو ہر پریشانی کا مداوا کر سکتا ہے ،تاہم اسباب کے طور پر جمعیۃعلما ہند اور اس کے خدام اور اس کی شاخیں تا بحد امکان متاثرین کی مدد کر رہی ہیں۔ انہوں نے کہا کہ کوئی بھی مصیبت یہ پوچھ کر نہیں آتی یہ کون ہندو ہے کون مسلمان ہے جب بھی کوئی مصیبت آتی ہے تو ایک ساتھ سب کو اپنی لپیٹ میں لے لیتی ہیں اسی طریقے سے ان متاثرین میں ہر مذہب کے ماننے والے شامل ہیں اور جمعیۃ علماء ہند بلا تفریق مذہب ملت سب کی مدد کر رہی ہے کیونکہ کہ انسانیت کی خدمت ہی اس کا نصب العین ہے ۔
آج چابیا ں وصول کرنے بعد مجموعی طور پر متاثرین نے کہا کہ لوگ آئے دلاسہ دے کر چلے گئے مگر کام جمعیۃ علماء ہند نے کیا۔ یہ مجموعی تاثر جموں و کشمیر کے ان سیلاب متاثرین کا ہے جن 15 لوگوں کو جمعیۃ علماء راجستھان کے تعاون سے نئے تعمیر شدہ مکانات کی چابیاں دی گئی ہیں۔ان میں سے کچھ لوگ اس قدر جذباتی ہوگئے جب ان سے ان کے تاثرات جاننے کی کوشش کی گئی تو زبان سے کچھ نہ کہہ سکے البتہ ان کی آنکھیں مارے خوشی سے چھلک پڑیں اور کہا کہ اللہ تعالی مولانا مدنی کو سلامت رکھے اور عمر وصحت میں برکت دے۔ انہوں نے ہمارے درد کو محسوس کیا۔
مولانا مدنی نے ویڈیو کانفرنسینگ کے ذریعہ مجمع کو خطاب کرتے ہوئے کہا کہ جمہوریت ہمارامشترکہ ورثہ ہے اس کا تحفظ ملک کے تمام شہریوں کی مشترکہ ذمہ داری ہے اگر ہم نے یہ ذمہ داری ادانہ کی تو یادرکھیں اس کوتاہی کے لئے ہماری آنے والی نسلیں ہمیں کبھی معاف نہیں کریگی، مولانا مدنی نے کہا کہ حالیہ دنوں میں کچھ ایسے واقعات بھی سامنے آئے ہیں جو انتہائی امیدافزاکہے جاسکتے ہیں اس طرح کے واقعات یہ بتاتے ہیں کہ اب اکثریت فرقہ کے لوگ بھی نفرت کی سیاست کے خلاف بیدارہورہے ہیں ، یہ اس بات کا اشارہ بھی ہے کہ نفرت کی سیاست کے پیچھے جو کالاسچ چھپاہواہے لوگ اسے سمجھ چکے ہیں ہمیں مکمل یقین ہے کہ ایک دن نفرت محبت سے ہارجائے گی ، انہوں نے تقریب میں موجودلوگوں سے یہ بھی کہا کہ اگر اب بھی کچھ لوگ ایسے ہیں جو بے گھر ہوچکے ہیں ہم کوشش کریں گے کہ مسلمانوں کے ساتھ برادران وطن کوبھی نیامکان بنواکر دیں ، آپ یقین رکھیں جمعیۃعلماء ہند نہ صرف آپ کے دکھ دردمیں شریک رہے گی بلکہ مصیبت میں آپ کو ہرطرح کی مددبھی مہیاکرائے گی، انہوں نے لوگوں سے تلقین کی کہ وہ ہر قیمت پر اپنے بچوں کو تعلیم سے آراستہ کریں کیونکہ آج اس طرح کے حالات ہیں اس سے مقابلہ کے لئے تعلیم ہی سب سے بڑاہتھیارہے انہوں نے کہا کہ دینی تعلیم کے ساتھ ساتھ دنیاوی تعلیم بھی بہت ضروری ہے واضح ہوکہ آج پہلے مرحلہ میں جن 15لوگوں کو نئے مکان کی چابیاں دی گئی ہیں ان میں سات عدد بیوہ خواتین بھی شامل ہیں، اس کے علاوہ 148ضرورت مند لوگوں میں راشن کٹ اوردیگر گھریلو سامان بھی تقسیم کیا گیا ان میں تیس غیر مسلم بھی شامل ہیں ۔
انہوں نے کہا فرقہ پرستوں کی کوئی بھی سازش کامیاب نہیں ہو پائے گی۔سیکولرزم اور دستور ہند کے تحفظ کے لئے جمعیۃ علماء ہندآخری دم تک جدوجہد جاری رکھے گی۔تاریخ بتاتی ہے جو قوم اپنی شناخت، تہذیب اور مذہب کے ساتھ زندہ رہنا چاہتی ہے اسے قربانی دینی پڑتی ہے۔انہوں نے کہا کہ مذہب کی بنیاد پر عوام کو تقسیم کرنا ملک کو تقسیم کرنا ہے، جو کچھ ملک میں ہو رہا ہے اس کو دیکھتے ہوئے ہمیں مجبور ہوکر کہنا پڑ رہا ہے کہ فرقہ پرست طاقتیں اسلام اور مسلمان دونوں کو مٹانے کے درپہ ہیں۔مگر انہیں شاید یہ معلوم نہیں کہ اسلام کا یہ چراغ کبھی نہیں بجھے گا اور جن لوگوں نے اسے بجھانے کی کوشش کی وہ خود بجھ گئے۔ ہم ایک زندہ قوم ہیں اور زندہ قومیں مایوسی کا شکار ہونے کے بجائے اپنی فہم و فراست، تدبر اور حکمت عملی سے اپنی کامیابی ایک نئی تاریخ رقم کرتی رہی ہے۔مولانا مدنی نے کہا کہ مو جودہ حالات سے مایوس ہونے کی ضرورت نہیں ہے جو حالات آج ہیں وہ ہمیشہ نہیں رہیں گے۔ ہر دن کے بعد سورج طلوع ہوتا ہے، اور وہ دن بھی آئے گا جب امن، بھائی چارہ اور محبت کا سورج طلوع ہوگا اور نفرت و فرقہ پرستی کا سورج غروب ہو جائے گا، کیونکہ جب ظلم اپنی انتہا کو پہنچ جاتا ہے تو سمجھ لیجیے کہ صبحِ روشن قریب ہوتی ہے، اور ایک دن ایسا ضرور آئے گا جب ظالموں کے گلے میں زنجیریں ہوں گی اور یہ ملک ایک بار پھر پیار، محبت اور انصاف کے سائے میں ترقی کرے گا۔

(پی این این)
شیلانگ میگھالیہ کے مشرقی جینتیا ہلز ضلع کے دور افتادہ علاقے میں کوئلے کی ایک غیر قانونی کان میں ڈائنامائٹ کے زبردست دھماکے میں کم از کم 10 افراد ہلاک اور ایک شدید زخمی ہو گیا۔ حکام نے خدشہ ظاہر کیا ہے کہ ملبے تلے مزید مزدور دبے ہو سکتے ہیں جس سے ہلاکتوں میں اضافے کا خدشہ ہے۔
دھماکے کی اطلاع ملتے ہی بم اسکواڈ، فرانزک ماہرین، ریاستی ڈیزاسٹر رسپانس فورس اور فائر سروس کی ٹیمیں صورتحال کا جائزہ لینے کے لیے میان سنگت تھانگسکو علاقے میں پہنچ گئیں۔ ایسٹ جینتیا ہلز کے پولیس سپرنٹنڈنٹ وکاس کمار نے یونیوارٹا کو بتایا کہ یہ ایک ڈائنامائٹ دھماکہ تھا۔ انہوں نے کہا کہ کان سے اب تک چار نعشیں نکالی گئی ہیں، جبکہ ایک زخمی شخص کو جس کے جلے ہوئے زخم ہیں، کو علاج کے لئے شیلانگ ریفر کیا گیا ہے۔ابتدائی اطلاعات کے مطابق پہاڑی پر غیر قانونی کان کنی ہو رہی تھی۔ دھماکے کی وجہ سے عمارت گر گئی، کئی کان کن دب گئے۔ اس سے قبل 23 دسمبر 2025 کو تھانگسکو گاؤں میں ایک دھماکہ ہوا تھا جس میں دو کان کن ہلاک ہو گئے تھے۔
قابل ذکر ہے کہ اپریل 2014 میں نیشنل گرین ٹربیونل نے غیر قانونی اور غیر سائنسی نوعیت کا حوالہ دیتے ہوئے میگھالیہ میں خطرناک چوہے سوراخ والے کوئلے کی کان کنی پر پابندی لگا دی تھی۔ جسٹس (ریٹائرڈ) بروجیندر پرساد کٹکے، جنہیں میگھالیہ ہائی کورٹ نے کوئلہ سے متعلق معاملات کی نگرانی کے لیے مقرر کیا تھا، کہا کہ حکومت کی جانب سے اس طرح کی غیر قانونی سرگرمیوں کو روکنے کی یقین دہانی کے باوجود، ریاست میں کوئلے کی غیر قانونی کانکنی اور نقل و حمل جاری ہے۔ تاہم، وزیر اعلیٰ کونراڈ سنگما نے اس وقت دعویٰ کیا تھا کہ ضلعی انتظامیہ چوکس ہے اور غیر قانونی کان کنی سے متعلق 1000 سے زیادہ مقدمات درج کیے گئے ہیں۔

(پی این این)
ریاض:ہندوستان کے قومی سلامتی کے مشیر اجیت ڈو بھال نے سعودی وزیر مملکت، کابینہ کے رکن اور قومی سلامتی کے مشیر ڈاکٹر موسیٰ بن محمد العیبان کے ساتھ ایک نتیجہ خیز میٹنگ کی۔
سعودی عرب میں بھارتی سفارتخانہ کی سوشل میڈیا پر ایک پوسٹ کے مطابق بات چیت میں دو طرفہ تعاون کے ساتھ ساتھ علاقائی اور باہمی دلچسپی کے دیگر امور پر تبادلہ خیال کیا گیا۔ اس سے پہلے قومی سلامتی کے مشیر اجیت ڈو بھال  ایک سرکاری دورے پر ریاض پہنچے، جو ہندوستان اور سعودی عرب کے درمیان مضبوط ہوتے ہوئے اسٹریٹجک اور سیکورٹی تعلقات کی عکاسی کرتا ہے۔
ریاض میں ہندوستانی سفارت خانے کے مطابق، ڈو بھال کا ہوائی اڈے پر سعودی عرب میں ہندوستان کے سفیر ڈاکٹر سہیل عجاز خان اور سعودی عرب کے نائب وزیر برائے سیاسی امور، سفیر ڈاکٹر سعود الساطی نے استقبال کیا۔یہ دورہ انسداد دہشت گردی اور سلامتی کے معاملات پر دوطرفہ تعاون کو مضبوط بنانے کے درمیان ہوا ہے۔ 28 جنوری کو سعودی عرب نے جموں و کشمیر کے پہلگام میں حالیہ دہشت گردانہ حملے کے ساتھ ساتھ دہلی کے لال قلعہ کے قریب دہشت گردی کے واقعہ کی مذمت کی۔اسی دن، اسٹریٹجک پارٹنرشپ کونسل کی سیاسی، قونصلر اور سیکورٹی تعاون کمیٹی کے تحت منعقدہ ہند-سعودی عرب سیکورٹی ورکنگ گروپ کی تیسری میٹنگ ریاض میں ہوئی۔
اس میٹنگ کی مشترکہ صدارت وزارت خارجہ میں جوائنٹ سیکرٹری (انسداد دہشت گردی( ونود بہادے اور سعودی عرب کی وزارت داخلہ میں قانونی امور اور بین الاقوامی تعاون کے ڈائریکٹر جنرل احمد العیسیٰ نے کی۔دونوں فریقوں نے دہشت گردی کی تمام شکلوں اور مظاہر میں اپنی سخت مذمت کا اعادہ کیا، بشمول سرحد پار دہشت گردی، اور خاص طور پر 22 اپریل 2025 کو پہلگام میں شہریوں پر حملے اور 10 نومبر 2025 کو نئی دہلی میں لال قلعہ کے قریب دہشت گردی کے واقعے کی مذمت کی۔