(پی این این)
نئی دہلی :دہلی ہوائی اڈے نے پیر کو ’خراب موسمی حالات‘‘کے پیش نظر مسافروں کے لیے ٹریول ایڈوائزری جاری کی۔ دہلی انٹرنیشنل ایئرپورٹ لمیٹڈ (DIAL) کی طرف سے جاری کردہ اس ایڈوائزری میں مسافروں کو مشورہ دیا گیا ہے کہ وہ ہوائی اڈے تک پہنچنے میں ممکنہ تاخیر سے بچنے کے لیے میٹرو سمیت سفر کے دیگر متبادل طریقوں کے استعمال پر غور کریں۔
دارالحکومت دہلی میں صبح دوبارہ بارش ہوئی اور محکمہ موسمیات نے دہلی اور این سی آر میں درمیانے سے بھاری بارش کی پیش گوئی کی ہے۔DIAL نے ٹریول ایڈوائزری میں کہا ہے کہ ہندوستانی محکمہ موسمیات کی پیشن گوئی کے مطابق دہلی میں موسم خراب رہنے کا امکان ہے۔ ہماری آن گراؤنڈ ٹیمیں تمام اسٹیک ہولڈرز کے ساتھ مل کر کام کر رہی ہیں تاکہ یہ یقینی بنایا جا سکے کہ آپ کا سفر پریشانی سے پاک ہو۔ مسافروں کو مشورہ دیا جاتا ہے کہ وہ ہوائی اڈے تک پہنچنے اور ممکنہ تاخیر سے بچنے کے لیے دہلی میٹرو سمیت ٹرانسپورٹ کے متبادل طریقوں پر غور کریں۔ اس کے ساتھ مسافروں کو مشورہ دیا جاتا ہے کہ وہ پرواز سے متعلق تازہ ترین معلومات کے لیے اپنی متعلقہ ایئر لائنز سے رابطہ کریں۔
واضح ہوکہ کہ اتوار کو دہلی کے کئی حصوں میں شدید بارش کی وجہ سے پانی جمع ہوگیا تھا اور ٹریفک جام ہوگیا تھا۔ تیز بارش کے بعد گاڑیوں کی سست رفتاری سے راجیو چوک پر ٹریفک جام ہوگیا۔دہلی میں بدھ سے مسلسل بارش کی وجہ سے اتم نگر کے بند پور سمیت کئی علاقے پانی میں ڈوب گئے ہیں اور سڑکیں پانی میں ڈوب گئی ہیں۔ شدید بارش کی وجہ سے دارالحکومت کے کئی علاقوں میں ٹریفک بھی ٹھپ ہو کر رہ گئی ہے۔

(پی این این)
نئی دہلی: عام آدمی پارٹی نے مٹیالا اسمبلی حلقے میں واقع ننگلی ڈیری کی جھگیوں کو توڑنے کی تیاری پر بی جے پی حکومت کو سخت تنقید کا نشانہ بنایا ہے۔ عام آدمی پارٹی کی سینئر رہنما اور قائدِ حزبِ اختلاف آتشی نے کہا کہ مدراسی کیمپ، جیلروالا باغ، اور بھومی ہین کیمپ کو توڑنے کے بعد اب غریب مخالف بی جے پی حکومت کی بری نظر ننگلی ڈیری کی جھگیوں پر پڑ گئی ہے۔ بی جے پی کی ایم سی ڈی نے جھگیوں میں نوٹس چسپاں کر دیا ہے اور پانچ دن کے اندر کاغذات نہ دکھانے کی صورت میں بلڈوزر چلانے کی دھمکی دی ہے۔
الیکشن سے پہلے بی جے پی کے لیڈران نے ان جھگیوں میں رات گزاری، اور جہاں جھگی، وہاں مکان کے کارڈ تقسیم کیے تھے۔ لیکن حکومت میں آتے ہی بی جے پی مسلسل غریبوں کی جھگیاں توڑ رہی ہے۔ عام آدمی پارٹی ان غریبوں کے ساتھ کھڑی ہے، اور ہم اسمبلی سے لے کر سڑک تک ان جھگیوں کو بچانے کے لیے لڑائی لڑیں گے۔ہفتے کو پارٹی ہیڈکوارٹر پر پریس کانفرنس سے خطاب کرتے ہوئے آتشی نے کہا کہ الیکشن سے پہلے بی جے پی لیڈران دہلی کی مختلف جھگیوں میں گئے، وہاں جھگی والوں کے ساتھ کھانا کھایا، بچوں کے ساتھ لوڈو اور کیرم کھیلا، اور جہاں جھگی، وہاں مکان کے کارڈ دیے۔وزیر اعظم نریندر مودی نے دہلی انتخابات سے پہلے بار بار کہا کہ دہلی کی کسی بھی جھگی کو نہیں توڑا جائے گا۔
لیکن جیسے ہی بی جے پی کی حکومت بنی، اس نے ایک کے بعد ایک غریبوں کے مکان توڑنا شروع کر دیے۔ جن جھگیوں میں جا کر جہاں جھگی، وہاں مکان کے وعدے کیے گئے تھے، انہی جھگیوں کو سب سے پہلے نشانہ بنایا گیا۔آتشی نے کہا کہ مدراسی کیمپ، جیلروالا باغ، وزیر پور اور بھومی ہین کیمپ کی جھگیاں توڑنے کے بعد اب بی جے پی حکومت ننگلی ڈیری کے جے جے کیمپ کو توڑنے کی تیاری کر رہی ہے۔ دو دن پہلے ننگلی ڈیری میں بی جے پی کے زیر انتظام ایم سی ڈی نے اس جے جے کلسٹر پر، جہاں تقریباً 250-300 جھگیاں ہیں، نوٹس چسپاں کیا ہے۔جھگی والوں سے کہا گیا ہے کہ وہ قبضہ کیے بیٹھے ہیں، اور اگر پانچ دن کے اندر اپنے دستاویزات جمع نہ کرائے گئے تو جھگیاں توڑ دی جائیں گی۔آتشی نے مزید کہا کہ بی جے پی جہاں جھگی، وہاں مکان دینے والی نہیں ہے۔ بی جے پی نے طے کر لیا ہے کہ جہاں جھگی ہو، اسے میدان بنا دیا جائے۔
اسی لیے دہلی میں ایک ایک کرکے تمام جھگیوں کو توڑا جا رہا ہے۔ننگلی ڈیری میں رہنے والے لوگ ایک دو سال سے نہیں، بلکہ پچھلے 15-20 سالوں سے دہلی میں مقیم ہیں، اور اس جے جے کیمپ میں دہلی حکومت کے DUISIB کے ذریعے گلیاں، نالیاں، ٹوائلٹ وغیرہ بنوائے جا چکے ہیں اور ان کی دیکھ بھال بھی DUISIB کر رہا ہے۔یہ حکومت کی ذمہ داری ہے کہ جھگی توڑنے سے پہلے وہاں رہنے والوں کو متبادل رہائش فراہم کرے، لیکن بی جے پی ایک غریب مخالف پارٹی ہے، جو غریبوں سے نفرت کرتی ہے اور ان کے ایک ایک کر کے گھر توڑنے میں مصروف ہے۔آخر میں آتشی نے کہا کہ عام آدمی پارٹی دہلی کے غریبوں کے ساتھ کھڑی ہے، اور ننگلی ڈیری جے جے کلسٹر کے رہائشیوں کے ساتھ بھی۔ اگر عدالت، ایم سی ڈی، اسمبلی یا سڑکوں پر بھی لڑنا پڑا تو عام آدمی پارٹی لڑے گی اور بی جے پی کو ان جھگیوں کو توڑنے نہیں دے گی۔

(پی این این)
نئی دہلی :دہلی کی وزیر اعلیٰ ریکھا گپتا نے آج اپنے اسمبلی حلقہ شالیمار باغ میں کئی ترقیاتی منصوبوں کا افتتاح کیا۔ اس میں اوور ہیڈ تاروں کو زیر زمین بجلی کے نیٹ ورک میں تبدیل کرنے کا ایک پائلٹ پروجیکٹ بھی شامل ہے۔ سی ایم نے جنتا فلیٹ علاقے میں کام کا افتتاح کیا، جہاں دہلی کے وزیر آشیش سود بھی موجود تھے۔میڈیا سے بات کرتے ہوئے سی ایم ریکھا گپتا نے کہا کہ حکومت کا مقصد دارالحکومت کو اوور ہیڈ تاروں سے پاک بنانا ہے۔
انہوں نے کہا، "اوور ہیڈ تاروں کو زیر زمین کرنا دہلی کے لیے ایک پائلٹ پروجیکٹ ہے۔ یہ ایک وژن اور آئیڈیا ہے کہ ہماری دہلی اوور ہیڈ تاروں سے پاک ہو جائے۔ مجھے خوشی ہے کہ اس پروجیکٹ کے ذریعے حکومت دہلی کے لوگوں کو ایک نئی سہولت فراہم کرنے کے لیے کام کر رہی ہے۔ ایک وقت آئے گا جب دہلی میں ایک بھی تار نظر نہیں آئے گی۔”
انہوں نے مزید کہا، "ہم ہمیشہ سوچتے تھے کہ اوور ہیڈ تاروں میں اتنا الجھا کیوں ہے- وہ زیر زمین کیوں نہیں ہو سکتے؟ ان تنگ، ہجوم والی گلیوں میں ہمیشہ چنگاریوں کا خوف رہتا ہے۔ یہ دہلی کے لیے ایک تحفہ ہے، جس کے لیے ہم نے بجٹ میں 100 کروڑ روپے مختص کیے ہیں۔”ان کا مزید کہنا تھا کہ یہاں کی گلیاں اتنی تنگ ہیں کہ دو اسکوٹر بھی ساتھ ساتھ نہیں چل سکتے، اب لوگ اوپر دیکھ کر نیلا آسمان دیکھ سکیں گے۔وزیر آشیش سود نے کہا کہ حکومت دہلی کے بجلی کے بنیادی ڈھانچے کو مضبوط بنانے اور اوور ہیڈ تاروں سے لاحق خطرات کو کم کرنے کے لیے کام کر رہی ہے۔ سود نے کہا، "وزیر اعلیٰ کی قیادت میں دہلی کو تاروں سے پاک بنانے کی کوششیں کی جا رہی ہیں۔ دہلی حکومت کے پاس سرمایہ خرچ کے نام پر صفر فنڈز تھے۔ ہم آہستہ آہستہ دہلی کے بجلی کے بنیادی ڈھانچے کو مضبوط کرنے کے لیے کام کر رہے ہیں۔ دہلی کے لوگوں کے آشیرواد سے ہم اس کام کو آگے بڑھائیں گے۔”
دریں اثناء چیف منسٹر گپتا نے بھی شدید بارش کے بعد شہر کے کئی حصوں میں پانی جمع ہونے پر تشویش کا اظہار کیا۔ انہوں نے متعلقہ محکمے کے افسران کو سخت ہدایت دی کہ وہ پانی جمع ہونے کو روکنے کے لیے موثر اقدامات کریں تاکہ مانسون کے موسم میں دہلی والوں کو پریشانی کا سامنا نہ کرنا پڑے۔ایک بیان کے مطابق وزیراعلیٰ نے اس بات پر اطمینان کا اظہار کیا کہ شدید بارشوں کے باوجود اس بار منٹو روڈ اور آئی ٹی او چوراہوں پر پانی جمع نہیں ہوا۔ انہوں نے افسران سے کہا کہ انہیں پوری دہلی میں اسی طرح کی کارکردگی دکھانی ہوگی۔ پانی جمع ہونے اور اس سے پیدا ہونے والی پریشانیوں کا حل تلاش کرنے کے لیے وزیر اعلیٰ گپتا نے تعمیرات عامہ کے وزیر پرویش ورما کے ساتھ محکمہ تعمیرات عامہ، آبپاشی، فلڈ کنٹرول ڈپارٹمنٹ اور آبپاشی سے متعلقہ محکموں کے اعلیٰ افسران کی ایک خصوصی میٹنگ طلب کی اور کہا کہ پانی جمع ہونے کے معاملے میں کسی بھی قسم کی لاپرواہی برداشت نہیں کی جائے گی۔چیف منسٹر گپتا نے کہا کہ بارش کے دوران عہدیداروں کو فوری اور موثر اقدامات کرنے ہوں گے تاکہ پانی جمع ہونے سے پیدا ہونے والی پریشانیوں پر بروقت قابو پایا جاسکے۔ انہوں نے ہدایت کی کہ سڑک کے کنارے بنائے گئے نالوں کو فوری اور مسلسل چیک کیا جائے جس سے پانی نکلتا ہے اور سڑک پر پانی جمع ہونے کا مسئلہ ختم ہوتا ہے۔