(پی این این)
پھلواری شریف: امارت شرعیہ بہار ،اڈیشہ ،جھارکھنڈ ومغربی بنگال کے قائم مقام ناظم مولانا مفتی محمد سعید الرحمن قاسمی نے وقف بچاؤ دستور بچاؤ کانفرنس منعقدہ گاندھی میدان کی تاریخ ساز کامیابی پر بہار کی ملی تنظیموں کے ذمہ داران ،خانقاہوں کے سجادگان ،مساجد کے ائمہ کرام ،علماء،دانشوران ،اہل مدارس نقباء امارت شرعیہ کے ذمہ داران ،امارت شرعیہ کے محبین ومخلصین اور ملت سے ہمدردی رکھنے والے تمام اصحاب فکر و نظر کو دلی مبارک باد پیش کرتے ہوئے کہا کہ آپ تمام حضرات کی جہد مسلسل نے اس کانفرنس کو ایک تاریخی اور یاد گار کانفرنس بنادیا ،بلاشبہ یہ کانفرنس حسب توقع پوری طرح کامیاب رہی ،بہار ،اڈیشہ ،جھارکھنڈ و مغربی بنگال کے علاوہ ملک بھرکے مسلمانوں نے پورے جوش اورجذبہ سے اس میں حصہ لیا اور ہندستان میں مسلمانوں کے آئینی حقوق کے حصول کی جدوجہد میں ایک روشن باب کااضافہ کیا ،اس کانفرنس سے ملت کے اندر خود اعتمادی او رایک نیا عزم و حوصلہ پیدا ہو ا ،اسلئے اللہ سے ہماری دعاء ہے کہ اللہ رب العزت ناپاک منصوبہ بنانے والوں کے عزائم کو چکنا چور کردے اور ملت کی ہر طرح حفاظت فرمائے ،باشندگان پٹنہ کابھی شکریہ کہ انہوں نے مہمانوں کی ضیافت کا حق ادا کیا اور مثال تاریخ رقم کردی۔
قائم مقام ناظم نے کہا کہ اس کانفرنس میں دور دراز کی مسافت طے کرنے والے فرزندان توحید بھی شکریہ کے مستحق ہیں جنہوں نے اپنے وطن کی پر سکون زندگی کو خیر باد کہہ کر محض اللہ کی رضا ء کے لئے شدت کی ڈھوپ میں گاندھی میدان میں جمع ہوئے اور ملی قائدین کے پر مغز خطابات سے استفادہ کیا ،اب ضرورت متقاضی ہےکہ ہم سب بیدار رہیں اور تحفظ اوقاف کے لئے کی جانے والی تحریکات میں شانہ نشانہ چلیں اور اس وقت تک متحرک رہیں جب تک حکومت اس کالے قانون کو واپس نہیں لے لیتی ۔
امارت شرعیہ کے تمام ذمہ داران ،کارکنان،تنظیم امارت شرعیہ کے ذمہ داران و نقباء وائمہ مساجدکاشکریہ اداکرتاہوں ،نیزشہر پٹنہ کے دینی حمیت رکھنے والے مسلمانوں کابھی شکریہ اداکرتاہوں کہ بہار،اڈیشہ ،جھارکھنڈ ومغربی بنگال اور ملک کے گوشہ گوشہ سے تشریف لانے والوں کی ضیافت میں اپنے دل کے دروازے کھول دئے اسی طرح تما م معاونین و رضاکار ان،دارالعلوم الاسلامیہ،المعہدالعالی جامعہ رحمانی مونگیر،رحمانی تھرٹی اور امارت ایجوکیشنل اینڈ ویلفیئر ٹرسٹ کے اساتذہ وطلبہ، مولاناسجاد ھاسپیٹل کے تمام حضرات ،خصوصاًاجلاس کے کنوینر مولانااحمد حسین قاسمی معاون ناظم امارت شرعیہ بھی ہمارے شکریے کے مستحق ہیں کہ ان حضرات کی کدوکاوش سے یہ عظیم الشان کامیاب کانفرنس منعقد ہوئی،اللہ تعالیٰ آپ سب کو بہتر سے بہتر اجر عطافرمائے ۔

(پی این این)
چھپرہ :الیکشن کمیشن آف انڈیا کی خصوصی نظر ثانی اور پری نظرثانی سرگرمی کے تحت پولنگ اسٹیشنوں کو ریشنلائز کرنے کے حوالے سے ڈسٹرکٹ الیکشن افسر کم ڈی ایم امن سمیر کی صدارت میں میٹنگ کا انعقاد کیا گیا۔جس میں تسلیم شدہ قومی اور ریاستی سطح کی سیاسی جماعتوں کے نمائندوں اور تمام ای آر او،اسسٹنٹ ای آر او نے شرکت کی۔اس موقع پر ایم پی جناردن سنگھ سگریوال،ایم ایل اے رامانوج پرساد،جتیندر رائے،ستیندر کمار یادو،سریندر رام خصوصی طور پر موجود تھے۔
ڈی ایم نے جانکاری دیتے ہوئے کہا کہ الیکشن کمیشن آف انڈیا کی ہدایت کے مطابق 12 سو ووٹروں کے لیے ایک بوتھ بنایا جانا ہے۔اس سے قبل ضلع میں 15 سو ووٹرز کی تعداد پر کل 3039 بوتھ تھے۔ریشنلائزیشن کے دوران کل 471 نئے بوتھس کی تعمیر کی تجویز ہے۔اس طرح یہ تعداد بڑھ کر 3510 ہو جائے گی۔انہوں نے بتایا کہ کمیشن کی ہدایات کے مطابق بوتھس کی تعمیر کے دوران اسی عمارت کو برقرار رکھنے کی کوشش کی گئی ہے۔تاکہ ووٹرز کو کسی قسم کی پریشانی کا سامنا نہ کرنا پڑے۔تمام نئے بوتھوں کو پرانی عمارت کے احاطے میں ہی قائم کرنے کی کوشش کی گئی ہے۔صرف آٹھ بوتھ کی عمارت کو تبدیل کرنے کی تجویز ہے۔انہوں نے کہا کہ کمیشن کے پروگرام کے مطابق آج پولنگ اسٹیشنوں کی فہرست شائع کر دی گئی ہے۔اعتراضات،تجاویز اور مشورے 6 جولائی تک طلب کی گئی ہیں۔متعلقہ ای آر او خود ان کی جانچ کر کے کارروائی کریں گے۔
انہوں نے سیاسی جماعتوں کے نمائندوں سے درخواست کی کہ وہ وقت سے پہلے تجاویز دیں تاکہ بروقت فیصلہ کیا جا سکے۔میٹنگ میں موجود ای آر او کو بھی تجویز یا اعتراض کنندہ سے رابطہ کرنے کی ہدایت کی گئی۔ڈی ایم نے بتایا کہ 9 اور 10 جولائی کو دوبارہ میٹنگ منعقد کی جائے گی جس میں تجاویز کے نتائج پر تبادلہ خیال کیا جائے گا۔یہ تجویز 12 جولائی کو محکمہ الیکشن کو بھیجی جائے گی۔کمیشن سے منظوری کی تاریخ 18 جولائی ہے۔پولنگ اسٹیشنوں کی حتمی فہرست یکم اگست کو شائع کی جائے گی۔اس موقع پر ڈی ایم نے خصوصی نظر ثانی کا حوالہ دیتے ہوئے واضح کیا کہ جن ووٹر کے نام 2003 کی ووٹر لسٹ میں شامل ہیں انہیں یا ان کے بیٹے،بیٹیوں کو کاغذات دینے کی ضرورت نہیں۔صرف ووٹر لسٹ کے صفحے کی خود تصدیق شدہ کاپی اپ لوڈ کرنا ہوگی۔انہوں نے بتایا کہ 2003 کی ووٹر لسٹ کمیشن کی ویب سائٹ پر شائع کر دی گئی ہے۔کوئی بھی شخص اپنا نام خود دیکھ سکتا ہے یا اپنا فارم اپ لوڈ کر سکتا ہے۔بہار یا باہر رہنے والا ووٹر بھی اپنے فارم پر دستخط کرکے ضروری دستاویزات کے ساتھ اپ لوڈ کرسکتا ہے۔انہوں نے بتایا کہ ہمارے بی ایل او پری پرنٹیڈ فارم لے کر ہر گھر اور ہر ووٹر تک پہنچ رہے ہیں۔انہوں نے بتایا کہ بی ایل او کی مدد کے لیے بی ایل او سپروائزر کی تعیناتی کے ساتھ وکاس مترا،پنچایت سیوک،ٹولہ سیوک،این ایس ایس،این سی سی،جیویکا وغیرہ کو رضاکار کے طور پر تعینات کیا گیا ہے۔انہوں نے تمام سیاسی جماعتوں سے اپیل کی کہ وہ اپنے بی ایل اوز کے ذریعے اس کام میں تعاون کریں۔
ڈپٹی الیکشن آفیسر جاوید اقبال نے بتایا کہ ایکما ودھان سبھا میں 48 نئے بوتھس شامل کرنے کی تجویز ہے۔جس کی وجہ سے پہلے سے قائم 308 بوتھس بڑھ کر 356 ہو جائیں گے۔مانجھی میں 54 نئے بوتھ شامل کرنے سے 309 بوتھس بڑھ کر 363 ہو جائیں گے۔بنیا پور میں 50 نئے بوتھ شامل کرنے سے 327 بوتھس بڑھ کر 377 ہو جائیں گے۔تریاں میں 39 نئے بوتھس شامل کرنے سے 315 بوتھس بڑھ کر 354 ہو جائیں گے۔مڑھوڑہ میں 39 نئے بوتھس شامل کرنے کی تجویز سے 294 بوتھس بڑھ کر 333 ہو جائیں گے۔چھپرہ میں 42 نئے بوتھس کی تجویز سے پہلے سے قائم 331 بوتھس بڑھ کر 373 ہو جائیں گے۔ گرکھا میں 54 نئے بوتھس بنانے سے 306 بوتھس بڑھ کر 360 ہو جائیں گے۔امنور میں 55 نئے بوتھس کی تجویز سے پہلے سے قائم 275 بوتھس بڑھ کر 330 ہو جائیں گے۔پرسا میں 46 نئے بوتھس بڑھانے سے 281 بوتھس سے 327 ہو جائیں گے۔سونپور میں 44 نئے بوتھس شامل کرنے کی تجویز ہے۔جس کی وجہ سے پہلے سے قائم 393 بوتھس بڑھ کر 337 ہو جائیں گے۔

(پی این این)
پٹنہ :شہرپٹنہ ہمیشہ سماجی واصلاحی تحریک وانقلابات کا مرکز رہاہے یہاں سے جوبھی آواز بلند ہوئی ہے وہ دورتک پہونچی ہے آج جبکہ مرکزی حکومت سیاسی قیادت کی خاطر وقف ایکٹ 25 کے ذریعہ ہماری شریعت میں مداخلت کی کوشش کررہی ہے ساتھ ہی ہم سے ہماری مذہبی آزاد ی کو چھیناجارہاہے اور ہمارے آئینی حقوق کو پامال کیاجارہاہے ،اس لئے اس نا انصافی اورآئین ودستور ھند کی خلاف ورزی کے خلاف عظیم آبادکی سرزمین سے آواز بلند ہوگی اور ان شاء اللہ اس کاوزن حکومت ھند کوبھی محسوس ہوگا،ان خیالات کا اظہار امارت شرعیہ کے امارت شرعیہ بہار،اڈیشہ ،جھارکھنڈو مغربی بنگال کے قائم مقام ناظم مولانا مفتی محمد سعیدالرحمٰن قاسمی نے اپنے اخباری بیان میں کیا۔
انہوں نے کہاکہ آج پٹنہ کے گاندھی میدان میں منعقد ہونے والی عظیم الشان وقف بچاؤ دستوربچاؤ کانفرنس سے ملی قائدین یہ پیغام دیں گے کہ اگر حکومت نے اس کالے قانون کو واپس نہیںلیاتو ملک کی عوام آئینی اورجمہوری طریقےپرتحریک اور اجتماع کرتی رہے گی جب تک کہ یہ غیر منصفانہ قانون واپس نہ ہوجائے،آج کے اجلاس کے شرکاء سے درخواست ہے کہ نظم واتحاد کامظاہرہ کریں،قیام وطعام کاجہاں نظام بنایا گیاہے یاگاڑیوں کی پارکنگ کے لئے جو جگہیں متعین کی گئی ہیں وہاں گاڑیا ں لگائیں،رضاکار آپ کی رہنمائی کے لئے ہرجگہ موجود ہیں ان کی ہدایت پر عمل کریں،اجلاس گاہ میں بھی نظم وتربیت اوراسلامی تہذیب وثقافت کے ساتھ بیٹھیں ،اور قائد ین ملت کے خطابات کو توجہ اور دل جمعی سے سماعت فرمائیں،ہمیں احساس ہے کہ آپ دوردراز کی مسافت طے کرکے یہاں تشریف لائے ہیں راستے کی صعوبتیں برادشت کی ہے اسلئے ادھر ادھر سیروسیاحت میں وقت کوہرگزضائع نہ کریں۔آپ کےجم کر اور ڈٹ کر بیٹھنے سے ملک کو اھم پیغام جائے گا کہ پٹنہ کا ،وقف اجلاس مثالی رہا،ہم سب کے امیر شریعت مولانااحمد ولی فیصل رحمانی امیرشریعت بہار،اڈیشہ ،جھارکھنڈ ومغربی بنگال اور ملک کے ممتاز علماء،وزعماء وقف کے موضوع پر بنیادی نکات کی وضاحت کریں گے،اورا سکی خطرناکی سے بھی امت کو واقف کرائیں گے اور مستقبل کے لئے مضبوط لائحہ عمل پیش کریں گے ،جس کی رہنمائی میں ہم سب کو اقدامات کرنےہیں۔اس لئے پوری دلجمعی کے ساتھ اجلاس گاہ میں بیٹھےرہیں۔
قائم مقام ناظم صاحب نے شہر پٹنہ کے اصحاب علم ودانشوروں سے بھی گزارش کی ہے کہ ماضی کی قدیم روایات کو برقرار رکھتے ہوئے اپنے مہمانوں کاخیر مقدم کریں۔ان کے اکرام وضیافت کے لئے جو ممکن کوششیں ہوسکتی ہیں کریں چونکہ شہر کی مختلف مساجد میں بیرون پٹنہ کے اصحاب کے لئے قیام وطعام کانظم کیاگیاہے ،اس لئے مقامی ذمہ دار حضرات اپنی نگرانی میںمہمانوں کو ٹھہرائیں اور ہرممکن سہولت پہونچانے کی سعی کریں اوریقین مانئے کہ آپ کے اس کارخیر کابدلہ اللہ تعالیٰ اس سے بہتر عطا فرمائیں گے ۔تمام حضرات اس عظیم الشان کانفرنس کی کامیابی کے لئے دعابھی فرمائیں۔