(پی این این)
نئی دہلی :علیمی فضیلت اور بہتر انتظامی کارکردگی کے تئیں عہد کو اجاگر کرتے ہوئے جامعہ ملیہ اسلامیہ نے ایک اہم اقدام کیا اور شیڈول ٹائم سے پہلے اینڈ سمسٹر کے امتحانات کے نتائج کا اعلان کرنا شروع کردیا ہے۔ اس پہل کے حصے کے طورپر دفتر ،کنڑولر امتحانات نے سال دوم (دوہزار چوبیس پچیس سیشن )بی ۔ایڈ اسپیشل ایجوکیشن ( بصری نقائص کے شکار )اور بی ۔ایڈ اسپیشل ایجوکیشن ( اسپیفک لرننگ ڈس ایبلیٹی) اس ہفتے کے پہلے ہی ان کے امتحانات کے نتائج کا اعلان کردیا ہے۔
پروفیسر مظہر آصف ،عزت مآب شیخ الجامعہ،جامعہ ملیہ اسلامیہ اور پروفیسر محمد مہتاب عالم رضوی،مسجل ،جامعہ ملیہ اسلامیہ نے ان نتائج کا اعلان کیا ۔قابل ذکر ہے کہ لگاتار ڈیجیٹل ترقی کے زمانے میں جامعہ ملیہ اسلامیہ کے طلبہ ،اسٹوڈینٹ پورٹل سے اپنی ای مارک شیٹ دیکھ سکتے ہیں ۔اس سے سہولت میں بھی بہتر ی آئی ہے اورساتھ ہی نتائج کی نشر و اشاعت کی کاروائی کو بھی باضابطہ کیا جاسکاہے۔اس موقع پر پروفیسر پون کمار شرما، کنٹرولر امتحانات ،جامعہ ملیہ اسلامیہ نے پروفیسر مظہر آصف اور پروفیسر رضوی کی صاحب بصیرت قیادت اور تیز کاروائی کے لیے ملنے والے تعاون کی دل کی گہرائیوں سے تعریف کی۔ امتحانات کے انعقاد اور نتائج کے پہلے اعلان میںان کے بھرپور تعاون کا اہم رول رہاہے۔ پروفیسر شرما نے ڈاکٹر احتشام الحق، ڈپٹی کنٹرولر امتحانات ،ڈاکٹر سنیل ،اسسٹنٹ کنٹرولر امتحانات اور دفتر ،کنٹرولر امتحانات کی پوری ٹیم کی مخلصانہ کوششوں اور وقت سے پہلے نتائج کے اعلان کویقینی بنانے کے لیے سخت کاوشوں اور ان کے عہد کی تعریف کی۔
اس موقع پر پروفیسر شرما نے کہا کہ ’نتائج کا بروقت اعلان ہمارے اسٹاف کے خلوص و لگن،کام کی اہلیت اور ٹیم ورک کا پختہ ثبوت ہے۔امتحان سے متعلقہ تمام کاروائیوں میں اعلی معیار کی پاس داری اور شفافیت کے ہم پابند عہد رہے “۔علمی ضابطے ،شفافیت ، کام کاج کی خوش اسلوب انجام دہی میں جامعہ مثال پیش کرتے ہوئے قیادت کررہی ہے اس کے ساتھ ہی نتائج کا قبل از وقت اعلان طلبہ کے لیے تعلیمی تجربے کو بہتر کرنے کی جامعہ کی کوششوں میں ایک اہم باب ہے۔

(پی این این)
نئی دہلی: نئی دہلی: عام آدمی پارٹی (اے اے پی) کے قومی کنوینر اور دہلی کے سابق وزیر اعلی اروند کیجریوال نے منگل کو 75 سالہ مرکزی دھارے کی سیاست کو تمام مسائل کی جڑ قرار دیتے ہوئے متبادل سیاست کی وکالت کی جس میں ترقی اور محبت کی سیاست ہونی چاہیے ۔مسٹر کیجریوال نے آج یہاں پارٹی کے طلبہ ونگ ایسوسی ایشن آف اسٹوڈنٹس فار الٹرنیٹو پولیٹکس (اے ایس پی اے ) کے آغاز کے موقع پر مرکزی دھارے اور متبادل سیاست کے درمیان فرق کی وضاحت کرتے ہوئے بھارتیہ جنتا پارٹی (بی جے پی) اور کانگریس پر حملہ کیا۔ کانسٹی ٹیوشن کلب میں پارٹی کے طلبہ ونگ کو نئے نام اور نئے انداز کے ساتھ دوبارہ لانچ کیا۔ اس کا نیا نام "ایسوسی ایشن آف اسٹوڈنٹس فار آلٹرنیٹو پالیٹکس (اے ایس اے پی)” رکھا گیا ہے۔ نوجوانوں کو مبارکباد دیتے ہوئے کیجریوال نے کہا کہ اے ایس اے پی نہ صرف طلبہ سیاست کو نئی سمت دے گا بلکہ متبادل سیاست کا مضبوط پلیٹ فارم بھی بنے گا۔ اس کے ذریعے ہم ایسی نوجوان نسل تیار کریں گے جو سیاست کی تعریف کو بدل دے گی اور ملک کی خدمت کرے گی۔ اب نوجوانوں کی توانائی تبدیلی کی سیاست میں لگے گی۔
کیجریوال نے کہا کہ گزشتہ 75 سال سے چل رہی مین اسٹریم سیاست ہی ملک کی تمام بڑی مشکلات کی جڑ ہے۔ جہاں مین اسٹریم سیاست میں تعلیم مافیا کا راج ہے، وہیں "آپ” کی متبادل سیاست میں سب کو مساوی تعلیم کا حق ملتا ہے۔ اس موقع پر پنجاب انچارج منیش سسودیا، قومی میڈیا انچارج انوراگ ڈھانڈا، رکن پارلیمان گرومیت سنگھ، انمول گگن، سینئر رہنما اودھ اوجھا، ایم ایل اے جنرل سنگھ سمیت دیگر معزز شخصیات موجود تھے۔کیجریوال نے اے ایس اے پی کا لوگو لانچ کرتے ہوئے کہا کہ طلبہ ونگ کو لانچ کرنا بڑی خوشی کی بات ہے۔ انہوں نے کہا کہ آج ملک کے سامنے بنیادی مسائل ہیں کھانے کو نہیں، تعلیم نہیں، علاج نہیں۔ 75 سال بعد بھی ملک میں اسپتال، دوائیں، سڑکیں، روزگار کی کمی ہے۔ ہر طرف بدحالی ہے، اور اس کی جڑ موجودہ سیاست ہے جسے مین اسٹریم سیاست کہا جاتا ہے۔

(پی این این)
نئی دہلی: راجدھانی کے قلب میں واقع جمعیۃ علمائے ہند کے مدنی ہال میں ایک شاندار ’میگا جاب فیئر‘کا انعقاد عمل میں آیا، جس میں مختلف تعلیمی پس منظر اور شعبوں سے وابستہ سینکڑوں نوجوانوں نے شرکت کی۔یہ روزگارمیلہ ہمدرد لرننگ اینڈ ویلفیئر سوسائٹی، ایسوسی ایشن آف مسلم پروفیشنلز، ورکنگ جرنلسٹ کلب اور جامعہ ہمدرد کے اشتراک اور تعاون سے منعقد کیا گیا۔ فیئر میں داخلہ مکمل طور پر مفت تھا اور اسے تمام مذاہب و طبقات سے تعلق رکھنے والے نوجوانوں کیلئے کھولا گیا تھا، جسے شرکاء نے بیحد سراہا۔دراصل میگاجاب فیئر میں مختلف قومی اور مقامی کمپنیوں نے شرکت کی، جنہوں نے انجینئرنگ، ٹیلی کمیونیکیشن،ہاسپیٹیلٹی،بی پی او، لاجسٹکس و دیگر شعبوں میں انٹری لیول اور تجربہ کار عہدوں کیلئے بھرتی کا عمل انجام دیا۔ امیدواروں سے براہ راست انٹرویوز لیے گئے اور موقع پر ہی ابتدائی شارٹ لسٹنگ کی گئی۔
بتادیں کہ یہ جاب ڈرائیودسویں سے لیکر پوسٹ گریجویٹ تک کے امیدواروں کیلئے تھی جس میں بڑی تعداد میں کمپنیوں نے حصہ لیا۔ اس جاب ڈرائیو کی خاصیت یہ تھی کہ یہاں نوکری دینے والے اورنوکری حاصل کرنے والوں کوروبروبیٹھادیاگیا تھا،وہیں انٹرویو ہوا اور اسی وقت تقرر بھی ہوا۔ اس جاب ڈرائیوکاافتتاح آج جمعیۃ علمائے ہند کے سیکریٹری جنرل مولانا محمد حکیم الدین قاسمی ودیگرمعزز مہمانوں کے ہاتھوں کیاگیا۔ میڈیا سے بات کرتے ہوئے کہاکہ مولانا حکیم الدین قاسمی نے کہاکہ یہ جاب فیئرنوجوانوں کو روزگار کے بہتر مواقع فراہم کرنے اور انہیں خود کفیل بنانے کی سمت ایک اہم قدم ہے، ہم بھی آگے ایسے جاب ڈرائیو کا انعقاد کریں گے۔مولانا حکیم الدین نے جاب فیئر میں شامل کمپنیوں سے بھی بات چیت کی،نوکریوں، تنخواہ اورسہولیات کے بارے میں بھی دریافت کیا۔
حکیم الدین قاسمی نے یہ بھی کہاکہ جمعیۃ کے تاریخی ہال میں منعقد ہوا یہ میگا جاب فیئر، نہ صرف روزگار فراہم کرنے کا ذریعہ ثابت ہوا بلکہ نوجوانوں کیلئے ایک عملی تربیت گاہ بھی بنا، جہاں انہوں نے پروفیشنل ماحول میں خود کو آزمایا، اس طرح کے اقدامات نہ صرف بیروزگاری کے خلاف جنگ میں مددگار ہیں بلکہ نوجوانوں میں اعتماداورخود انحصاری پیدا کرنے کا ذریعہ بھی ہیں۔ہمدرد کے ایگزیکیٹو سکریٹری شوکت مفتی نے تفصیل سے بتایا کہ ہمدردکے بانی مرحوم حکیم عبدالحمید نے 1972میں بی ای بی کی تشکیل دی تھی،جسکا مقصد تھا کہ جو لوگ بیروزگا ر ہیں، انھیں ٹریننگ دیکرروزگار سے جوڑاجائے اور ہم لوگ حکیم صاحب کے اسی مشن پرکام کرتے آرہے ہیں اور اس مشن میں ہمیں جامعہ ہمدرد کے چانسلرحماداحمد،حامداحمدمتولی ساجداحمدکابھرپورتعاون حاصل رہا ہے اورانہیں کی گائڈ لائن کے مطابق ہم کام کررہے ہیں، لہذا اب یہ تنظیم ہمدردلرننگ اینڈویلفیئر سوسائٹی ہوگئی ہے۔ انھوں نے بتایاکہ میگا جاب فیئر کا انعقادکیا گیا تھا،آگے بھی ملک کے کئی حصوں میں بھی منعقد کریں گے،لہذا ہماری کوشش ہے کہ ملک کے نوجوانوں کوروزگار فراہم کرکے انہیں خود مختار بنایا جائے۔ وہیں اے ایم پی کے سینئر رہنما فاروق احمدصدیقی نے کہاکہ ہماری جانب سے پہلے سے رجسٹرڈ امیدواروں کیلئے مفت ایمپلائبیلٹی ٹریننگ پروگرام بھی منعقد کیا گیا، جسکا مقصد نوجوانوں کو ملازمت کے انٹرویوز، سی وی کی تیاری اور کمیونیکیشن اسکلزکے حوالے سے تربیت دینا تھا۔فاروق صدیقی نے مزیدکہاکہ ہمارا مقصد صرف ملازمت فراہم کرنا نہیں بلکہ نوجوانوں کو عملی زندگی کیلئے تیار کرنا بھی ہے،لہذا ہم چاہتے ہیں کہ ہرہنرمند نوجوان کو اسکی صلاحیتوں کے مطابق روزگار ملے،باقی مستقبل میں راجدھانی کے دیگر مقامات پر بھی ایسے روزگارمیلوں کاانعقاد کیا جائیگا۔
مٹیا محل حلقہ سے ایم ایل اے حاجی آل محمد اقبال نے ہمدرد اور اے ایم پی کے اس اقدام کو سراہتے ہوئے کہا کہ یہ ایک قابل تقلید اور وقت کی اہم ضرورت ہے،ساتھ ہی انہوں نے آگے پرانی دہلی میں بھی فیئرمنعقدکرنے کی کایقین دلایا۔جوب فیئر میں شرکت کرنے والے کئی نوجوانوں نے بتایا کہ انہیں نہ صرف نوکری کے مواقع ملے بلکہ انکی رہنمائی بھی کی گئی، جو انکے مستقبل کیلئے نہایت مفید ثابت ہوگی۔فیئر میں شریک کئی نوجوانوں نے اس موقع کواپنے لیے ’زندگی بدلنے والاتجربہ‘قرار دیا۔ امیدوار محمد وسیم اور فرحان جو کہ گریجویٹ ہیں، نے کہاکہ اتنے بڑے پیمانے پر کمپنیوں سے براہ راست ملنا اور انٹرویودیناہماریلیے ایک نادر موقع تھا،میں سبھی رفاہی تنظیموں کا شکر گزار ہوں۔ پروفیسرمنجوچھگانی نے بتایا کہ 2400بچوں کو فوری نوکریاں دے دی گئیں ہیں اور قریب1500سے زائدنوجوان جنہوں نے انٹرویو دے دئے ہیں، لیکن وہ لسٹڈ ہیں،انہیں جلدہی اطلاع دے دی جائیگی۔ اس دوران مولانا غیور احمد قاسمی، مصطفی قریشی، مولانا عظیم اللہ قاسمی،مولاناکلیم صدیقی، فرزان قریشی، غفران آفریدی،امیر احمد راجہ بھائی،زران قریشی وغیرہ کلب کے ذمہ دار موجود تھے۔