(پی این این)
نئی دہلی :علیمی فضیلت اور بہتر انتظامی کارکردگی کے تئیں عہد کو اجاگر کرتے ہوئے جامعہ ملیہ اسلامیہ نے ایک اہم اقدام کیا اور شیڈول ٹائم سے پہلے اینڈ سمسٹر کے امتحانات کے نتائج کا اعلان کرنا شروع کردیا ہے۔ اس پہل کے حصے کے طورپر دفتر ،کنڑولر امتحانات نے سال دوم (دوہزار چوبیس پچیس سیشن )بی ۔ایڈ اسپیشل ایجوکیشن ( بصری نقائص کے شکار )اور بی ۔ایڈ اسپیشل ایجوکیشن ( اسپیفک لرننگ ڈس ایبلیٹی) اس ہفتے کے پہلے ہی ان کے امتحانات کے نتائج کا اعلان کردیا ہے۔
پروفیسر مظہر آصف ،عزت مآب شیخ الجامعہ،جامعہ ملیہ اسلامیہ اور پروفیسر محمد مہتاب عالم رضوی،مسجل ،جامعہ ملیہ اسلامیہ نے ان نتائج کا اعلان کیا ۔قابل ذکر ہے کہ لگاتار ڈیجیٹل ترقی کے زمانے میں جامعہ ملیہ اسلامیہ کے طلبہ ،اسٹوڈینٹ پورٹل سے اپنی ای مارک شیٹ دیکھ سکتے ہیں ۔اس سے سہولت میں بھی بہتر ی آئی ہے اورساتھ ہی نتائج کی نشر و اشاعت کی کاروائی کو بھی باضابطہ کیا جاسکاہے۔اس موقع پر پروفیسر پون کمار شرما، کنٹرولر امتحانات ،جامعہ ملیہ اسلامیہ نے پروفیسر مظہر آصف اور پروفیسر رضوی کی صاحب بصیرت قیادت اور تیز کاروائی کے لیے ملنے والے تعاون کی دل کی گہرائیوں سے تعریف کی۔ امتحانات کے انعقاد اور نتائج کے پہلے اعلان میںان کے بھرپور تعاون کا اہم رول رہاہے۔ پروفیسر شرما نے ڈاکٹر احتشام الحق، ڈپٹی کنٹرولر امتحانات ،ڈاکٹر سنیل ،اسسٹنٹ کنٹرولر امتحانات اور دفتر ،کنٹرولر امتحانات کی پوری ٹیم کی مخلصانہ کوششوں اور وقت سے پہلے نتائج کے اعلان کویقینی بنانے کے لیے سخت کاوشوں اور ان کے عہد کی تعریف کی۔
اس موقع پر پروفیسر شرما نے کہا کہ ’نتائج کا بروقت اعلان ہمارے اسٹاف کے خلوص و لگن،کام کی اہلیت اور ٹیم ورک کا پختہ ثبوت ہے۔امتحان سے متعلقہ تمام کاروائیوں میں اعلی معیار کی پاس داری اور شفافیت کے ہم پابند عہد رہے “۔علمی ضابطے ،شفافیت ، کام کاج کی خوش اسلوب انجام دہی میں جامعہ مثال پیش کرتے ہوئے قیادت کررہی ہے اس کے ساتھ ہی نتائج کا قبل از وقت اعلان طلبہ کے لیے تعلیمی تجربے کو بہتر کرنے کی جامعہ کی کوششوں میں ایک اہم باب ہے۔

(پی این این)
نئی دہلی:عام آدمی پارٹی کے سینئر لیڈر اور سابق نائب وزیر اعلیٰ منیش سسودیا، دہلی ریاستی صدر سوربھ بھاردواج اور قائدِ حزب اختلاف آتشی نے بدھ کے روز دہلی کے تمام "آپ” ایم ایل ایز سے ملاقات کی۔ اس دوران دہلی کی موجودہ صورتِ حال پر تفصیل سے گفتگو ہوئی۔
ایم ایل ایز نے بتایا کہ دہلی کے کئی علاقوں میں صاف پانی کی شدید قلت ہے۔ ہر اسمبلی حلقے میں پانی کا بحران بڑھتا جا رہا ہے۔ اس سال دہلی میں کہیں بھی نئی پانی کی پائپ لائن نہیں بچھائی گئی۔ بجلی کی فراہمی بھی بدترین صورت حال سے دوچار ہے اور طویل پاور کٹس سے عوام پریشان ہیں۔ اس موقع پر یہ طے کیا گیا کہ آپ کے ایم ایل ایز کا ایک وفد جلد ہی دہلی کی وزیر اعلیٰ ریکھا گپتا سے ملاقات کرے گا اور پانی و بجلی کے مسائل پر ان سے بات کرے گا۔ سوربھ بھاردواج نے کہا کہ دہلی کے متعدد علاقوں میں پانی کی شدید قلت ہے، اس لیے وزیر اعلیٰ سے ملاقات اب ناگزیر ہو گئی ہے۔بدھ کو منعقدہ اس ملاقات میں گفتگو کا محور بی جے پی کی چار انجن والی حکومت کے گزشتہ تین مہینوں میں بند کیے گئے ترقیاتی و فلاحی منصوبے اور بی جے پی کی جانب سے کیے گئے وعدوں کی ناکامی رہی۔ تمام ایم ایل ایز نے اپنے اپنے حلقوں میں رکے ہوئے ترقیاتی کاموں اور عوامی مسائل پر تفصیلی رپورٹ دی۔منیش سسودیا نے کہا کہ بی جے پی کی آفت زدہ حکومت کی وجہ سے دہلی کے عوام شدید مشکلات کا شکار ہیں۔ صرف تین مہینے میں تعلیمی مافیا کو کھلی چھوٹ مل گئی، اور پانی و بجلی کا نظام تباہ ہو گیا۔ بی جے پی جھوٹے وعدوں کے سہارے اقتدار میں آئی، اور ایک بھی وعدے پر عمل نہ کر سکی۔ انہوں نے کہا کہ "آپ” کے ایم ایل ایز عوام کے درمیان رہیں، ان کے دکھ درد میں شریک ہوں اور ان کے مسائل کا حل نکالیں۔ایم ایل ایز نے کہا کہ گزشتہ تین مہینوں میں بی جے پی حکومت گورننس کے میدان میں مکمل طور پر ناکام رہی ہے۔
دہلی کے عوام نے 27 سال بعد بی جے پی کو موقع دیا، لیکن اقتدار میں آتے ہی عوام کی تمام امیدوں پر پانی پھر گیا۔ انہوں نے بتایا کہ پورے دہلی میں غیر متوقع بجلی کٹوتی ہو رہی ہے، جس کی وجہ سے عوام شدید گرمی میں پریشان ہیں اور انورٹر لگانے پر مجبور ہیں۔ بی جے پی نے صاف پینے کے پانی کا وعدہ کیا تھا، لیکن آج دہلی کے کئی علاقوں میں گندہ پانی فراہم کیا جا رہا ہے۔ پانی کے ٹینکر کے لیے لوگوں کو لمبی قطاروں میں کھڑا ہونا پڑ رہا ہے۔ سیور اور نالوں کے جام ہونے کی وجہ سے بھی عوام پریشان ہیں۔ جگہ جگہ گندہ پانی سڑکوں پر بہہ رہا ہے اور کچرے کی صفائی نہ ہونے کے سبب عوام میں ناراضگی پائی جا رہی ہے۔منیش سسودیا نے کہا کہ بی جے پی نے عوام سے جھوٹ بول کر ووٹ حاصل کیے اور تین مہینے میں ایک بھی وعدہ پورا نہیں کیا۔ ایسے میں "آپ” پارٹی کی ذمہ داری مزید بڑھ جاتی ہے کہ وہ دہلی کے عوام کے ساتھ شانہ بشانہ کھڑی ہو اور پانی، بجلی، سیور اور دیگر بنیادی مسائل پر آواز اٹھائے۔ انہوں نے ایم ایل ایز سے کہا کہ وہ اپنے حلقے کے عوام سے مسلسل رابطے میں رہیں، ان کے مسائل سنیں، اور ان کا حل کریں۔ عوام کو یقین دلائیں کہ عام آدمی پارٹی اقتدار سے باہر رہ کر بھی ان کے حق کی لڑائی لڑ رہی ہے۔عام آدمی پارٹی کے دہلی صدر سوربھ بھاردواج نے کہا کہ پانی کے بحران کے حوالے سے آپ کا نمائندہ وفد جلد وزیر اعلیٰ ریکھا گپتا سے ملاقات کرے گا۔ آتشی: عوام چار انجن والی بی جے پی حکومت سے تنگ آ چکی ہے، کیجریوال حکومت کو یاد کر رہی ہے۔
. قائد حزب اختلاف آتشی نے کہا کہ دہلی کی عوام بی جے پی کی چار انجن حکومت سے بیزار ہو چکی ہے اور وہ کیجریوال حکومت کو یاد کر رہی ہے جو حقیقی معنوں میں عوامی مسائل کے حل پر یقین رکھتی تھی۔

(پی این این)
نئی دہلی: نئی دہلی: عام آدمی پارٹی (اے اے پی) کے قومی کنوینر اور دہلی کے سابق وزیر اعلی اروند کیجریوال نے منگل کو 75 سالہ مرکزی دھارے کی سیاست کو تمام مسائل کی جڑ قرار دیتے ہوئے متبادل سیاست کی وکالت کی جس میں ترقی اور محبت کی سیاست ہونی چاہیے ۔مسٹر کیجریوال نے آج یہاں پارٹی کے طلبہ ونگ ایسوسی ایشن آف اسٹوڈنٹس فار الٹرنیٹو پولیٹکس (اے ایس پی اے ) کے آغاز کے موقع پر مرکزی دھارے اور متبادل سیاست کے درمیان فرق کی وضاحت کرتے ہوئے بھارتیہ جنتا پارٹی (بی جے پی) اور کانگریس پر حملہ کیا۔ کانسٹی ٹیوشن کلب میں پارٹی کے طلبہ ونگ کو نئے نام اور نئے انداز کے ساتھ دوبارہ لانچ کیا۔ اس کا نیا نام "ایسوسی ایشن آف اسٹوڈنٹس فار آلٹرنیٹو پالیٹکس (اے ایس اے پی)” رکھا گیا ہے۔ نوجوانوں کو مبارکباد دیتے ہوئے کیجریوال نے کہا کہ اے ایس اے پی نہ صرف طلبہ سیاست کو نئی سمت دے گا بلکہ متبادل سیاست کا مضبوط پلیٹ فارم بھی بنے گا۔ اس کے ذریعے ہم ایسی نوجوان نسل تیار کریں گے جو سیاست کی تعریف کو بدل دے گی اور ملک کی خدمت کرے گی۔ اب نوجوانوں کی توانائی تبدیلی کی سیاست میں لگے گی۔
کیجریوال نے کہا کہ گزشتہ 75 سال سے چل رہی مین اسٹریم سیاست ہی ملک کی تمام بڑی مشکلات کی جڑ ہے۔ جہاں مین اسٹریم سیاست میں تعلیم مافیا کا راج ہے، وہیں "آپ” کی متبادل سیاست میں سب کو مساوی تعلیم کا حق ملتا ہے۔ اس موقع پر پنجاب انچارج منیش سسودیا، قومی میڈیا انچارج انوراگ ڈھانڈا، رکن پارلیمان گرومیت سنگھ، انمول گگن، سینئر رہنما اودھ اوجھا، ایم ایل اے جنرل سنگھ سمیت دیگر معزز شخصیات موجود تھے۔کیجریوال نے اے ایس اے پی کا لوگو لانچ کرتے ہوئے کہا کہ طلبہ ونگ کو لانچ کرنا بڑی خوشی کی بات ہے۔ انہوں نے کہا کہ آج ملک کے سامنے بنیادی مسائل ہیں کھانے کو نہیں، تعلیم نہیں، علاج نہیں۔ 75 سال بعد بھی ملک میں اسپتال، دوائیں، سڑکیں، روزگار کی کمی ہے۔ ہر طرف بدحالی ہے، اور اس کی جڑ موجودہ سیاست ہے جسے مین اسٹریم سیاست کہا جاتا ہے۔