​(پی این این )
حصار:ہریانہ کے حصار کی رہائشی جیوتی رانی کو پاکستان کے لیے جاسوسی کے الزام میں گرفتار کیا گیا ہے۔ اس لڑکی کو جیوتی ملہوترا کے نام سے بھی جانا جاتا ہے۔ جیوتی ایک ٹریول بلاگر اور یوٹیوبر ہیں، جن کا یوٹیوب چینل ‘ٹریول ود جو’ کافی مشہور ہے۔ اس کے چینل کے 3 لاکھ 77 ہزار سے زیادہ سبسکرائبر ہیں۔ جیوتی پر پاکستانی خفیہ ایجنسیوں کے ساتھ حساس معلومات شیئر کرنے کا الزام ہے۔ اب حصار پولیس نے اس کے خلاف متعلقہ دفعات کے تحت مقدمہ درج کر لیا ہے۔ وہ حصار کے رہنے والے حارث کمار کی بیٹی ہے۔
جیوتی نے 2023 میں ویزا ایجنٹوں کے ذریعے دو بار پاکستان کا سفر کیا تھا۔ اس دوران اس کی ملاقات دہلی میں پاکستانی ہائی کمیشن کے ملازم احسان الرحیم عرف دانش سے ہوئی۔ 13 مئی کو، دانش کو ہندوستانی حکومت نے ناپسندیدہ شخص قرار دے کر ملک سے نکال دیا تھا۔ یہ دانش ہی تھا جس نے جیوتی کو پاکستانی انٹیلی جنس اہلکاروں سے ملوایا۔
تحقیقات میں معلوم ہوا ہے کہ جیوتی رانی نے ہندوستانی مقامات سے متعلق حساس معلومات پاکستان کو شیئر کیں۔ انہوں نے سوشل میڈیا پر پاکستان کے مثبت امیج کو فروغ دیا۔ مزید برآں، جیوتی نے ایک پاکستانی آپریٹو کے ساتھ قریبی تعلقات استوار کیے اور اس کے ساتھ بالی، انڈونیشیا کا سفر بھی کیا۔اس معاملے میں جیوتی سمیت 6 لوگوں کو گرفتار کیا گیا تھا، جن میں دیگر ملزمان کا تعلق پنجاب اور ہریانہ سے ہے۔

​(پی این این )
نئی دہلی:مرکزی حکومت نے آپریشن سندور اور سرحد پار دہشت گردی کے خلاف پاکستان کی قلعی کھولنے کے لیےکل جماعتی اراکین پارلیمنٹ کے 7 وفود تشکیل دیے ہیں۔ یہ وفد دنیا کے بڑے ممالک بالخصوص اقوام متحدہ کی سلامتی کونسل (یو این ایس سی) کے رکن ممالک کا دورہ کرے گا۔
وزارت پارلیمانی امور نے وفد کی قیادت کرنے والے ارکان پارلیمنٹ کے نام جاری کر دیئےہیں۔ اس میں کانگریس کے واحد رکن پارلیمنٹ ششی تھرور کا نام بھی شامل ہے۔ اب کانگریس نے کہا ہے کہ اس نے تھرور کا نام مرکز کو نہیں دیا تھا۔
کانگریس لیڈر جے رام رمیش نے X پر لکھا، ‘ پارلیمانی امور کے وزیر کرن رجیجو نے کانگریس صدر ملکارجن کھڑگے اور اپوزیشن لیڈر راہل گاندھی سے بات کی۔ انہوں نے بیرون ملک بھیجے جانے والے وفد کے لیے 4 ارکان پارلیمنٹ کے نام مانگے تھے۔ کانگریس نے آنند شرما، گورو گگوئی، ڈاکٹر سید نصیر حسین اور راجہ برار کے نام دیے تھے۔
دوسری طرف ششی تھرور نے وفد کی قیادت کرنے کی ذمہ داری دینے پر مرکز کاشکریہ اداکیاہے۔ انہوں نے X پر لکھا، ‘حالیہ پیش رفت پر اپنے ملک کا نقطہ نظر پیش کرنے کے لیے پانچ بڑے ممالک کے دارالحکومتوں میں آل پارٹی وفد کی قیادت کرنے کے لیے حکومت ہند کی دعوت سے میرے لیے ایک اعزازہے۔ جب قومی مفاد کی بات ہو اور میری خدمات درکار ہوں تو میں پیچھے نہیں رہوں گا۔’
اس سے قبل ششی تھرور نے 8 مئی کو مرکزی حکومت کی تعریف کی تھی۔انھوں نے کہا تھا کہ آپریشن سندور پاکستان اور دنیا کے لیے ایک مضبوط پیغام ہے۔
اطلاع کے مطابق 7 کُل جماعتی نمائندہ وفد اس ماہ کے آخر میں اہم شراکت دار ممالک کا دورہ کرنے والے ہیں۔ جو 7 وفود تشکیل دی گئی ہیں، ان کی قیادت ششی تھرور (کانگریس)، روی شنکر پرساد (بی جے پی)، سنجے کمار جھا (جنتا دل یو)، بیجینت پانڈا (بی جے پی)، کنی موژی کروناندھی (ڈی ایم کے)، سپریا سولے (این سی پی) اور شریکانت ایکناتھ شندے (شیوسینا) کو سونپی گئی ہے۔

​(پی این این )

نئی دہلی:دہلی میں عام آدمی پارٹی کو بڑا جھٹکا لگا ہے۔ پارٹی کے 13 میونسپل کونسلروں نے استعفیٰ دے دیا ہے۔ ان سب نے نئی پارٹی بنانے کا بھی اعلان کیا ہے۔ اپنے استعفیٰ کا اعلان کرتے ہوئے کونسلروں نے عام آدمی پارٹی کی اعلیٰ قیادت پر میونسپل کارپوریشن کو صحیح طریقے سے چلانے کے قابل نہ ہونے کا الزام لگایا ہے۔ اس کے ساتھ انہوں نے یہ بھی کہا ہے کہ عوام سے کیے گئے وعدے پورے نہ کرنے کی وجہ سے ہم پارٹی کی بنیادی رکنیت سے استعفیٰ دے رہے ہیں۔
نئی پارٹی کا اعلان کرتے ہوئے کونسلروں نے کہا کہ ان کی پارٹی کا نام اندرا پرستھ وکاس پارٹی ہوگا اور مکیش گوئل کو پارٹی کا سربراہ منتخب کیا گیا ہے۔ کونسلروں نے بتایا کہ ہم سبھی میونسپل کونسلر دہلی میونسپل کارپوریشن میں سال 2022 میں عام آدمی پارٹی کے ٹکٹ پر منتخب ہوئے تھے لیکن 2022 میں دہلی میونسپل کارپوریشن میں اقتدار میں آنے کے باوجود پارٹی کی اعلیٰ قیادت دہلی میونسپل کارپوریشن کو آسانی سے چلانے میں ناکام رہی۔ اعلیٰ قیادت اور میونسپل کونسلرز کے درمیان تقریباً کوئی تال میل نہیں تھا جس کی وجہ سے پارٹی اپوزیشن میں آگئی۔ عوام سے کیے گئے وعدے پورے نہ کرنے کی وجہ سے ہم مندرجہ ذیل کونسلرز پارٹی کی بنیادی رکنیت سے مستعفی ہو رہے ہیں۔
انہوں نے مزید کہا کہ ہم میونسپل کونسلر اپنی پارٹی بنا رہے ہیں جس کا نام اندرا پرستھ وکاس پارٹی ہو گا اور ہم اس کے ذریعے کئے گئے فیصلوں سے مکمل اتفاق کرتے ہیں۔ ہم سب مکیش گوئل جی کو اپنی پارٹی کا لیڈر تسلیم کرتے ہیں۔ انہوں نے بتایا کہ آج ہیم وند گوئل جی کی صدارت میں ایک میٹنگ ہوئی جس میں 13 میونسپل کونسلروں نے مکیش گوئل جی کو اندرا پرستھ وکاس پارٹی کا لیڈر منتخب کیا۔
عام آدمی پارٹی سے مستعفی ہونے والے 13 کونسلروں میں مکیش گوئل، ہمانی جین، دیویندر کمار، راجیش کمار لاڈی، سمن انیل رانا اور دنیش بھردواج شامل ہیں۔