JNUSU انتخابات کی الٹی گنتی تیز , صدر عہدے کے لیے 48 طلبہ نے کاغذات نامزدگی کیے داخل

(پی این این)
نئی دہلی :جواہر لال نہرو یونیورسٹی اسٹوڈنٹس یونین (جے این یو ایس یو) کے انتخابات کی الٹی گنتی تیز ہوگئی ہے۔ جے این یو میں طلبہ یونین کے انتخابات کے لیے نامزدگی ہوئی۔ صدر کے عہدے کے لیے سب سے زیادہ 48 طلبہ نے کاغذات نامزدگی داخل کیے۔ کاغذات نامزدگی واپس لینے کی آخری تاریخ 16اپریل ہے۔

جے این یو اسٹوڈنٹس یونین کے انتخابات 25 اپریل کو ہوں گے اور نتائج کا اعلان 28 اپریل کو کیا جائے گا۔جے این یو اسٹوڈنٹس یونین الیکشن کمیٹی کو سینٹرل پینل کے چار عہدوں کے لیے 160 سے زیادہ نامزدگیاں موصول ہوئی ہیں، جب کہ 16 اسکولوں میں ‘اسکول کونسلر’ کے عہدوں کے لیے 250 طلبہ نے اپنے کاغذات نامزدگی داخل کیے ہیں۔ الیکشن کمیٹی کے مطابق صدر کے عہدے کے لیے 48، نائب صدر کے عہدے کے لیے 41، جنرل سیکریٹری کے عہدے کے لیے 42 اور جوائنٹ سیکریٹری کے عہدے کے لیے 34 کاغذات نامزدگی موصول ہوئے۔ اس طرح سینٹرل پینل کے لیے 165 امیدوار میدان میں ہیں۔ ج

جے این یو طلبہ یونین کے انتخابات کے لیے پرچہ نامزدگی داخل کرنے کا عمل منگل کو مکمل ہو گیا تھا جبکہ نامزدگی واپس لینے کی آخری تاریخ بدھ ہے۔ اس کے بعد سہ پہر تین بجے امیدواروں کی حتمی فہرست جاری کی جائے گی۔جے این یو اسٹوڈنٹس یونین کے الیکشن آفیسر وکاس کمار نے کہا کہ ‘جنرل باڈی میٹنگز’ (جی بی ایم) اسکول کی سطح پر 17 اور 21 اپریل کو منعقد ہوں گی۔

22 اپریل کو یونیورسٹی بھر میں جی بی ایم کے لیے تاریخ کے طور پر منتخب کیا گیا ہے، جب کہ صدارتی مباحثہ 23 اپریل کو ہوگا۔انہوں نے کہا کہ 24 اپریل کو کوئی انتخابی مہم نہیں ہوگی، 25 اپریل کو دو سیشنز میں ووٹنگ ہوگی۔پہلے سیشن میں صبح 9 بجے سے ایک بجے تک اور دوسرے سیشن میں دوپہر 2:30 سے5:30 بجے تک ووٹنگ ہوگی۔ ووٹوں کی گنتی اسی رات 9 بجے شروع ہوگی اور حتمی نتائج کا اعلان 28 اپریل کو کیا جائے گا۔اتوار 13 اپریل کو جے این یو اسٹوڈنٹس یونین الیکشن کمیٹی کی طرف سے جاری ووٹر لسٹ کے مطابق اس سال ہونے والے انتخابات میں 7906 طلبہ ووٹ ڈالنے کے اہل ہیں۔ ووٹرز کے اعداد و شمار کے مطابق رجسٹرڈ ووٹرز میں 43 فیصد خواتین ہیں، جبکہ باقی مرد ہیں۔قابل ذکر بات یہ ہے کہ پچھلے سال جے این یو ایس یو کے انتخابات چار سال کے وقفے کے بعد 22 مارچ 2024 کو ہوئے تھے۔ متحدہ بائیں اتحاد نے مرکزی پینل کے چار میں سے تین عہدوں پر کامیابی حاصل کی تھی، جبکہ برسا امبیڈکر پھولے اسٹوڈنٹس یونین (بی اے پی ایس اے) نے چوتھی پوزیشن حاصل کی تھی۔

رپورٹ کے مطابق طلبا نے منگل کو دن بھر کیمپس میں اپنی اپنی تنظیموں کے لیے مہم چلائی۔ قوی امکان ہے کہ اس بار بھی بائیں بازو کی تنظیمیں طلبہ یونین کے انتخابات مل کر لڑیں گی۔ اکھل بھارتیہ ودیارتھی پریشد نے جے این یو طلبہ یونین کے انتخابات کے لیے اپنے ممکنہ امیدواروں کا اعلان کر دیا ہے۔اس بار اے بی وی پی سے تھیٹے شمبھوی پرمود، انوج دمادا، کنال رائے، وکاش پٹیل، راجیشور کانت دوبے، شیکھا سوراج، نیتو گوتم، ارون شریواستو اور آکاش کمار راوانی میدان میں ہیں۔ ان تمام ممکنہ امیدواروں نے منگل کو اپنے کاغذات نامزدگی داخل کئے۔
کاغذات نامزدگی کی جانچ کے بعد جے این یو اسٹوڈنٹس یونین سینٹرل پینل کے لیے ان ناموں میں سے چار ناموں کا فیصلہ کیا جائے گا۔ اے بی وی پی اور بائیں بازو کی طلبہ تنظیمیں کیمپس کے مسائل کو لے کر طلبہ سے ملاقات کر رہی ہیں۔