ایودھیا کو لوٹنے کے بعد اب مہاکال کی اُجین کوبھی جارہا ہے لوٹا :سسودیا

نئی دہلی:ایودھیا میں رام مندر کے چندے کی مبینہ چوری کے معاملے کے درمیان اب اُجین میں زمینی گھوٹالے کا معاملہ سامنے آنے پر عام آدمی پارٹی نے ای ڈی پارٹی کو سخت تنقید کا نشانہ بنایا ہے۔ آپ کےلیڈر منیش سسودیااور دہلی پردیش صدر سوربھ بھاردواج نے کہا کہ پربھو شری رام کی نگری ایودھیا کے بعد اب ای ڈی پارٹی کے لوگ مہاکال کی اُجین کو لوٹ رہے ہیں۔ انہوں نے کہا کہ مدھیہ پردیش کے وزیر اعلیٰ موہن یادو اور ان کے خاندان کے افراد اُجین اور اس کے اطراف بڑے پیمانے پر زمینیں خرید رہے ہیں۔ سرکاری فیصلوں سے متعلق اندرونی معلومات انہیں پہلے ہی حاصل تھیں اور اب یہ خاندان ہزاروں کروڑ روپے کمائے گا۔ منگل کے روز ایکس پر آپ کے دہلی پردیش صدر سوربھ بھاردواج نے کہا کہ پربھو شری رام کی ایودھیا کو لوٹنے کے بعد اب مہاکال کی اُجین کو لوٹا جا رہا ہے۔ مدھیہ پردیش کے وزیر اعلیٰ موہن یادو اور ان کے خاندان کے افراد اُجین اور اس کے آس پاس بڑے پیمانے پر زمینیں خرید رہے ہیں۔ ظاہر ہے کہ سرکاری فیصلوں کے نتیجے میں ان زمینوں کو ہونے والے فائدے کی اندرونی معلومات انہیں پہلے سے حاصل تھیں۔ اس طرح یہ خاندان ہزاروں کروڑ روپے کمائے گا اور بعد میں اس رقم کو ریئل اسٹیٹ کے کاروبار سے حاصل ہونے والی آمدنی بتا کر جائز قرار دیا جائے گا۔ بی جے پی کے لیے تو شرم کا لفظ بھی بہت چھوٹا ہے۔عام آدمی پارٹی کے پنجاب انچارج اور دہلی کے سابق نائب وزیر اعلیٰ منیش سسودیا نے کہا کہ مودی جی بھی ایک سے بڑھ کر ایک لیڈر کا انتخاب کرتے ہیں۔ زمینی گھوٹالوں سے لے کر رام مندر میں چڑھائے گئے چندے کی مبینہ ڈکیتی تک، ان کے لیڈر ہر معاملے میں ماہر ہیں۔ اب اپنے رشتہ داروں کے فائدے کے لیے زمینی گھوٹالا کروانے والے مدھیہ پردیش کے وزیر اعلیٰ بھی مودی جی ہی کی پسند تھے، تو پھر ان سے استعفیٰ کون لے گا؟