نشہ سے پاک معاشرے کی تعمیر میں یوگاکاکلیدی کردار: پروفیسر اجے تنیجا، خواجہ معین الدین چشتی لینگویج یونیورسٹی میں آٹھ روزہ یوگ تربیتی پروگرام کا آغاز

(پی این این)
لکھنؤ:خواجہ معین الدین چشتی لینگویج یونیورسٹی میں انسدادمنشیات مہم کے تحت صحت مند، باشعور اور نشہ سے پاک معاشرے کی تشکیل کے عزم کے ساتھ ایک اہم اقدام کرتے ہوئے وائس چانسلر پروفیسر اجے تنیجا کی رہنمائی میں شعبۂ فزیکل ایجوکیشن کے زیر اہتمام ہفتہ کے روز چندر شیکھر آزاد جمنازیم میں واقع یوگ مرکز پر آٹھ روزہ یوگ مشق پروگرام کا باقاعدہ افتتاح کیا گیا۔اس پروگرام کی افتتاحی تقریر میں وائس چانسلر پروفیسر اجے تنیجانے کہا کہ موجودہ دور میں منشیات کا بڑھتا ہوا رجحان نوجوان نسل اور معاشرے کے لیے ایک سنگین چیلنج ہے، جس کا مقابلہ صرف قانونی اقدامات سے نہیں بلکہ جسمانی، ذہنی اور اخلاقی تربیت کے ذریعے بھی کیا جا سکتا ہے۔
انہوں نے کہا کہ یوگ ایک ایسا مؤثر ذریعہ ہے جو انسان کو جسمانی صحت، ذہنی یکسوئی، خود نظم و ضبط اور مثبت طرزِ فکر عطا کرتا ہے۔ اگر نوجوان یوگ کو اپنی روزمرہ زندگی کا حصہ بنائیں تو وہ نہ صرف منشیات جیسی سماجی برائیوں سے خود کو محفوظ رکھ سکتے ہیں بلکہ دوسروں کے لیے بھی ایک مثبت مثال بن کر نشہ سے پاک معاشرے کی تشکیل میں اہم کردار ادا کر سکتے ہیں۔ انہوں نے اس بات پر زور دیا کہ انسدادِ منشیات مہم کو عوامی تحریک بنانے کے لیے تعلیمی اداروں کا فعال کردار نہایت ضروری ہے، اور یونیورسٹی اس مقصد کے لیے مسلسل آگاہی اور صحت افزا سرگرمیوں کا انعقاد کرتی رہے گی۔
اس موقع پر شعبۂ فزیکل ایجوکیشن کے صدر ڈاکٹر محمد شارق نے طلبہ سے خطاب کرتے ہوئے پروگرام کی اہمیت اور افادیت پر روشنی ڈالی۔ انھوں نے کہا کہ یوگ جسمانی صحت، ذہنی سکون اور روحانی توازن کا بہترین ذریعہ ہے۔ باقاعدہ یوگ انسان کو نہ صرف جسمانی طور پر توانا بناتا ہے بلکہ ذہنی دباؤ، اضطراب اور منفی رجحانات سے بھی محفوظ رکھتا ہے۔ انہوں نے کہا کہ موجودہ دور میں نوجوانوں کو منشیات جیسی سماجی برائیوں سے دور رکھنے کے لیے یوگ ایک مؤثر اور مثبت ذریعہ ہے۔ اگر طلبہ اپنی روزمرہ زندگی میں یوگ کو شامل کریں تو وہ صحت مند، بااعتماد اور باکردار شخصیت کے حامل بن سکتے ہیں اور ایک نشہ سے پاک، صحت مند اور ترقی یافتہ معاشرے کے قیام میں مؤثر کردار ادا کر سکتے ہیں۔بعد ازاں یوگ ٹرینر اور شعبۂ فزیکل ایجوکیشن کے اسسٹنٹ پروفیسر ڈاکٹر حسن مہدی نے اساتذہ، طلبہ، افسران اور ملازمین کو مختلف یوگ آسنوں، سانس لینے کی درست تکنیکوں اور مراقبے کے طریقوں کی عملی مشق کرائی۔ انھوں نے باقاعدہ یوگ کرنے کے سائنسی اور عملی فوائد سے بھی شرکا کو آگاہ کیا اور بتایا کہ یوگ نہ صرف جسمانی فٹنس کو بہتر بناتا ہے بلکہ ذہنی تناؤ کو کم کرکے صحت مند اور متوازن طرزِ زندگی اختیار کرنے میں بھی معاون ثابت ہوتا ہے۔اس کے علاوہ شعبۂ ہندی میں ڈاکٹر جہاں آرا کی نگرانی انسداد منشیات مہم کے تحت پروگرام کا بھی انعقاد کیا گیا۔
اس موقع پر ڈاکٹر محمد شارق نے یہ خبر بھی دی کہ یہ یوگ مشق پروگرام یکم اگست سے 8 اگست 2026 تک روزانہ صبح 11:00بجے چندر شیکھر آزادجمنازیم واقع یوگ مرکز میں منعقد ہوگا۔ یونیورسٹی کے تمام افسران، ملازمین اور طلبہ سے اپیل کی گئی ہے کہ وہ باقاعدگی سے اس پروگرام میں شرکت کرکے صحت مند اور نشہ سے پاک کیمپس کی تعمیر میں اپنا بھرپور تعاون کریں۔