ملک میں خالص پٹرول ملنا چاہیے 82روپےفی لیٹر: کجریوال

نئی دہلی: عام آدمی پارٹی کے قومی کنوینر اروند کجریوال نے ملک میں 102 روپے فی لیٹر فروخت ہونے والے ای-20 بلینڈڈ پٹرول کی قیمت کو لے کر مرکزی حکومت کو نشانہ بنایا۔ انہوں نے کہا کہ ملک میں خالص پٹرول 82 روپے فی لیٹر ملنا چاہیے، لیکن حکومت عوام کو 102 روپے فی لیٹر میں ای-20 پٹرول فروخت کر رہی ہے۔ بین الاقوامی بازار میں خام تیل کی قیمت اس وقت 70 ڈالر فی بیرل ہے۔ اس قیمت کے حساب سے پٹرول تیار کرنے کی لاگت تقریباً 42 روپے فی لیٹر بنتی ہے۔ اگر تمام ٹیکس بھی شامل کر لیے جائیں تب بھی خالص پٹرول 82 روپے فی لیٹر اور ای-20 پٹرول تقریباً 70 روپے فی لیٹر میں دستیاب ہونا چاہیے۔ اسی حساب سے ڈیزل کی قیمتیں بھی کم ہونی چاہئیں۔ اروند کیجریوال نے کہا کہ پٹرول اور ڈیزل کی قیمتوں کا مہنگائی پر براہِ راست اثر پڑتا ہے۔ اگر ان کی قیمتیں کم ہوں گی تو مہنگائی بھی خود بخود کم ہو جائے گی۔ انہوں نے کہا کہ تیل کمپنیاں پہلے بھی 77 ہزار کروڑ روپے کا منافع کما چکی ہیں اور اب بھی مسلسل منافع کما رہی ہیں، لیکن چند دن جاری رہنے والی جنگ کا بہانہ بنا کر عوام سے غیر ضروری طور پر زیادہ قیمت وصول کی جا رہی ہے۔ عام آدمی پارٹی کے مرکزی دفتر میں پریس کانفرنس سے خطاب کرتے ہوئے اروند کیجریوال نے کہا کہ بین الاقوامی بازار میں خام تیل کی قیمت 115 ڈالر فی بیرل سے گھٹ کر 70 ڈالر فی بیرل رہ گئی ہے۔ فروری، مارچ، اپریل اور مئی کے دوران قیمت تقریباً 115 ڈالر فی بیرل تھی، لیکن اب یہ کم ہو کر 70 ڈالر فی بیرل پر آ گئی ہے۔ دوسری جانب، ملک میں مئی کے دوران ای-20 پٹرول کی قیمت 102 روپے فی لیٹر مقرر کی گئی تھی اور آج بھی وہی قیمت برقرار ہے۔ انہوں نے کہا کہ جب خام تیل کی قیمت میں اتنی بڑی کمی آئی ہے تو ملک میں پٹرول کی قیمت بھی کم ہونی چاہیے۔ ہماری کیلکولیشن کے مطابق اس وقت پٹرول کی قیمت 82 روپے فی لیٹر یا اس سے بھی کم ہونی چاہیے، اور اس قیمت پر ای-20 نہیں بلکہ خالص پٹرول دستیاب ہونا چاہیے۔انہوں نے وضاحت کرتے ہوئے کہا کہ خام تیل کی موجودہ قیمت 70 ڈالر فی بیرل ہے۔ اگر اسے موجودہ شرح مبادلہ کے مطابق روپے میں تبدیل کیا جائے تو خام تیل کی قیمت تقریباً 42 روپے فی لیٹر بنتی ہے۔ اس کے بعد ریفائننگ، آئل مارکیٹنگ کمپنیوں (او ایم سی) کے مارجن اور ٹرانسپورٹ کے اخراجات تقریباً 9 روپے فی لیٹر، مرکزی ٹیکس 12 روپے فی لیٹر، ریاستوں کا اوسط وی اے ٹی 25 فیصد یعنی تقریباً 16 روپے فی لیٹر اور ڈیلر کمیشن 3 روپے فی لیٹر شامل کیا جائے تو مجموعی قیمت تقریباً 82 روپے فی لیٹر بنتی ہے۔ اگر اسی پٹرول کو ای-20 بنایا جائے تو اس کی قیمت تقریباً 70 روپے فی لیٹر ہونی چاہیے، نہ کہ 102 روپے فی لیٹر۔ اروند کیجریوال نے مزید کہا کہ اسی اصول کے مطابق ڈیزل کی قیمتیں بھی کم کی جا سکتی ہیں۔ پٹرول اور ڈیزل سستے ہونے سے ٹرانسپورٹ کے اخراجات کم ہوں گے، جس کے نتیجے میں اشیائے ضروریہ سمیت تقریباً ہر چیز کی قیمتوں میں کمی آئے گی اور مہنگائی پر بڑا اثر پڑے گا، جس سے عوام کو خاطر خواہ راحت ملے گی۔انہوں نے کہا کہ حکومت یا مرکزی وزیر ہردیپ سنگھ پوری یہ دلیل دے سکتے ہیں کہ جنگ کے دوران تیل کمپنیوں کو جو نقصان ہوا تھا، اس کی تلافی اب منافع کما کر کی جا رہی ہے، لیکن یہ دلیل سراسر غلط ہے۔ 2014 سے اب تک بین الاقوامی بازار میں خام تیل کی قیمتوں میں کم از کم چھ مرتبہ نمایاں کمی آئی، اس کے باوجود حکومت نے ملک میں پٹرول کی قیمتیں کم نہیں کیں۔ جب خام تیل سستا ہونے پر کمپنیوں نے بھاری منافع کمایا تو وہ رقم کہاں گئی؟اروند کیجریوال نے سوال کیا کہ کیا اس منافع سے تین چار ماہ جاری رہنے والی جنگ کے دوران ہونے والے محدود نقصان کی تلافی نہیں کی جا سکتی؟ اطلاعات کے مطابق صرف گزشتہ سال ہی سرکاری تیل کمپنیوں کو تقریباً 77 ہزار کروڑ روپے کا ریکارڈ منافع حاصل ہوا، جبکہ گزشتہ تین چار برسوں سے بھی وہ مسلسل بھاری منافع کما رہی ہیں۔ پھر اس منافع کو نقصانات پورے کرنے کے لیے کیوں استعمال نہیں کیا جا رہا؟آخر میں اروند کیجریوال نے کہا کہ اس وقت عوام سے 102 روپے فی لیٹر وصول کرنا سراسر غیر منصفانہ ہے۔ میری حکومت سے مطالبہ ہے کہ فوری طور پر ملک کے عوام کو 82 روپے فی لیٹر کی قیمت پر خالص پٹرول فراہم کیا جائے، اور اگر ای-20 پٹرول ہی فروخت کیا جائے تو اس کی قیمت اس سے بھی کم مقرر کی جائے۔