غریبوں کو انصاف دلانا حکومت کی اولین ترجیح،بدعنوانی میں ملوث وزراء، ایم ایل اے اور اعلیٰ سطح سے لے کر نچلی سطح تک کے افسران کے خلاف کی جائے گی سخت کارروائی:وزیراعلیٰ سمراٹ چودھری

(پی این این)
پٹنہ: بہار کے وزیر اعلیٰ سمراٹ چودھری نے جمعرات کے روز اعلان کیا کہ ریاست کے تمام 9 ڈویژنوں میں اسپیشل وجیلنس کورٹ قائم کی جائیں گی، تاکہ بدعنوانی کے معاملات کا تیزی سے تصفیہ ہو سکے اور مجرموں کو جلد سزا مل سکے۔وزیر اعلیٰ مسٹر چودھری نے آج ’بہار ویجی لینس اویئرنس ڈے‘ اور ’بہار وجیلنس اویئرنس ویک‘ کی افتتاحی تقریب سے خطاب کرتے ہوئے کہا کہ بہار کے ہر ضلع میں وجیلنس تھانہ اور تمام سب ڈویژنوں میں ویجی لینس آؤٹ پوسٹ قائم کرنے کا انتظام کیا جائے گا۔
انہوں نے کہا کہ جرائم اور اقتصادی جرائم سے جڑے معاملات میں سرکاری گواہوں کو گواہی کے لیے آنے جانے کا سفری الائونس فراہم کیا جائے گا۔ انہوں نے وجیلنس انویسٹی گیشن بیورو، اسپیشل وجیلنس یونٹ اور اکنامک آفینسز ونگ کو ماہرین کی مدد سے جدید اور اسمارٹ طریقہ کار تیار کرنے کی ہدایت دیتے ہوئے کہا کہ ان ایجنسیوں کو اتنا اہل بنایا جائے گا کہ خاص حالات میں انفورسمنٹ ڈائریکٹوریٹ (ای ڈی) اور سینٹرل بیورو آف انویسٹی گیشن (سی بی آئی) کو بھی ان کے تعاون کی ضرورت محسوس ہو۔وزیر اعلیٰ نے کہا کہ بدعنوانی کرنے والے لوگوں کو نشان زد کر کے ان کی ضبط شدہ جائیدادوں میں اسکول چلائے جائیں گے۔ انہوں نے کہا کہ کرپشن میں ملوث وزراء، ایم ایل ایز اور اعلیٰ سطح سے لے کر نچلی سطح تک کے افسران کے خلاف سخت کارروائی کی جائے گی۔ انہوں نے کہا کہ غریبوں کو انصاف دلانا حکومت کی اولین ترجیح ہے اور اسی مقصد کے لیے تعاون کیمپ پروگرام چلایا جا رہا ہے۔ انصاف کے ساتھ ترقی اسی وقت ممکن ہے جب حکومت کی اسکیموں کا فائدہ بغیر کسی گڑبڑی کے آخری شخص تک پہنچے۔
مسٹر چودھری نے کہا کہ شارٹ کٹ کو چھوڑ کر ایمانداری اور فرض شناسی کو اپنانا ہوگا۔ انہوں نے کہا کہ اسکولوں میں اینٹی کرپشن بیداری مہم چلا کر بچوں میں اخلاقی اقدار کو فروغ دیا جائے گا۔ انہوں نے کہا کہ وزیر اعظم نریندر مودی ترقی یافتہ ہندوستان کی تعمیر کے لیے مسلسل کام کر رہے ہیں اور سابق وزیر اعلیٰ نتیش کمار نے خوشحال بہار کی بنیاد کو مضبوط کیا ہے، جسے آگے بڑھانے کے لیے ریاستی حکومت پرعزم ہے۔
وزیر اعلیٰ نے کہا کہ ٹرانسپیرنسی ، ٹیکنالوجی اور ٹرسٹ یعنی’ٹریپل ٹی‘ کی بنیاد پر بہار کو بدعنوانی سے پاک بنایا جائے گا، جس سے گڈ گورننس کو نئی طاقت ملے گی۔ انہوں نے لوگوں سے خوشحال بہار کی تعمیر میں سرگرم رول ادا کرنے کی اپیل کی۔
پروگرام کے دوران وزیر اعلیٰ نے وجیلنس انویسٹی گیشن بیورو کے نئے’لوگو‘ کی نقاب کشائی کی اور وجیلنس ڈیپارٹمنٹ کی کامیابیوں پر مبنی ایک مختصر فلم (شارٹ فلم) بھی دیکھی۔ تقریب سے نائب وزیر اعلیٰ وجے کمار چودھری، وجیلنس ڈیپارٹمنٹ کے ایڈیشنل چیف سکریٹری ڈاکٹر بی رابیندر اور وجیلنس انویسٹی گیشن بیورو کے ڈائریکٹر جنرل (ڈی جی) جتیندر سنگھ گنگوار نے بھی خطاب کیا۔اس موقع پر موجود وزراء، افسران اور ملازمین نے ایمانداری، شفافیت، غیر جانبداری اور مفادِ عامہ کو سب سے اوپر رکھتے ہوئے اپنی ذمہ داریوں کو نبھانے کا حلف بھی لیا۔