جمہوریت کی قاتل ہےمودی حکومت : سورج کمار سنگھ،حاجی پور میںانصاف اَدھیکار منچ کے زیرِ اہتمام احتجاجی مارچ، طلبہ پر لاٹھی چارج کے خلاف شدید نعرے بازی

(پی این این)
حاجی پور:انصاف اَدھیکار منچ کے بینر تلے طلبہ اور نوجوانوں نے دہلی اور پٹنہ میں طلبہ پر مبینہ لاٹھی چارج کے خلاف احتجاجی مارچ نکالا۔ مظاہرین نے “لاٹھی گولی کی سرکار نہیں چلے گی”، “دہلی اور پٹنہ میں طلبہ پر لاٹھی چارج کیوں؟”، “مودی سرکار جواب دو” اور “طلبہ کے سوالوں کو لاٹھی اور گولی سے دبانا بند کرو” جیسے نعرے لگائے۔ یہ احتجاجی مارچ مقامی پانی ٹنکی چوک سے شروع ہو کر شہر کی مختلف سڑکوں سے گزرا۔جس میں سیکڑوں طلبہ اور نوجوان شریک ہوئے۔
اس موقع پر انصاف اَحقاق منچ کے رہنماؤں نے خطاب کرتے ہوئے کہا کہ جب حکومتوں کے پاس عوامی سوالات کا جواب نہیں ہوتا تو وہ پولیس کی لاٹھی اور گولی کے ذریعے آواز دبانے کی کوشش کرتی ہیں لیکن اس سے تحریکیں مزید مضبوط ہوتی ہیں۔ مقررین نے دعویٰ کیا کہ دہلی سے شروع ہونے والی طلبہ تحریک اب پٹنہ تک پہنچ چکی ہے اور وہاں بھی طلبہ پر لاٹھی چارج کیا گیا۔
ریاستی صدر سورج کمار سنگھ نے اپنے خطاب میں مرکزی حکومت پر سخت تنقید کرتے ہوئے کہا کہ موجودہ حکومت جمہوری اقدار کو نقصان پہنچا رہی ہے۔ انہوں نے امتحانی پرچہ لیک کے معاملے پر بھی حکومت کو تنقید کا نشانہ بنایا اور ذمہ داروں کے خلاف کارروائی کا مطالبہ کیا۔ احتجاجی مارچ کی قیادت انصاف اَحقاق منچ کے ریاستی صدر سورج کمار سنگھ نے کی۔
اس موقع پر ریاستی نائب صدر راشد حسین چودھری، فہد زما، شہنواز حسین، سنی کمار، کرن چودھری، نسیم اختر، رشی رنجن، شفیق الرحمٰن، دیش بندھو کرانتیکاری، حمزہ مرتضیٰ، شہریار، عارض، ہرش، فواد، عادل، یوسف، فرقان، اسد، سنتوش یادو، توصیف عالم، ڈاکٹر منظر عقیل، سیف یتین، کیف خان، عمران ملک، راشد، روی راج، محمد، احتشام رحمانی، اسد یقین سمیت بڑی تعداد میں طلبہ اور نوجوان موجود تھے۔