جدید ٹیکنالوجی کے ذریعے ہر جائیداد کی واضح شناخت بنائی جا رہی ہےیقینی : ریکھا گپتا

نئی دہلی: دہلی سرکار نے راجدھانی کے لال ڈورا اور گاؤں میں رہنے والے لوگوں کو ان کی جائیدادوں کا محفوظ اور ڈیجیٹل ریکارڈ فراہم کرنے کی سمت میں بڑا قدم اٹھایا ہے۔وزیرِ اعلیٰ ریکھا گپتا نے محکمۂ محصولات کی جائزہ میٹنگ میں مرکزی سرکار کی سوامتوا یوجناکی پیش رفت کا جائزہ لیا۔ میٹنگ میں اسکیم کے تحت ڈرون سروے، ڈیجیٹل ریکارڈ تیار کرنے اور کیو آر کوڈ سے لیس اسمارٹ پی وی سی پراپرٹی کارڈ جاری کرنے کے عمل پر تفصیل سے بات چیت ہوئی۔ وزیرِ اعلیٰ نے کہا کہ لال ڈورا علاقوں میں برسوں سے منظم جائیداد کے ریکارڈ کی عدم موجودگی کے سبب لوگوں کو متعدد مسائل کا سامنا کرنا پڑتا تھا، لیکن اب جدید ٹیکنالوجی کے ذریعے ہر جائیداد کی واضح شناخت یقینی بنائی جا رہی ہے۔ انہوں نے بتایا کہ سروے آف انڈیا کے تعاون سے فی الحال 48 گاؤں کو اسکیم میں شامل کیا گیا ہے۔ ان میں سے 30 گاؤں کا سروے پورا ہو چکا ہے اور ان کے حتمی پراپرٹی کارڈ تیار کر لیے گئے ہیں۔ اب ان کارڈوں پر ڈیجیٹل دستخط جوڑنے اور اسمارٹ کارڈ جاری کرنے کا عمل آخری مرحلے میں ہے۔ انہوں نے کہا کہ اب تک 12,232 جائیدادوں کا سروے کیا جا چکا ہے، جن میں سے 8,423 جائیدادیں تنازعہ سے پاک پائی گئی ہیں۔ جنوبی اور شمال مغربی اضلاع میں سروے کی گئی تمام جائیدادیں تنازعہ سے پاک ہیں، جبکہ دیگر اضلاع میں بھی تنازعات کے تصفیے کے بعد کارڈ جاری کیے جائیں گے۔
وزیرِ اعلیٰ نے بتایا کہ شہریوں کو یو آئی ڈی اے آئی کے معیار کے مطابق اعلیٰ معیار کے پی وی سی اسمارٹ پراپرٹی کارڈ دیے جائیں گے۔ ان کارڈوں پر جائیداد کا شناختی نمبر، گاؤں، سب ڈویژن، ضلع، قابض کا نام، حصہ داری، کل رقبہ، تعمیر شدہ اور کھلا رقبہ، بھو-آدھار نمبر سمیت دیگر ضروری تفصیلات درج ہوں گی۔ ہر کارڈ پر کیو آر کوڈ بھی ہوگا، جسے اسکین کرنے پر متعلقہ جائیداد کا ڈیجیٹل فارم-13، تفصیلی نقشہ، حدود کی تفصیلات، شریک قابضین کی معلومات،تحصیلدار کے ڈیجیٹل دستخط اور معتبر قبضہ سرٹیفکیٹ دستیاب ہوگا۔ انہوں نے کہا کہ سوامتوا یوجنا صرف ریکارڈ تیار کرنے تک محدود نہیں ہے، بلکہ راجدھانی کے دیہی علاقوں میں جائیداد کے انتظام کو پوری طرح ڈیجیٹل، شفاف اور قابلِ اعتماد بنانے کی سمت میں ایک اہم پہل ہے۔ انہوں نے کہا کہ اس سے شہریوں کو اپنی جائیدادوں کا مستند ڈیجیٹل ریکارڈ ملے گا، سرکاری دستاویزات زیادہ منظم ہوں گے اور مستقبل میں جائیداد سے متعلق انتظامی عمل آسان، تیز اور شفاف بنے گا۔ سرکار جلد ہی اہل مستفیدین کو اسمارٹ پراپرٹی کارڈ تقسیم کرنے کے لیے ایک خصوصی پروگرام منعقد کرے گی۔