جامعہ طبیہ دیوبند میں یوگا ڈے کے موقع پر عظیم الشان یوگا کیمپ کا انعقاد

دیوبند:وزارت آیوش ،مرکزی حکومت اور اترپردیش حکومت کی ہدایات کی روشنی میں جامعہ طبیہ میڈیکل کالج دیوبند میں یوگ ہفتہ کے تحت ادارہ کے احاطہ میں یوگاڈے منایا گیا ۔جامعہ طبیہ کے یوگا کیمپ کا افتتاح آل انڈیا یونی طبی کانفرنس اترپردیش کے صدر اور آیورویدک ویونانی طبی چکتسا پدتی بورڈ کے سابق صدر ڈاکٹر انور سعید کے بدست عمل میں آیا ۔
اس موقع پر جیون یوگ فائونڈیشن دیوبند کے تعاون سے منعقدہ مشترکہ یوگا کیمپ میں یوگ آچاریہ وشال پنڈیر اور ان کی ٹیم نے مختلف قسم کے یوگ آسن کرائے ۔جامعہ طبیہ دیوبند کی نگرانی میں ادارہ کی جانب سے گودلئے گئے گائوں میں بھی یوگ آسن کراکرلوگوں میں بیداری پیدا کی گئی ۔جامعہ طبیہ دیوبند کی جانب سے یوگا ٹرینر وشال پنڈیر ،ڈاکٹر محمد اعظم عثمانی ،ڈاکٹر مزمل ،جمشید انور ،شبلی اقبال عابد ،صہیب علی ،منوج کمار ،الکا اور سچن کمار نے دیوبند کے متعدد گائوں میں جاکر وہاں کے باشندوں کو یوگ آسن کرائے ۔
جامعہ طبیہ دیوبند میں یوگ پریکٹس کے بعد ایک سمپوزیم کا انعقاد کیا گیا ۔جس میں مہمان خصوصی کے طور پر بی جے پی کے شہر صدر ارون گپتا نے طلبہ وطالبات اور اسٹاف سے خطاب کرتے ہوئے کہا کہ یوگ ہماری زندگی کا اہم حصہ ہے ۔یوگ اس ملک کی قدیم وراثت ہے ۔انہوں نے کہا کہ ماحولیات کو بہتر رکھنے کے لئے ہم سب کو شجر کاری بھی کرنی چاہئے ۔جامعہ طبیہ دیوبند کے سرپرست ڈاکٹر انور سعید نے اپنے خطاب کے دوران بتایا کہ سال 2015میں 21؍ جون کو یوگ کا عالمی دن منانے کا اعلان کیا گیا تھا اسی وقت سے یوگا کی اہمیت میں اضافہ ہوتا جارہا ہے ۔انہوں نے کہا کہ یوگ کو اپنا نے والے افراد جسمانی اور ذہنی طور پر صحت مند زندگی گزار رہے ہیں ۔انہوں نے کہا کہ وزیر اعظم کے اعلان کردہ سب کا ساتھ سب کا وکاس ،سب کا وشواس پرعمل کرتے ہوئے ادارہ نے اپنا بھرپور تعاون پیش کیا ہے ۔
آچاریہ وشال پنڈیر اور وکاس پنڈیر نے کہا کہ ان کے ادارہ جیون یوگ فائونڈیشن کے لئے یہ فخر کی بات ہے کہ اس سا ل بھی جامعہ طبیہ دیوبند میں یوگ آسن سکھانے کا موقع ملا ۔اس موقع پر ادارہ کے ایڈمنسٹر یٹیو آفیسر ڈاکٹر اختر سعید نے کہا کہ موجودہ دور کی مصروف ترین زندگی میں ہمارے جسم مختلف پیچیدگیوں کا شکار ہورہے ہیں ۔ایسی صورت میں روزانہ ورزش اوریوگ کو اپنی زندگی میں شامل کرکے بغیر کسی خرچ کے اپنے آپ کو تندرست وتوانا رکھ سکتے ہیں ۔
انہوں نے کہا کہ یوگ کسی خاص طبقہ یا کسی خصوصی ملک سے تعلق نہیں رکھتا ۔بلکہ ہندوستانی وزیر اعظم نے اپنی جدوجہد اور کوششوں سے یوگ کو عالمی سطح پر متعارف کرایا ہے ۔پوری دنیا میں لاتعداد لوگ یوگ کو اپنا چکے ہیں ،انہوں نے کہا کہ صوبائی حکومت کی اس سلسلہ میں کوششیں قابل ستائش ہیں ۔انہوں نے کہا کہ یوگ کو اپنا نے سے جہاں معاشرہ صحت مند ہوگا وہیں آپسی اتحاد واتفاق اور ایک دوسرے کے لئے تعاون کے جذبہ میں بھی اضافہ ہوگا ۔اس سمپوزیم اوریوگا پروگرام میں شرکت کرنے والوں کا پروفیسر ناصر علی خاں پرنسپل جامعہ طبیہ دیوبند نے شکریہ ادا کیا ۔اس یوگا کیمپ میں کالج کے ٹیچنگ ،نان ٹیچنگ اور پیر ا میڈیکل اسٹاف سمیت طلبہ وطالبات اور انٹرن شب کرنے والوں نے پورے جوش وجذبہ کے ساتھ شرکت کی ۔