بہار کے نیاز خالد نور لندن کے ہاؤس آف لارڈز میں اعزازی ڈاکٹریٹ سے سرفراز

(پی این این)
پٹنہ: بہار کے نوجوان صنعت کار اور سماجی کارکن نیاز خالد نور کو برطانیہ کے باوقار ہاؤس آف لارڈز میں منعقدہ ایک پروقار تقریب کے دوران سماجی کاروبار (سوشل انٹرپرینیورشپ) اور پائیدار کاروبار (سسٹین ایبل بزنس) کے شعبے میں نمایاں خدمات کے اعتراف میں لندن اسکول آف بزنس اینڈ سائنس کی جانب سے اعزازی ڈاکٹریٹ کی ڈگری سے سرفراز کیا گیا۔
بہار کے ایک عام خاندان سے تعلق رکھنے والے نیاز خالد نور نے سال 2009 میں پٹنہ سے اپنے کاروباری سفر کا آغاز کیا تھا۔ آج ان کی کمپنی لوحیف گلوبلز پرائیویٹ لمیٹڈ ملک و بیرونِ ملک مختلف شعبوں میں اپنی خدمات انجام دے رہی ہے۔
نیاز خالد نور سماجی خدمات کے میدان میں بھی سرگرم کردار ادا کر رہے ہیں۔ انہوں نے سال 2013 میں سیو دی کویسٹ ٹرسٹ کی بنیاد رکھی، جس کے ذریعے وہ نابینا اور بصارت سے محروم طلبہ کی تعلیم، فلاح و بہبود اور بااختیار بنانے کے لیے مسلسل کام کر رہے ہیں۔
اعزاز حاصل کرنے کے بعد نیاز خالد نور نے کہا کہ یہ کامیابی صرف ان کی ذاتی کامیابی نہیں بلکہ پورے بہار، ان کی ٹیم اور ان تمام لوگوں کی ہے جن کے تعاون، اعتماد اور حوصلہ افزائی نے انہیں اس مقام تک پہنچایا۔
انہوں نے کہا کہ یہ اعزاز انہیں کاروباری سرگرمیوں کے ساتھ ساتھ سماجی خدمت کے میدان میں بھی مزید جذبے اور عزم کے ساتھ کام کرنے کی تحریک دے گا۔