اے ایم یو کے مختلف شعبوں میں ’ایک پیڑ ماں کے نام‘ مہم کے تحت شجرکاری

علی گڑھ: علی گڑھ مسلم یونیورسٹی کے مختلف شعبوں نے ماحولیاتی بیداری، شجرکاری اور فطرت کے تئیں ذمہ داری کے احساس کو فروغ دینے کے لیے ’ایک پیڑ ماں کے نام‘ مہم کے تحت شجرکاری سرگرمیوں کا اہتمام کیا۔
یونیورسٹی کی این ایس ایس اکائی نے کوآرڈینیٹر ڈاکٹر محمد محسن خان اور پروگرام آفیسر مسٹر عبدالجبار کی رہنمائی میں شجرکاری مہم کے ساتھ ایک کوئز مقابلہ بھی منعقد کیا، جس کے ذریعہ طلبہ کو ماحولیاتی تحفظ، پائیداری اور سماجی ذمہ داری کے تئیں حساس بنایا گیا، جبکہ کوئز مقابلے نے ماحولیاتی اور سماجی مسائل کے بارے میں ان کی آگہی میں اضافہ کیا۔
اے بی کے ہائی اسکول گرلز نے بھی پرائمری سیکشن کی نئی عمارت میں شجرکاری پروگرام منعقد کیا۔ پروگرام میں اسکول ایجوکیشن کی ڈائریکٹر پروفیسر قدسیہ تحسین نے مہمانِ خصوصی کی حیثیت سے شرکت کی۔ ان کے ہمراہ اسسٹنٹ ڈائریکٹر ڈاکٹر صالحہ جمال، اراضی و باغات کے ممبر انچارج پروفیسر انور شہزاد اور اسکول کی قائم مقام پرنسپل محترمہ افروز علی بھی موجود تھیں۔
پروفیسر تحسین نے طلبہ پر زور دیا کہ وہ پودے لگانے کے ساتھ ساتھ ان کی پرورش بھی کریں۔ نائب پرنسپل ڈاکٹر صبا حسن نے صاف، سرسبز اور پائیدار مستقبل کی تشکیل میں شجرکاری کی اہمیت پر زور دیا۔ طلبہ، اساتذہ اور مہمانوں نے اپنی ماؤوں کے نام پر پودے لگائے، جبکہ طلبہ نے تقاریر اور تخلیقی پیشکش کے ذریعہ ماحولیاتی تحفظ اور موسمیاتی تبدیلی کے مسائل کو اجاگر کیا۔