مہاگٹھ بندھن کی حکومت خواتین کوبنائے گی خودکفیل:ثروت جہاں فاطم

(پی این این)
پٹنہ:بہار ریاستی خواتین کانگریس کی صدر ثروت جہاں فاطمہ نے کہا ہے کہ بہار میں اگلی حکومت کانگریس کی قیادت والی مہاگٹھ بندھن کی حکومت بننے والی ہے، جس کے بعد مائی بہن مان یوجنا کو نافذ کیا جائے گا۔ اس اسکیم کے تحت ہر ماہ اہل خواتین کے کھاتوں میں 2500 روپے بھیجے جائیں گے۔
ثروت جہاں نے کہا کہ یہ اسکیم بہار کی خواتین کو خود انحصار اور بااختیار بنائے گی۔ انہوں نے الزام لگایا کہ خواتین کو عزت دینے کا بی جے پی کا اعلان محض ایک نعرہ ثابت ہوا ہے جبکہ کانگریس نے ہمیشہ اپنا وعدہ پورا کیا ہے اور مستقبل میں بھی پارٹی بہار میں خواتین کو عزت دینے اور انہیں معاشی اور سماجی طور پر مضبوط بنانے کے لئے پوری طرح پابند عہد ہے۔ کانگریس لیڈر نے کہا کہ پارٹی نے ہمیشہ ملک کی خواتین کے حقوق اور بااختیار بنانے کو اولین ترجیح دی ہے۔
ثروت جہاں فاطمہ نے مرکز کی مودی حکومت کو جملوں کی حکومت قرار دیتے ہوئے الزام لگایا کہ بی جے پی جھوٹی ضمانتیں دے کر اقتدار میں آئی ہے اور اقتدار میں آتے ہی اپنی تمام ضمانتوں کو کوڑے دان میں پھینک دیتی ہے۔ انہوں نے کہا کہ ملک کے عوام جان چکے ہیں کہ کانگریس پارٹی اپنے تمام وعدوں کو عملی جامہ پہناتی ہے اور بی جے پی کی طرح جمعبازی میں ملوث نہیں ہے۔
مرکز اور بہار کی این ڈی اے حکومت پر حملہ کرتے ہوئے ثروت جہاں نے کہا کہ ان حکومتوں نے مہنگائی کی وجہ سے عام لوگوں کی زندگیاں خطرے میں ڈال دی ہیں، کانگریس پارٹی وعدہ کرتی ہے کہ بہار میں مہاگٹھ بندھن کی حکومت بنتے ہی نہ صرف خواتین کو بااختیار بنایا جائے گا بلکہ عام لوگوں کو معاشی بحران سے نکالنے کی ہر ممکن کوشش کی جائے گی۔