بہار
شیبو سورین کی حالت نازک، وینٹی لیٹر پر رکھا گیا
انئی دہلی: جھارکھنڈ کے سابق وزیر اعلیٰ اور جھارکھنڈ مکتی مورچہ کے بانی شیبو سورین کی طبیعت ایک بار پھر بگڑ گئی جس کے بعد انہیں وینٹی لیٹر پر رکھا گیا ہے۔ شیبو سورین گزشتہ ڈیڑھ ماہ سے دہلی کے سر گنگا رام اسپتال میں داخل ہیں، انہیں گردے سے متعلق مسائل کے باعث جون کے آخری ہفتے میں دہلی کے اسپتال میں داخل کرایا گیا تھا۔ ان کے بیٹے اور جھارکھنڈ کے وزیر اعلیٰ ہیمنت سورین مسلسل اسپتال میں رہتے ہیں اور اپنے والد کی دیکھ بھال کے ساتھ ساتھ ڈاکٹروں سے ان کی صحت کے بارے میں معلومات لے رہے ہیں۔
شیبو سورین کو ان کی بہو کلپنا سورین نے 19 جون کو معمول کے چیک اپ کے لیے دہلی لایا تھا۔ اس دوران ان کی طبیعت بگڑ گئی اور انہیں سر گنگا رام اسپتال میں داخل کرانا پڑا۔ ہسپتال میں دن بدن ان کی حالت سنگین ہوتی گئی اور آج انہیں وینٹی لیٹر پر رکھنا پڑا۔
صحافیوں سے بات کرتے ہوئے جھارکھنڈ کے وزیر اعلیٰ ہیمنت سورین نے یقین ظاہر کیا کہ ان کے والد شیبو سورین اپنی صحت کی جنگ اسی طرح جیتیں گے جس طرح انہوں نے اپنی زندگی میں کئی بڑی لڑائیاں جیتی ہیں۔
صدر دروپدی مرمو، مرکزی سڑک ٹرانسپورٹ اور شاہراہوں کے وزیر نتن گڈکری سمیت کئی سرکردہ رہنما اسپتال پہنچے اور شیبو سورین کی صحت کے بارے میں دریافت کیا۔