(پی این این)
پٹنہ :نیا وقف قانون نہ صرف اسلامی شریعت کی صریح خلاف ورزی ہے بلکہ دستور ہند کی روح اور سپریم کورٹ کے کئی فیصلوں کے بھی خلاف ہے ، اس قانون کے نتیجے میں مساجد و مدارس ،مقابر و خانقاہیں اور مذہبی مقامات پر خطرے کے بادل منڈلا رہے ہیں ؛اس لیے ہم اس کالے قانون کے خلاف آخری دم تک جدوجہد کرتے رہیں گے، ان خیالات کا اظہار امارت شرعیہ کے قائم مقام ناظم مولانا مفتی محمد سعید الرحمن قاسمی نے کیا۔
انہوں نے کہا کہ نیا وقف قانون ملک کے جمہوری اقدار کے خلاف ہے، اسی لیے امارت شرعیہ کی قیادت میں ۲۹؍جون ۲۰۲۵ءکو پٹنہ کے گاندھی میدان میں “وقف بچاؤ دستور بچاؤ کانفرنس” منعقد ہو رہی ہے ،جس کی صدارت امیر شریعت مولانا سیداحمدولی فیصل رحمانی فرمائیں گے، اس کانفرنس میں ریاست اور بیرون ریاست کے ممتاز علماء ،قائدین اور ملی تنظیموں کے ذمہ دار حضرات شرکت فرمائیں گے اور قوم وملت کو آئندہ کے لئےلائحہ عمل بتلائیں گے، آل انڈیا مسلم پرسنل لا بورڈ اور بہار کی جملہ ملی تنظیموں، خانقاہوں کے سجادگان اور دینی اداروں کے مشترکہ تعاون سے ۲۹؍ جون کو ایک کانفرنس ہونے جا رہی ہے جس کی تمام تیاریاں مکمل ہو گئی ہیں، رضا کار مقرر کر دیے گئے ہیں، عوامی رابطوں کے ساتھ انہیں سہولت بہم پہنچانے کی جدوجہد کی جا رہی ہے، اجلاس کے انتظام وانصرام کے لئے جو۱۹؍کمیٹیاں بنائی گئی ہیں ان کےکنوینرحضرات شب و روز بیدار مغزی ،تندہی اور اخلاص کے جذبے سے سارےا مور انجام دے رہے ہیں ،شرکا ءکے قیام و طعام ،اجلاس گاہ تک پہنچانے کے لیے رضاکار ہمہ جہت کوشش کر رہے ہیں ا ن شاءاللہ یہ کانفرنس تاریخ ساز ہوگی اور حکومت کے کانوں تک لاکھوں لوگوں کی پرزور آواز پہنچائی جائے گی۔
پٹنہ کے مسلمان اور براداران وطن سے اپیل ہے کہ اس عظیم الشان کانفرنس میں شرکت کے لئے چاروں صوبوں کے علاوہ ملک کے دیگرصوبوں سے لاکھوں کی تعداد میں جو لوگ آرہے ہیں ان کے قیام وطعام ،پانی اور دیگر سہولیات کا خاص نظم کریں،اہل پٹنہ نےماضی میں ضیافت کی جومثال قائم کی ہے ہمیں قوی امید ہے کہ اس موقع پر بھی مہمانوازی وضیافت میں اس سے زیادہ بڑھ چڑھ کر حصہ لیں گے، اللہ تعالیٰ تمام حضرات کے تعاون کوقبول فرمائے اور ہرطرح کی کامیابی سےہمکنارفرمائے۔

(پی این این)
چھپرہ :ریلوے بورڈ کے چیف ایگزیکٹو آفیسر (سی ای او) ستیش کمار نے شمال مشرقی ریلوے کی جی ایم سومیا ٹھاکر اور منیجر ونیت کمار سریواستو کے ساتھ چھپرہ جنکشن کا معائنہ کیا۔یہ معائنہ وزیر ریلوے کے ممکنہ دورے کے پیش نظر کیا گیا۔معائنہ کے دوران جنکشن پر سیکورٹی،صفائی ستھرائی اور مسافروں کی سہولیات کا جائزہ لیا گیا۔
سی ای او ستیش کمار جیسے ہی پلیٹ فارم پر پہنچے ریلوے کے سینئر افسران اور ملازمین نے ان کا پرتپاک استقبال کیا۔اس موقع پر این ای ریلوے مزدور یونین کے اراکین نے انہیں مومنٹو پیش کیا اور ملازمین کے مختلف مطالبات سے آگاہ کیا۔یونین نے خاص طور پر ڈیوٹی پر موجود ریلوے ملازمین کی سہولیات اور کام کے حالات کو بہتر بنانے کا مطالبہ کیا۔معائنہ کے دوران سی ای او نے کریو لابی،ڈارمیٹری،سرکولیٹنگ ایریا سمیت مختلف مقامات کا جائزہ لیا۔انہوں نے وہاں صفائی ستھرائی،ملازمین کے کام کی حالت اور تکنیکی انتظامات کے بارے میں دریافت کیا۔یہ مختصر معائنہ تقریباً 15 منٹ تک جاری رہا۔جس کے بعد وہ اپنے خصوصی ریل سیلون سے پٹیڈھی کے لیے روانہ ہوئے۔
میڈیا سے گفتگو کرتے ہوئے انہوں نے کہا کہ ریلوے مسافروں کی سہولت کے لیے پوری طرح پرعزم ہے۔انہوں نے کہا کہ مسافروں کی تعداد اور ان کی ضروریات کو مدنظر رکھتے ہوئے نئی ٹرینیں مسلسل چلائی جا رہی ہیں اور سہولیات میں مسلسل بہتری لائی جا رہی ہے۔اس موقع پر آر پی ایف کمانڈنٹ ایس رام کرشنن،سینئر ڈی سی ایم شیخ رحمان اور تمام بڑے محکموں کے افسران موجود تھے۔ریلوے کے اس اعلیٰ سطحی معائنے کی وجہ سے جنکشن احاطے میں کافی سرگرمیاں دیکھنے میں آئیں اور صفائی سے لے کر سیکورٹی کے انتظامات سخت تھے۔

(پی این این)
چھپرہ :کانگریس کے سابق قومی صدر اور لوک سبھا میں اپوزیشن لیڈر راہل گاندھی کی سالگرہ کا انعقاد کانگریس لیڈران نے تزک و اہتشام کے ساتھ کیا۔چھپرہ سٹی کانگریس کے صدر فیروز اقبال نے شہر کے پرانی گڑ ہٹی واقع دلت بستی میں جشن سالگرہ کا انعقاد کیا۔انہوں نے بچوں کے درمیان چاکلیٹ،کتاب اور کاپیاں تقسیم کیں۔موقع پر انہوں نے راہل گاندھی کے خوابوں کا ہندوستان بنانے کا عزم دہرایا۔
اس موقع پر فیصل انور،سنیل کمار،بابر علی سمیت کانگریس کے دیگر اراکین کی اچھی خاصی تعداد موجود تھی۔دوسری جانب کانگریس او بی سی ڈپارٹمنٹ کے زیراہتمام کیک کاٹ کر یوم پیدائش منایا گیا۔وہاں موجود لوگوں نے متفقہ طور پر راہل گاندھی کی لمبی زندگی اور اچھی صحت کی خواہش کی۔
اس موقع پر ضلع نائب صدر دھرمیندر کمار دھرم نے کہا کہ راہل گاندھی موجودہ دور میں ملک کے سب سے سنجیدہ لیڈر ہیں۔راہل جیسا کوئی دوسرا لیڈر سماج کے تمام طبقات،اداروں اور آئین کے تئیں حساس نہیں ہے۔اس دوران رام سوروپ رائے،گورو یادو،ملائم سنگھ یادو،پرنس یادو،آرین اپادھیائے،ریتک رجک،سنی رام،صلاح الدین خان،ابھیراج کمار،آیوش کمار،انوج سنگھ،پنکی دیوی،نیلم دیوی،راگنی کماری،نشا کماری وغیرہ موجود تھے۔