ٹریڈ یونین تنظیموں کی ملک گیر عام ہڑتال کو کامیاب بنانے کی اپیل

(پی این این)
چھپرہ :سی پی آئی کی سارن ضلع کونسل کی میٹنگ کا انعقاد پارٹی دفتر منظر رضوی بھون میں کیا گیا۔میٹنگ میں مزدور دشمن قوانین کے خلاف 9 جولائی کو مجوزہ ملک گیر عام ہڑتال کی بھرپور حمایت اور اسے کامیاب بنانے کی اپیل کی گئی۔میٹنگ کے بارے میں اطلاع دیتے ہوئے پارٹی کے ضلع سکریٹری رام بابو سنگھ نے بتایا کہ موقع پر ایک قرارداد منظور کی گئی جس میں بیہٹا انٹرنیشنل ایئرپورٹ کا نام سوامی سہجانند سرسوتی ایئرپورٹ رکھنے کا مطالبہ کیا گیا۔
میٹنگ سے خطاب کرتے ہوئے ریاستی ایگزیکٹو ممبر اور ضلع انچارج سریندر سوربھ نے کہا کہ بہار میں حکومت مفلوج ہو چکی ہے۔قتل و جرائم میں روز بروز اضافہ ہو رہا ہے۔کرپشن اپنے عروج پر ہے۔آئے روز رشوت ستانی کی خبریں آتی رہتی ہیں۔ایسے میں اب وقت آگیا ہے کہ اس حکومت کو ہٹا کر عظیم اتحاد کی حکومت بنائی جائے۔میٹنگ میں پارٹی کی ضلعی کانفرنس آئندہ اگست میں منعقد کرنے کا فیصلہ کیا گیا۔اس سے قبل جولائی میں تمام بلاکس میں زونل کانفرنس کا انعقاد کیا جائے گا۔
میٹنگ میں اسمبلی انتخابات پر بھی تبادلہ خیال کیا گیا اور سارن کی تین سیٹوں پر الیکشن لڑنے کی تجویز ریاستی قیادت کو بھیجنے کا فیصلہ کیا گیا۔موقع پر چولہن پرساد سنگھ،مہاتما گپتا،ہری بلم سنگھ،ڈاکٹر کے این سنگھ،شیو جی داس،سنجے کمار سنگھ،سوگریو گپتا،نسیم احمد،نند کمار گری،گوتم ساہ،درشنانند،دیویندر سنگھ، ڈاکٹروریندر سنگھ،نریندر رائے،سید محمد شہاب الدین،ترویکرم دوبے،پرماتا دوبے وغیرہ موجود تھے۔میٹنگ کی صدارت سریندرناتھ ترپاٹھی نے کی۔