آتشی نے احمد آباد طیارہ حادثے کے زخمیوں سے کی عیادت

(پی این این)
نئی دہلی : احمد آباد میں ایئر انڈیا کے ایک طیارے کے ٹیک آف کے چند سیکنڈ بعد ہی گر کر تباہ ہو جانے کے باعث 250 سے زائد افراد جاں بحق ہو گئے، جس نے پورے ملک کو ہلا کر رکھ دیا۔ جیسے ہی ملک بھر میں غم کی لہر دوڑ گئی، عام آدمی پارٹی کی سینئر لیڈر اور دہلی اسمبلی میں قائد حزب اختلاف آتشی احمد آباد پہنچیں اور سول اسپتال میں زخمیوں اور سوگوار خاندانوں سے ملاقات کی۔ حادثے پر گہرے دکھ کے اظہار کیا کے طور پر، "آپ” نے اپنی تمام انتخابی مہمات دو دن کے لیے معطل کر دی تھیں۔حادثے پر شدید دکھ اور لواحقین سے ہمدردی کا اظہار کرتے ہوئے آتشی نے کہا،ایئر انڈیا کا طیارہ حادثہ ایک نہایت دل دہلا دینے والا اور افسوسناک سانحہ ہے۔ طیارے میں سوار کل 241 افراد جان سے ہاتھ دھو بیٹھے۔ اس کے علاوہ کئی میڈیکل طلبہ اور مقامی شہری بھی طیارے کے گرنے کے مقام پر جاں بحق ہوئے، جب کہ کئی افراد شدید زخمی ہیں۔ ہم آج یہاں ان تمام متاثرین سے تعزیت کرنے آئے ہیں۔”
انہوں نے مزید کہا کہ عام آدمی پارٹی نے حادثے کے فوری بعد مقامی رہنماؤں اور رضاکاروں کو امدادی سرگرمیوں میں شامل ہونے کی ہدایت دی۔”جب یہ حادثہ پیش آیا، ہم نے عام آدمی پارٹی کے مقامی رہنماؤں اور کارکنان کو ہدایت دی کہ وہ ہر ممکن طریقے سے حکومت اور انتظامیہ کی مدد کریں۔ ہر ایک ‘آپ’ رضاکار موقع پر موجود ہے اور مکمل تعاون فراہم کر رہا ہے،” آتشی نے کہا۔انہوں نے سابق گجرات کے وزیر اعلیٰ وجے روپانی کے انتقال پر بھی گہرے دکھ کا اظہار کیا، جو اس حادثے میں جاں بحق ہو گئے۔ہم سابق وزیر اعلیٰ وجے روپانی کے اہل خانہ سے دلی تعزیت کرتے ہیں۔ اس حادثے میں ان کا انتقال بہت ہی تکلیف دہ ہے، اور ہماری دعائیں ان کے اہل خانہ کے ساتھ ہیں،” انہوں نے کہا۔آتشی نے یہ بھی تصدیق کی کہ وہ زخمیوں سے ملاقات کے لیے ٹراما سینٹر کا دورہ کریں گی۔”ہم اب ٹراما سینٹر جا رہے ہیں تاکہ ان زخمی افراد سے مل سکیں جو زیر علاج ہیں،” انہوں نے کہا۔تحقیقات کے حوالے سے آتشی نے کسی بھی قسم کے قبل از وقت بیان سے گریز کیا اور کہا:”ہم اس وقت تحقیقات کے عمل پر کوئی تبصرہ نہیں کریں گے۔ سول ایوی ایشن کی وزارت نے اس حادثے کی تحقیقات کے لیے ایک کمیٹی تشکیل دی ہے، اور ہمیں رپورٹ آنے تک انتظار کرنا چاہیے۔”
آتشی نے ‘ایکس’ پر لکھا:آج احمد آباد آئی۔ ایئر انڈیا کے طیارہ حادثے میں زخمی ہونے والے افراد سے ملاقات کی۔ سول اسپتال کے ڈاکٹروں سے جب پورا واقعہ سنا تو دل دہل گیا۔ میں سلام پیش کرتی ہوں تمام پہلے رسپانڈرز کو ڈاکٹرز، انتظامیہ، فائر سروس، اور مقامی رہائشیوں کو۔ ایسے مشکل وقت میں مدد کے لیے آگے آنا ایک بہت بڑی انسانیت ہے۔ عام آدمی پارٹی کے تمام مقامی رہنما اور کارکنان انتظامیہ، متاثرہ خاندانوں اور اسپتال کو ہر ممکن مدد فراہم کر رہے ہیں۔”عام آدمی پارٹی اس اجتماعی غم کے لمحے میں گجرات کے عوام کے ساتھ کھڑی ہے اور امدادی کاموں میں مکمل تعاون کا عہد کرتی ہے۔