تعلیم اور صحت پر زیادہ توجہ دینے کی ضرورت: محب اللہ ندوی

(پی این این)
رام پور: رکن پارلیمنٹ محب اللہ ندوی نے کہا کہ افسران اس بات کو یقینی بنائیں کہ سرکاری اسکیموں کے فائدے آخری شخص تک پہنچیں۔تعلیم اور صحت پر زیادہ توجہ دینے کی ضرورت ہے۔اس دوران شہر کے ایم ایل اے آکاش سکسینہ نے پرائیویٹ اسکولوں کی من مانی فیسوں اور پرائیویٹ اسپتالوں کے من مانی رویے کا مسئلہ اٹھایا اور کارروائی کا مطالبہ کیا۔وکاس بھون آڈیٹوریم میں منعقدہ ڈسٹرکٹ ڈیولپمنٹ کوآرڈینیشن اینڈ مانیٹرنگ کمیٹی (دیشا) کی میٹنگ میں عوامی نمائندوں نے عہدیداروں سے پردھان منتری گرام سڑک یوجنا، قومی سماجی امداد پروگرام سمیت مختلف اسکیموں کے بارے میں تفصیلی جانکاری لی۔
رکن پارلیمنٹ نے عہدیداروں کو ہدایت دی کہ تمام اسکیموں کے فائدے صحیح طریقے سے آخری فرد تک پہنچیں۔اس کے لیے ضروری ہے کہ اسکیموں کی زیادہ سے زیادہ تشہیر کی جائے اور اس کی معلومات کو عام لوگوں تک پہنچانے کی ہر ممکن کوشش کی جائے۔انہوں نے کہا کہ صحت، تعلیم اور بنیادی سہولتوں میں بہتر کام کرنے کی ضرورت ہے۔ تمام افسران مثبت سوچ کے ساتھ کام کریں تو کامیابی ضرور ملے گی اور ضلع میں تعلیم اور صحت کی سطح کو مزید بلندیوں پر لے جایا جا سکتا ہے۔ ضرورت مندوں کو اسکیموں سے جوڑیں اور انہیں فوائد فراہم کریں۔رکن پارلیمنٹ نے کہا کہ سڑک حادثات کی روک تھام اور روڈ سیفٹی کے لیے ضلع میں مسلسل ہر ممکن کوشش کی جارہی ہے جو کہ قابل ستائش ہے۔
انہوں نے کہا کہ تمام اسکیموں کو ضلع میں افسران کے ذریعہ حکومت کی منشا کے مطابق نافذ کیا جانا چاہئے۔مزید کہا کہ معاشرے کے ہر ضرورت مند جن میں بچوں، خواتین، نوجوانوں اور کسانوں کے لیے چلائی جارہی عوامی فلاحی اسکیموں کا فائدہ اہل شخص کو ملنا چاہیے۔ ایم ایل اے آکاش سکسینہ نے عہدیداروں کو بتایا کہ رام پور میں تمام اسکیموں میں پہلے سے زیادہ پیش رفت دیکھی جارہی ہے۔ انہوں نے عہدیداروں سے کہا کہ وہ بلا تفریق کام کریں اور اسکیموں کا فائدہ اہل افراد تک پہنچائیں۔انہوں نے ڈسٹرکٹ اسکول انسپکٹر سے بھی کہا کہ وہ پرائیویٹ اسکولوں کی فیسوں میں مسلسل اضافے کے حوالے سے اسکولوں کی چھان بین کریں اور ایسے اسکولوں کے خلاف کارروائی کریں۔
انہوں نے سی ایم او سے کہا کہ پرائیویٹ اسپتال کو لائسنس دیتے وقت یہ چیک کیا جائے کہ کوئی اسپتال رہائشی علاقے میں تو نہیں ہے اور اس کے بعد ہی این او سی جاری کی جائے۔ ڈی ایم جوگندر سنگھ نے تمام عوامی نمائندوں کو ترقیاتی کاموں کی جانکاری دی۔ انہوں نے عوامی نمائندوں کو یقین دلایا کہ اجلاس میں موصول ہونے والی تمام تجاویز اور ہدایات کا جائزہ لیا جائے گا اور اسکیموں کو شفافیت اور بروقت نافذ کیا جائے گا۔