دلت بچی کی عصمت دری اور قتل کے خلاف کینڈل مارچ

(پی این این)
مڑھوڑہ :اسمبلی کی جن سوراج لیڈر ڈاکٹر نوتن کماری نے مظفر پور کی ایک دلت نابالغ لڑکی کی عصمت دری اور قتل کے خلاف گاؤں والوں اور جن سوراج کے ساتھیوں کے ساتھ کینڈل مارچ نکالا۔یہ مارچ مادھو پور سے دیال پور نہر تک نکالا گیا۔جس میں خواتین،نوجوانوں اور بچوں کی بڑی تعداد نے شرکت کی۔مارچ کے دوران مظفر پور کی دلت نابالغ لڑکی کی عصمت دری اور قتل کے خلاف احتجاج درج کیا گیا۔نوجوانوں نے بہار کی موجودہ حکومت کے خلاف نعرے لگائے اور خواتین کی حفاظت، امن و امان اور صحت کی خدمات کی ابتر حالت پر شدید ناراضگی کا اظہار کیا۔
اس موقع پر ڈاکٹر نوتن کماری نے کہا کہ یہ مارچ صرف ایک بچی کے لیے نہیں بلکہ بہار کی تمام بیٹیوں کی عزت اور تحفظ کی آواز ہے۔انہوں نے سوال کیا کہ غریب،پسماندہ اور دلت طبقے کی خواتین اور بچیاں کب تک کرپٹ نظام کا شکار ہوتی رہیں گی۔بہار حکومت کب جاگے گی۔انہوں نے الزام لگایا کہ حکومت کی ناقص امن و امان اور بے حس انتظامیہ نے عام لوگوں کو بے بس کر دیا ہے۔
ڈاکٹر نوتن نے یہ بھی کہا کہ اس معاملے میں خاموشی اختیار کرنا بھی جرم ہے اور ہم اس وقت تک خاموش نہیں بیٹھیں گے جب تک کہ متاثرہ کو انصاف نہیں مل جاتا۔ڈاکٹر نوتن کماری نے آخر میں کہا کہ اگر آج ہم نے آواز نہیں اٹھائی تو کل ہمارے گھر کی بیٹیاں بھی محفوظ نہیں رہیں گی۔یہ ہر حساس شہری کی لڑائی ہے۔