اے ایم یو میں طلبا کی رہائشی سہولیات کی بہتری اور چھتوں کی مرمت و صفائی کے لئے ہاسٹلز کے معائنہ کا عمل شروع

(پی این این)
علی گڑھ: علی گڑھ مسلم یونیورسٹی (اے ایم یو) میں ہاسٹلز کے معائنہ کا عمل شروع کیا گیا ہے تاکہ طلبہ کے لیے رہائشی حالات کو بہتر بنایا جا سکے اور ان جگہوں اور حصوں کی نشاندہی کی جا سکے جہاں فوری مرمت یا تزئین و آرائش کی ضرورت ہے۔ پرو وائس چانسلر پروفیسر ایم محسن خان کی قیادت میں یہ معائنہ کیا جا رہا ہے جس سے طلبہ کے لیے محفوظ اور آرام دہ رہائشی ماحول یقینی بنایا جا سکے گا۔
معائنہ کا پہلا مرحلہ منگل کو آفتاب ہال اور ندیم ترین ہال کے دورے سے شروع ہوا۔ پروفیسر محسن خان کے ہمراہ کارگزار ڈین اسٹوڈنٹس ویلفیئر، پروفیسر شمشاد حسین؛ ممبر انچارج بلڈنگ پروفیسر میجر فرید مہدی؛ یونیورسٹی انجینئر پروفیسر اظہارالحق فاروقی؛ ممبر انچارج رابطہ عامہ پروفیسر وبھا شرما اور دیگر سینئر اہلکار موجود تھے۔ آفتاب ہال کے پرووسٹ پروفیسر فیاض الرحمن اور ندیم ترین ہال کے پرووسٹ ڈاکٹر راشد علی بھی اس موقع پر موجود تھے۔
معائنے کے دوران ٹیم نے ہاسٹلز کی چھتوں کا بھی بغور جائزہ لیا۔ ٹیم نے عملے کے اراکین سے بات چیت کرتے ہوئے انہیں صفائی ستھرائی، جھاڑیوں کی صفائی اور ضروری مرمت کا کام فوری طور پر انجام دینے کی ہدایت کی۔ یونیورسٹی کے بلڈنگ محکمہ کی جانب سے مرمت کے تمام ضروری کام بروقت انجام دئے جائیں گے۔
اس موقع پر گفتگو کرتے ہوئے پروفیسر محسن خان نے وائس چانسلر پروفیسر نعیمہ خاتون کی قیادت میں طلبہ کی فلاح و بہبود کے تئیں یونیورسٹی انتظامیہ کے پختہ عزم کو دہرایا۔ انہوں نے کہا ”اے ایم یو، اپنے طلبہ کو بہتر رہائشی اور تعلیمی ماحول فراہم کرنے کے لیے ہر ممکن قدم اٹھانے کے تئیں پرعزم ہے۔ ہاسٹلوں کا یہ معائنہ اسی سمت میں ایک اہم قدم ہے تاکہ طلبہ کو صاف ستھرے، محفوظ اور مناسب سہولیات سے آراستہ ہاسٹل مہیا کیے جا سکیں جو اُن کی تعلیمی ترقی میں معاون ہوں“۔
معائنہ کا یہ سلسلہ آئندہ دس دنوں تک جاری رہے گا اور کیمپس کے تمام اقامتی ہالوں کا گہرائی سے جائزہ لیا جائے گا۔ یونیورسٹی انتظامیہ طلبہ کی فلاح و بہبود اور کیمپس کے بنیادی ڈھانچے کے اعلیٰ معیار کو برقرار رکھنے کے تئیں سنجیدہ ہے، چنانچہ متعلقہ ہالز کے پرووسٹس سے درخواست کی گئی ہے کہ وہ معائنہ کے دوران اپنی ٹیم کے ہمراہ موجود رہیں تاکہ ہر پہلو سے معائنہ کا کام مکمل ہو اور بہتری کے لیے مؤثر تجاویز سامنے آسکیں۔