خواتین کی آواز کو دبا نہیں پائے گی بی جے پی:ساریکا چودھری

(پی این این)

نئی دہلی:دہلی کی "وپدا سرکار” کی جانب سے اب تک 2500 روپے نہ ملنے پر خواتین کا صبر ٹوٹنے لگا ہے۔ عام آدمی پارٹی کی خواتین ونگ کی صدر ساریکا چودھری کی قیادت میں بڑی تعداد میں خواتین پنڈت جواہر لال نہرو اسٹیڈیم کے باہر اپنے حق کے 2500 روپے مانگنے پہنچی تھیں، لیکن بی جے پی سرکار کے اشارے پر پولیس نے انہیں حراست میں لے لیا۔ اس دوران خواتین نے وزیر اعلیٰ ریکھا گپتا اور بی جے پی کے خلاف شدید نعرے بازی کی۔ عام آدمی پارٹی کا کہنا ہے کہ کیا دہلی میں خواتین اپنا حق بھی نہیں مانگ سکتیں؟ اگر بی جے پی نے اپنا وعدہ پورا کرنا ہی نہیں تھا تو اس نے وعدہ کیا ہی کیوں تھا ؟ بی جے پی اپنی پولیس کے بل پر دہلی کی خواتین کی آواز کو دبانے میں ناکام رہے گی۔
دوسری طرف عام آدمی پارٹی دہلی کے صدر سوربھ بھاردواج نے ان خواتین کے ساتھ دہلی پولیس کے ظلم کی ویڈیو سوشل میڈیا پلیٹ فارم ایکس پر شیئر کرتے ہوئے کہا کہ بی جے پی کی حکومت سو دن مکمل ہونے پر جھوٹے دعوے کر رہی ہے، اور جب خواتین اپنے 2500 روپے مانگنے نہرو اسٹیڈیم پہنچیں تو پولیس نے ان کے ساتھ بربریت کی۔عام آدمی پارٹی خواتین ونگ کی صدر ساریکا چودھری نے کہا کہ بی جے پی نے دہلی سرکار کی پہلی کابینہ میٹنگ میں خواتین کو 2500 روپے دینے کا وعدہ کیا تھا۔ وزیراعظم نریندر مودی نے بھی انتخابی ریلی میں، جو دوارکا میں منعقد ہوئی تھی، کہا تھا کہ دہلی کی خواتین کو 2500 روپے دیے جائیں گے۔ اب بی جے پی اپنے وعدے سے پیچھے ہٹ رہی ہے۔ دہلی کی ایک بھی خاتون کو اب تک 2500 روپے نہیں ملے۔ بی جے پی نے دہلی کی خواتین کو دھوکہ دیا ہے۔ انہیں گمراہ کرکے ان کا ووٹ حاصل کیا ہے۔ آج خواتین پریشان ہیں اور پوچھ رہی ہیں کہ ان کے حق کے 2500 روپے کہاں ہیں؟ ساریکا چودھری نے کہا کہ ہم 2500 روپے لینے کے لیے جواہر لال نہرو اسٹیڈیم آئے تھے۔ وزیر اعلیٰ ریکھا گپتا اپنے 100 دن کے کام کو اچھا قرار دے رہی ہیں، جبکہ یہ سراسر جھوٹ ہے۔ آخر بی جے پی کے ان 100 دنوں کے کام کو اچھا کیسے مانا جا سکتا ہے۔؟
بی جے پی نے اب تک 2500 روپے دینے کا اپنا وعدہ پورا نہیں کیا۔ دہلی میں پانی کی شدید قلت ہے۔ تمام خواتین پانی کی کمی سے شدید پریشان ہیں۔ گھروں میں پینے کے لیے ایک بوند پانی دستیاب نہیں ہے۔ساریکا چودھری نے مزید کہا کہ انتخابات کے دوران بی جے پی نے ہولی اور دیوالی کے موقع پر مفت گیس سلینڈر دینے کا وعدہ کیا تھا۔ لیکن اب تک کسی بھی خاتون کو ایک بھی مفت سلینڈر نہیں ملا ہے۔ اُلٹا بی جے پی کی مرکزی حکومت نے ہر سلینڈر کی قیمت میں 50 روپے کا اضافہ کر دیا ہے۔ دہلی کے کئی علاقوں میں پورا دن بجلی نہیں آتی۔ یہاں تک کہ وی وی آئی پی علاقوں میں بھی تین سے چار گھنٹے کی بجلی کٹوتی کی جا رہی ہے۔ساریکا چودھری نے کہا کہ بی جے پی کی حکومت آنے کے بعد دہلی میں تعلیم بھی مہنگی ہو گئی ہے۔ پرائیویٹ اسکولوں نے فیس میں اضافہ کر دیا ہے۔ صرف 100 دنوں میں بی جے پی حکومت عوام کی امیدوں پر پوری طرح ناکام رہی ہے۔ ریکھا گپتا کی حکومت دہلی کے عوام کے لیے کسی بھی طرح سے موزوں حکومت نہیں ہے۔