ملک میں کوروناوائرس سے 11 افراد کی موت، 1047 ایکٹیو کیسز

(پی این این)
نئی دہلی:ملک میں کورونا وائرس کے کیسز کی تعداد 1047 تک پہنچ گئی ہے۔ سب سے زیادہ فعال کیسز کیرالہ میں 430 ہیں۔ مہاراشٹر میں 208، دہلی میں 104 اور گجرات میں 83 معاملے ہیں۔ کرناٹک میں 80 معاملات میں سے 73 صرف بنگلورو میں ہیں جبکہ مہاراشٹر، راجستھان، مغربی بنگال، کرناٹک اور مدھیہ پردیش میں کل 11 مریضوں کی موت ہوئی ہے۔ ان میں سے نو ایک ہفتے کے اندر مر گئے۔ مہاراشٹر میں کورونا سے سب سے زیادہ پانچ اموات ہوئی ہیں۔ پیر کو تھانے میں ایک خاتون کی موت ہوگئی۔
وزارت صحت اور خاندانی بہبود کے مطابق گزشتہ ایک ہفتے میں 787 نئے مریض رجسٹرڈ ہوئے ہیں۔ انڈین کونسل آف میڈیکل ریسرچ (آئی سی ایم آر) کے ڈائریکٹر ڈاکٹر راجیو بہل نے کہا کہ اب تک ملک میں اس کی 4 قسمیں مل چکی ہیں۔ ان میں LF.7، XFG، JN.1 اور NB.1.8.1 ویریئنٹس شامل ہیں۔
جے پور میں 2 کورونا مریضوں کی موت ہوگئی۔ ان میں سے ایک ریلوے اسٹیشن پر مردہ پایا گیا۔ ان کی کورونا رپورٹ مثبت آئی ہے۔ دوسری موت ایک پرائیویٹ اسپتال میں داخل ایک 26 سالہ نوجوان کی تھی۔ وہ پہلے ہی ٹی بی میں مبتلا تھے۔
اس دوران مہاراشٹر کے تھانے میں ایک کورونا پازیٹیو خاتون کی علاج کے دوران موت ہو گئی۔ تھانے میں ہی 25 مئی کو اسپتال میں زیر علاج 21 سالہ نوجوان کی موت ہوگئی۔ وہ 22 مئی سے زیر علاج تھے۔
اس سے قبل 17 مئی کو کرناٹک کے بنگلورو میں ایک 84 سالہ شخص کی موت ہوگئی تھی۔ محکمہ صحت نے کہا تھا کہ بزرگ شخص کی موت کثیر اعضاء کی خرابی کی وجہ سے ہوئی ہے۔ اس کی کووڈ رپورٹ 24 مئی کو مثبت آئی تھی۔ کیرالہ میں کووڈ سے دو لوگوں کی موت ہوئی ہے۔