دہلی میں شدید بارش کی وجہ سے درخت گرنے سے 3 بچوں سمیت 4 لوگوں کی موت

نئی دہلی: دہلی میں جمعہ کی صبح بارش اور شدید طوفان آیا، جس کی وجہ سے اب تک 4 لوگوں کی موت ہو چکی ہے، جب کہ ایک شخص کے بری طرح زخمی ہونے کی بھی اطلاع ہے۔ آج موسلا دھار بارش اور طوفان کی وجہ سے ایک بڑا حادثہ پیش آیا ہے۔ جنوبی دہلی کے جعفرپور کلاں میں ایک کمرے پر درخت گرنے سے تین بچوں سمیت چار لوگوں کی موت ہو گئی۔ ملبے تلے دب کر ایک شخص کے زخمی ہونے کی بھی اطلاع ہے۔

دہلی، نوئیڈا اور غازی آباد کے کئی علاقوں میں آج تیز ہواؤں کی وجہ سے درخت اور بجلی کے کھمبے گرنے کی اطلاعات ہیں۔ سڑکوں پر پانی جمع ہونے سے ٹریفک بھی بری طرح متاثر ہوئی ہے۔

محکمہ موسمیات نے شہریوں کو گھروں میں رہنے اور غیر ضروری طور پر باہر نہ نکلنے کا مشورہ دیا ہے۔ اس کے علاوہ بجلی گرنے کے خوف سے کمزور تعمیرات سے دور رہنا اور کھلی جگہوں پر پناہ لینا منع ہے۔ ہندوستانی محکمہ موسمیات نے دہلی-این سی آر میں تیز بارش اور گرج چمک کے پیش نظر ریڈ الرٹ جاری کیا ہے۔

دوسری طرف دہلی-این سی آر میں خراب موسم کی وجہ سے تقریباً 120 پروازیں متاثر ہوئی ہیں۔ گردو غبار کے طوفان اور تیز بارش کے باعث فلائٹ آپریشن روک دیا گیا۔ ساتھ ہی پروازوں میں خلل کے باعث لوگوں کو پریشانی کا سامنا  کرنا پڑ رہا ہے۔۔ ایئر انڈیا نے کہا کہ شمالی ہندوستان کے کچھ حصوں میں خراب موسم کی وجہ سے فلائٹ آپریشن متاثر ہوئے ہیں۔ موسم نے ٹرینوں کو بھی متاثر کیا ہے۔ 25 سے زائد ٹرینیں تاخیر کا شکار ہیں، ان ٹرینوں کو اسی مقام پر روکنے کا حکم دیا گیا جہاں وہ موجود تھیں۔